અગાઉ મ્યુનિસિપલ કોર્પોરેશનના સત્તાવાળાઓ દ્વારા શિવરંજની ઓવરબ્રિજ, અંધજનમંડળ ઓવરબ્રિજ વગેરે બ્રિજ નીચેની જગ્યા માય બાઇક કંપનીને બાઇસિકલ ભાડે આપી શકે તે માટે સાવ મફતના ભાવે અપાઇ હતી. જોકે કોઇ કારણોસર સમગ્ર પ્રોજેકટ નિષ્ફળ ગયો હતો.
અમદાવાદ મનપાની નવી યોજના
ભાડે મળશે સાઇકલ અને ઇ-સ્કૂટર
31 બસ સ્ટેશનની જગ્યા પર નાગરિકોને મળશે આ સુવિધા
જોકે હવે તંત્ર દ્વારા ફરી માય બાઇક પ્રોજેકટ અમલમાં મુકાયો છે. જે હેઠળ શહેરના 100 વિસ્તારોમાં પહેલા તબક્કામાં 1000 સાઇકલ મુકાશે. આગામી જાન્યુઆરી-2020થી નાગરિકોને બીઆરટીએસ બસ સ્ટેશનથી ઓફિસ કે ઘેર જવા સાઇકલ કે ઇ-સ્કૂટર મળતી થાય તેવી શક્યતા છે.
મ્યુનિ. કોર્પો. દ્વારા અમલમાં મુકાઇ યોજના
મ્યુનિ. કોર્પો. દ્વારા શહેરમાં પબ્લિક બાઇસિકલ સિસ્ટમ (પીબીએસ)ને અમલમાં મુકાયો છે. જે હેઠળ નાગરિકોને પર્યાવરણલક્ષી સલામત સસ્તી અને આરામદાયક સિસ્ટમ પૂરી પાડવા ભાડેથી ગિયર્ડ બાઇસિકલ અને ઇલેક્ટ્રિક બાઇક કે સ્કૂટર ઉપલબ્ધ કરાશે. બીઆરટીએસ બસ સ્ટેશન, બજારો, શાળા, કોલેજ, રહેણાક વિસ્તાર, બગીચા વગેરે સ્થળો પર સાઇકલ સ્ટેન્ડ ઊભાં કરાશે. પહેલા ત્રણ મહિનામાં માય બાઇક કંપની 1000 થી વધુ સાઇકલ મૂકશે અને યુલુ કંપની દ્વારા છ મહિનામાં 500 ઇલેક્ટ્રિક સ્કૂટરો મુકાશે. આ સ્ટેશનમાં સાઇકલ અને ઇલેક્ટ્રિક સ્કૂટર પાર્ક કરી શકાશે તેમજ ઇલેક્ટ્રિક સ્કૂટર ચાર્જ કરવાની સુવિધા પણ અપાશે.
પ્રતિ કલાક ઓછામાં ઓછા રૂ.બે ના ભાવથી બાઇક કે સ્કૂટર ભાડે મળશે
જાણકાર સૂત્રો કહે છે, માય બાઇક કંપની દ્વારા નાગરિકોને પ્રતિ કલાક ઓછામાં ઓછા રૂ.બે ના ભાવથી બાઇક કે સ્કૂટર ભાડેથી આપશે. સ્માર્ટ સિટી અમદાવાદ ડેવલપમેન્ટ લિ. દ્વારા બાઇસિકલ શેરિંગ સર્વિસ લોકોને પૂરી પાડવા માટે એક્સપ્રેશન ઓફ ઇન્ટરેસ્ટ બહાર પડાયા હતા. જેના આધારે માય બાઇક કંપનીને આ કોન્ટ્રાકટ અપાયો છે. મ્યુનિસિપલ કોર્પો. દ્વારા માય બાઇક કંપનીને જગ્યા પૂરી પડાશે.
31 બસ સ્ટેશનની જગ્યા પર નાગરિકોને સાઇકલ અને ઇ-સ્કૂટર ભાડે મળશે
જાન્યુઆરી મહિનાની શરૂઆતમાં આ પ્રોજેક્ટ અમલમાં મુકાય તેવી શક્યતા હોઇ આરટીઓથી ચંદ્રનગર, ઇસ્કોનથી શિવરંજની અને નહેરુનગરથી એમ.જે. લાઇબ્રેરી વચ્ચેના બીઆરટીએસ રૂટ પરનાં કુલ 31 બસ સ્ટેશનની જગ્યા પર નાગરિકોને સાઇકલ અને ઇ-સ્કૂટર ભાડે મળશે. આ માટે ઓટોમેટિક સિસ્ટમ અમલમાં મુકાશે. જે હેઠળ માય બાઇક કંપનીની એપથી ભાડેથી સાઇકલનું રજિસ્ટ્રેશન કરી શકાશે. નાગરિકોને 900 રૂપિયાના ભાડાથી મહિના માટે સાઇકલ પણ અપાશે. સાઇકલ કલાકના દરે ભાડે લેવા કે માસિક ભાડાથી મેળવવા કંપનીને રૂ.500ની રિફંડેબલ ડિપોઝિટ આપવી પડશે. આગામી માર્ચ-ર૦ર૦ની આસપાસ આ કંપની કુલ 300 સ્ટેશન ઊભાં કરી ત્યાં 3000 સાઇકલ લોકો માટે ભાડેથી આપશે.
શહેરમાં છેલ્લા કેટલાક સમયથી વાયુ પ્રદૂષણ વધી ગયું છે અને ટ્રાફિક જામની સમસ્યાથી નાગરિકો પરેશાન છે. જોકે આ નવી વ્યવસ્થાથી લોકોને ઇ-સ્કૂટર તેમજ સાઇકલ ભાડેથી મળનાર હોઇ શહેરની ટ્રાફિક જામની સમસ્યા અને વાયુ પ્રદૂષણ કંઇક અંશે ઓછું થઇ શકશે.