લોકડાઉન દરમિયાન દેશની લગભગ તમામ કંપનીઓની આર્થિક સ્થિતિ કથળી છે, પરંતુ રિલાયન્સ Jioએ આ મુશ્કેલ સમયમાં પણ રોકાણ દ્વારા જંગી મૂડી એકત્ર કરી છે. નોંધનીય કે અબુધાબી સ્થિત રોકાણકાર કંપની મુબાદાલા ઈન્વેસ્ટમેન્ટ કંપનીએ Jio પ્લેટફોર્મમાં 1.85% હિસ્સો ખરીદ્યો છે. મુબાદાલા આ માટે 9,093.60 કરોડનું રોકાણ કરશે. મુબાદાલા વિશ્વની છઠ્ઠી કંપની હશે કે જેમણે તાજેતરના સમયમાં Jio પ્લેટફોર્મમાં હિસ્સો ખરીદ્યો છે. Jioનું ઇક્વિટી વેલ્યુ 4.91 લાખ કરોડ છે અને એન્ટરપ્રાઇઝ વેલ્યુ લગભગ 5.16 લાખ કરોડ છે.
મુબાદાલા ઈન્વેસ્ટમેન્ટ કંપનીના રોકાણ અંગે MD અને રિલાયન્સના ચેરમેન મુકેશ અંબાણીએ એક નિવેદનમાં જણાવ્યું છે કે "મને આનંદ છે કે વિશ્વની સૌથી ડાયવર્સીફાઇડ ઈન્વેસ્ટમેન્ટ કંપની મુબાદાલાએ ભારતના ડિજિટલ ગ્રોથને વેગ આપ્યો છે અને ભારતને વિશ્વમાં ડિજિટલ રાષ્ટ્ર બનાવવાની Jioની યાત્રામાં ભાગ લેવાનું નક્કી કર્યું છે."
ઇકોનોમિક ટાઇમ્સના અહેવાલ મુજબ, મુબાદાલા અને Jioની ડીલને હજી રેગ્યુલેટરી ઓથોરિટી મળવાની બાકી છે. વિશ્લેષકો કહે છે કે રિલાયન્સે Jio પ્લેટફોર્મમાં હિસ્સો વેચીને આશરે 85,000-90,000 કરોડ રૂપિયાની મૂડી એકત્ર કરવાનું લક્ષ્યાંક બનાવ્યું છે. હાલમાં રિલાયન્સે Jioમાં ફેસબુક, સિલ્વર લેક, વિસ્ટા ઇક્વિટી પાર્ટનર્સ, જનરલ એટલાન્ટિક અને KKRને હિસ્સો વેચીને આશરે 78,562 કરોડ રૂપિયા એકઠા કર્યા છે. હવે મુબાદાલાને હિસ્સો વેચ્યા પછી રિલાયન્સ Jioમાં વિદેશી હિસ્સો 18.97 ટકા થશે અને તેનાથી રિલાયન્સને કુલ રૂપિયા 87,655 કરોડની મૂડી મળશે.
હાલમાં રિલાયન્સ પર કુલ દેવું 3.36 લાખ કરોડ રૂપિયા
મુકેશ અંબાણીની આગેવાની હેઠળની રિલાયન્સ ઇન્ડસ્ટ્રીઝે માર્ચ 2021 સુધીમાં પોતાને દેવા મુક્ત લક્ષ્ય નક્કી કર્યું છે. હાલમાં રિલાયન્સ પર કુલ દેવું 3.36 લાખ કરોડ રૂપિયા છે. નોંધનીય છે કે રિલાયન્સની કોશિશ છે કે Jio પ્લેટફોર્મને ડિજિટલ ઇકાઈ આલ્ફાબેટ અને ટેન્સેન્ટની જેમ ડેવલપ કરવામાં આવે. આ જ કારણ છે રિલાયન્સ Jioને વૈશ્વિક સ્તરે ફેલાવા માંગે છે.
મુકેશ અંબાણી તેમનો પેટ્રોકેમિકલ્સનો ધંધો સમેટી રહ્યા છે
મુકેશ અંબાણી તેમનો પેટ્રોકેમિકલ્સનો ધંધો સમેટી રહ્યા છે. આ અંતર્ગત રિલાયન્સ અને સાઉદી અરેબિયન કંપની અરામકો વચ્ચે કેમિકલ બિઝનેસ માટે 15 અબજ ડોલરના સોદાની વાટાઘાટો થઈ રહી છે. તે જ સમયે, રિલાયન્સે તેના ફ્યુઅલના રિટેલ બિઝનેસનો અડધો ભાગ BPCLને 7000 કરોડમાં વેચ્યો છે. આ સિવાય રિલાયન્સે પોતાનો ટેલિકમ્યુનિકેશન્સ બિઝનેસ ટાવર બ્રુકફિલ્ડને 25,000 કરોડ રૂપિયામાં વેચી દીધો છે.