રણબીર કપૂર તેની અપકમિંગ ફિલ્મ 'બ્રહ્માસ્ત્ર'ને લઈને હાલ ચર્ચામાં છે. રણબીરને ફુટબોલ રમવું ખૂબ જ ગમે છે. તે ઘણીવાર બોલિવૂડના અનેક સેલેબ્સ સાથે ફુટબોલ રમતા જોવા મળે છે. ત્યારે હાલમાં જ રણબીર ફુટબોલ રમતા-રમતા ઈજા થઈ ગઈ હતી.
રણબીર કપૂરના હોઠ પરથી લોહી નીકળી રહ્યું હતું. તે ઈજાને છુપાવતા ગ્રાઉન્ડમાંથી બહાર નીકળી રહ્યો હતો અને ફેન્સે તેને ઘેરી લીધો હતો. હોઠ પર વાગી ગયું હોવા છતાં રણબીરે તેના ફેન્સ સાથે સેલ્ફી લીધી હતી. જેનો વીડિયો સોશિયલ મીડિયા પર વાયરલ થઈ રહ્યો છે.
ફુટબોલ ગ્રાઉન્ડનો એક વીડિયો સામે આવ્યો છે. જેમાં બોલ લેવાના ચક્કરમાં એક પ્લેયરનો હાથ રણબીરના ચહેરા પર લાગી જાય છે અને તેના હોઠ પરથી લોહી નીકળવા લાગે છે. તે ભાગીને પાણી પીવા જતો રહે છે. તમને જણાવી દઈએ કે, થોડાં દિવસ પહેલાં જ રણબીર 'બ્રહ્માસ્ત્ર'ની શૂટિંગ માટે મનાલી ગયો હતો. અહીં તેની સાથે આલિયા ભટ્ટ અને અમિતાભ બચ્ચન પણ ગયા હતા. ત્રણેયની સેટની તસ્વીરો વાયરલ થઈ હતી.
રણબીરના વર્ક ફ્રંટની વાત કરીએ તો રણબીરની પાસે 'બ્રહ્માસ્ત્ર' સિવાય ફિલ્મ 'શમશેરા' પણ છે. અજય-અતુલની જોડી આ ફિલ્મ ડિરેક્ટ કરવાની છે. આ ફિલ્મમાં સંજય દત્ત અને વાણી કપૂર પણ મુખ્ય ભૂમિકામાં જોવા મળી શકે છે. આ સિવાય ફિલ્મમેકર લવ રંજને તેની આગામી ફિલ્મમાં રણબીર અને શ્રદ્ધાને સાઈન કર્યા છે એવી પણ ચર્ચા છે. જોકે, હાલ આ ફિલ્મનું નામ સામે આવ્યું નથી. આ ફિલ્મ લવ રંજન અને અંકુર ગર્ગ તેમના બેનર લવ ફિલ્મ્સ હેઠળ કરવાના છે. આ ફિલ્મ વર્ષ 2021માં રિલીઝ થશે.