બાહુબલી ફિલ્મમાં રાજમાતા શિવગામી દેવીનું પાત્ર નિભાવી પોતાના અભિનયનો પરિચય આપનારી રામ્યા ક્રિષ્ણન વેબ સિરીઝની ક્વીન તરફ ડગ માંડી રહી છે. કલાકારો તો ઘણા હોય છે, પરંતુ ઘણીવાર તેમના ઉમદા અભિનયના કારણે તે વર્ષોના વર્ષો યાદ રહી જાય છે અથવા એમ પણ કહી શકાય કે દર્શકો માટે તે કાયમ કિરદારના માધ્યમથી દિલમાં વસી જાય છે. રામ્યા ક્રિષ્ણન પણ એવી જ અભિનેત્રી છે જેણે હંમેશની જેમ પોતાના અભિયનના પારખા કરાવ્યા છે.
રામ્યા તામિલનાડુનાં પૂર્વ મુખ્યમંત્રી જયલલિતાના જીવન પર આધારિત સિરીઝમાં લીડ રોલમાં જોવા મળશે
રામ્યાએ માત્ર 13 વર્ષની ઉંમરથી જ ફિલ્મી દુનિયામાં ડગ માંડ્યા
હું ડિજિટલ દુનિયાની સેર કરવા બેતાબ છું : રામ્યા
વેબ સિરીઝ ક્વીનમાં લીડ રોલ
માત્ર 13 વર્ષની ઉંમરથી જ ફિલ્મી દુનિયામાં ડગ માંડનાર રામ્યાએ બોલિવૂડમાં ઘણા દિગ્ગજ અભિનેતા સાથે કામ કર્યું છે. જેમાં બિગ-બી અમિતાભ બચ્ચન અને અભિનયના બાદશાહ કહેવાતા નાના પાટેકર મોખરે છે. આ ઉપરાંત પણ શાહરુખ ખાન, અનિલ કપૂર જેવા અનેક કલાકારો છે, પરંતુ આજે વાત કરવાની છે રામ્યાની અપકમિંગ વેબ સિરીઝ ક્વીનની, જે અભિનેત્રી અને તામિલનાડુનાં પૂર્વ મુખ્યમંત્રી જયલલિતાના જીવન પર આધારિત છે. રામ્યા આ સિરીઝમાં લીડ રોલમાં જોવા મળશે.
મારા મનમાં એ પાત્રનો સાર અને કલ્પના કરીને રોલને ન્યાય આપું છું : રામ્યા
પોતાના પાત્રને એક જ ઇમેજમાં બાંધવાની જગ્યાએ અનેક તકને ઝડપી લેવાની મહેચ્છા રાખતી રામ્યા કહે છે કે, વિભિન્ન રોલ માટે મેં ખાસ પ્રયત્ન નથી કર્યાં, પરંતુ મારા મનમાં એ પાત્રનો સાર અને કલ્પના કરીને રોલને ન્યાય આપું છું. જેમ કે કૉલ-ગર્લ મેગીનું પાત્ર દર્શકોને ઘણુ પસંદ આવ્યું હતું. તેને ભજવવું મારા માટે સરળ રહ્યું, કારણ કે વયસ્ક એડલ્ટની ભૂમિકા હું સુપર ડિલક્સમાં કરી રહી હતી. છતાં પણ નિર્દેશકના નજરિયાથી મને જોવી અને જોડવી ઘણી મહત્ત્વની હતી.
નવા-નવા રોલ માટે પ્રયોગ કરતી રહે છે રામ્યા
ઉંમરનો એક પડાવ પાર કર્યા પછી મોટા ભાગે અભિનેત્રીઓ ફિલ્મને અલવિદા કહે છે અથવા તો એક જ પ્રકારના રોલમાં ઢળી જઈને રહી જાય છે, ત્યારે અનેક પ્રકારના અભિનયને ન્યાય આપવાના પ્રયાસ કરતી રામ્યા કહે છે કે જ્યારે પણ તમે કેમેરાની સામે આવો છો ત્યારે તમારી મહેનત અને ભરોસા સાથે બેસ્ટ આપવાનો પ્રયત્ન કરવાનો હોય છે. હાલના તબક્કે હું એ મુકામ પર પહોંચી છું જેમાં નિર્દેશક અને રાઇટર તેમનો પ્રોજેક્ટ લખતા સમયે મને ધ્યાનમાં રાખે છે. ત્યારે મારી પણ ફરજ બને છે કે તેમના નજરિયાને સફળ બનાવવા હું બેવડી મહેનત કરું. જ્યારે પણ હું નવા પ્રોજેક્ટની અપેક્ષા રાખું છું ત્યારે તે પાત્રને ઉમદા નિભાવવાની આશા હોય છે. માટે જ નવા-નવા રોલ માટે પ્રયોગ કરતી રહું છું.
દર્શકોએ મને હંમેશાં પ્રેમ આપ્યો છે, દિલથી પસંદ કરી છે. પછી તે ફિલ્મો હોય કે ટીવી. હવે મનોરંજનના માધ્યમ આ બે સ્થળ સુધી સીમિત નથી રહ્યા. વેબ સિરીઝ ક્વીનની વાત છે તો મને આશા છે કે મારા ચાહકો, દર્શકોને મારો આ નવો પ્રોજેક્ટ ઘણો ગમશે. હું ડિજિટલ દુનિયાની સેર કરવા બેતાબ છું. ક્વીનનો હટકે અભિનય અને રોચક સ્ટોરી મને ખૂબ જ ગમી. કદાચ આ જ કારણોસર રોલ માટે નકારો ના કરી શકી.