પોલીસની મેગા ડ્રાઈવ કોલેજ બહારના આવારા તત્વોને કરાવી ઉઠક-બેઠક

રાજકોટ: શહેરના જોઈન્ટ પોલીસ કમિશનર સિધ્ધાર્થ ખત્રીના આદેશ અનુસાર રાજકોટ ટ્રાફિક પોલિસે ગુરૂવારના રોજ શાળા અને કોલેજો બહાર વાહન ચેકિંગ ડ્રાઈવ રાખી હતી. જે અનવ્યે 294 વિદ્યાર્થીઓ અને વિદ્યાર્થીનીઓ ડ્રાઈવિંગ લાઈસન્સ વિનાના ઝડપાયા હતા. જે બાદ દંડાર્થીઓના માતા-પિતાને રૂબરૂ પણ બોલાવવામાં આવ્યા હતા અને આ બાબતથી અવગત કરવામાં આવ્યા હતા. જો કે આ સાથે ટ્રાફિકના નિયમો વિશે તેમને જાણકારી પણ આપવામાં આવી હતી.

ઉલ્લેખનીય છે કે આ સાથે જ રાજકોટ પોલીસને ફરિયાદ મળી હતી કે કોલેજો બહાર કેટલાક આવારા તત્વો અભ્યાસ કરવા આવતી વિદ્યાર્થીનીઓની પજવણી કરે છે. જે અન્વયે વહેલી સવારથી જ શાળા કોલેજોની બહાર ક્રાઈમ બ્રાંચ દ્વારા ચાંપતી નજર રાખવામાં આવી હતી. 

આપને જણાવી દઇએ કે વહેલી સવારથી જ ચાંપતો બંદોબસ્ત રાખીને બેઠેલી પોલીસે કેટલાક ટપોરીઓને કાયદાનું ભાન કરાવ્યું અને રાજકોટ ક્રાઈમ બ્રાંચના અધિકારીઓ દ્વારા તેમને જાહેરમાં ઉઠક-બેઠક કરવાની સજા પણ કરી હતી. તો સાથે જ કોલેજોની બહાર ન ફરકવાની ચેતવણી પણ આપવામાં આવી હતી.

એક તરફ ગુજરાતના અમદાવાદ સહિત અન્ય મહાનગરોમાં સ્થાનિક ટ્રાફિક પોલીસ દ્વારા લોક જાગૃતિ લાવવા માટેના પ્રયાસ હાથ ધરવામાં આવી રહ્યા છે આ સાથે ગેર-કાયદેસર રીતે વાહનો પાર્ક કરી રહેલા લોકોને શિક્ષા પણ કરવામાં આવી રહી છે ત્યારે રાજકોટ શહેર ટ્રાફિક પોલીસ દ્વારા એક મેગા ડ્રાઇવનું આયોજન કરવામાં આવ્યું હતું.