રાજકોટ / જસદણના માધવીપુરમાં પ્રેમ પ્રકરણ મુદ્દે જૂથ અથડામણ, છુટ્ટા હાથની મારામારી થતા 7 લોકો ઇજાગ્રસ્ત

• રાજકોટના માધવીપુર ગામે ગ્રામ પંચાયત પાસે જૂથ અથડામણ
• 10 વર્ષ અગાઉના પ્રેમ પ્રકરણમાં 2 પરિવારો વચ્ચે મારામારી
• મારામારીમાં કુલ 7 લોકો ઇજાગ્રસ્ત થતા હોસ્પિટલ ખસેડાયા

રાજકોટના જસદણના માધવીપુર ગામે આવેલ ગ્રામપંચાયત નજીક જૂની અદાવતને લઇને બે જૂથ વચ્ચે હથિયારો સહિત છૂટાહાથે મારામારી થતા બન્ને પક્ષે 10 લોકો ઇજાગ્રસ્ત થયા હતા. આ હુમલામાં ઘવાયેલા 10 ઈજાગ્રસ્તોને જસદણની સરકારી હોસ્પિટલમાં ખસેડવામાં આવ્યા હતા.

12 વર્ષ અગાઉના પ્રેમ પ્રકરણમાં 2 પરિવારો વચ્ચે મારામારી

તમને જણાવી દઇએ કે, માધવીપુર ગામે રહેતા એક યુવકે આજથી 12 વર્ષ પહેલા ગામની જ એક દીકરી સાથે પ્રેમલગ્ન કર્યા હોવાનું જાણવા મળી રહ્યું છે. જેનો ખાર રાખી બુધવારે સાંજના સુમારે બંને પરિવારો એકબીજા પર તીક્ષ્ણ હથિયારો સાથે તૂટી પડ્યા હતા. નોંધનીય છે કે, 12 વર્ષ અગાઉના આ પ્રેમ પ્રકરણમાં 2 પરિવારો વચ્ચે આ મારામારી થઇ હતી. જેમાં પરિવારના 3 સભ્યો સહિત કુલ 7 લોકોને ઈજા પહોંચતા તેઓને હોસ્પિટલમાં સારવાર અર્થે ખસેડાયા હતા.

ઘટનાની જાણ થતા પોલીસનો કાફલો હોસ્પિટલે જઇ પહોંચ્યો

જોકે આ બનાવના પગલે બન્ને સમાજના લોકો જસદણની સરકારી હોસ્પિટલ ખાતે બહોળી સંખ્યામાં એકત્ર થઈ ગયા હતા. તદુપરાંત આ ઘટનાની જાણ થતા જસદણ પોલીસ મથકનો કાફલો પણ હોસ્પિટલે દોડી આવ્યો હતો. હાલમાં આ બનાવને લઇને પોલીસ દ્વારા આગળની કાર્યવાહી હાથ ધરવામાં આવી રહી છે.

આ ઘટનામાં ઈજાગ્રસ્ત યુવક (પ્રેમલગ્ન કરનાર) એ જણાવ્યું કે મે 12 વર્ષ પહેલા ગામની જ એક યુવતી સાથે પ્રેમલગ્ન કર્યા હતા. ત્યારે હું જ્યારે ખેતરનું કામ કરીને ઘરેથી છાશ ને દૂધ લઈને આવતો હતો ત્યારે લગભગ 15 જેટલાં લોકોએ મને રસ્તામાં ઉભો રાખી તેઓએ સીધો મારા માથામાં હુમલો કરી દીધો હતો. જેથી મને તાત્કાલિક જસદણ સરકારી હોસ્પિટલમાં સારવાર માટે ખસેડવામાં આવેલ. એ લોકોએ અમારા સાત લોકો ઉપર તીક્ષ્ણ હથિયારથી હુમલો કર્યો છે. જોકે મે આ બનાવ અંગે જસદણ પોલીસને જાણ કરી હતી આથી પોલીસ મને હોસ્પિટલે લઇને આવી હતી.