રાજકોટ / ભારે વરસાદથી સેતુબંધ ડેમ ઓવરફલૉ, નિચાણવાળા વિસ્તારોને કરાયા એલર્ટ

ભારે વરસાદના કારણે સૌરાષ્ટ્રમાં જળાશયોની સપાટીમાં સતત વધારો થઈ રહ્યો છે. ઊપરવાસમાં ધોધમાર વરસાદ પડતા સેતુ ડેમમાં પાણીની આવકમાં વધારો થતા ડેમ ઓવરફલો થયો છે. ડેમ આવરફલો થતા નિચાણવાળા વિસ્તારોને એલર્ટ કરવામાં આવ્યાં છે. 

જ્યારે રાજકોટ માટે જીવાદોરી સમાન ન્યારી 1 ડેમમાં પાણીની સતત આવકના કારણે ડેમની જળસપાટીમાં વધારો થયો છે. ડેમ ઓવરફ્લો થવામાં માત્ર અઢી ફૂટ બાકી છે. ગઈકાલે ડેમનો એક દરવાજો દોઢ ફૂટ સુધી ખોલવામાં આવ્યો હતો. ડેમની હાલની જળસપાટી 22. 60 ફૂટે પહોંચી છે અને ડેમમાં 1248 MCFT પાણીનો જથ્થો છે. આ સિઝનમાં જ ન્યારી 1 ડેમના દરવાજા બે વખત ખોલવામાં આવી ચૂક્યા છે. ન્યારી 1 ડેમમાંથી રાજકોટના પશ્ચિમ વિસ્તારને પીવાનું પાણી પુરુ પાડવામાં આવે છે.

તો રાજકોટમાં વહેલી સવારથી ધીમીધારે વરસાદ વરસી રહ્યો છે. રાજકોટ શહેરમાં 4 કલાકમાં 1 ઇંચ વરસાદ વરસ્યો છે. ત્રણ વાગ્યાથી શરૂ થયેલો વરસાદ હજુ પણ ચાલું છે. જ્યારે હવામાન વિભાદ દ્વારા આગામી 48 કલાક રાજ્યમાં ભારે વરસાદની આગાહી કરવામાં આવી છે.