ક્રાઈમ / ધૂળેટીનો પર્વ રાજકોટના પરિવાર માટે બન્યો લોહિયાળ: પિતાએ જ જીવલેણ હુમલો કરતા 3 માસની માસૂમ દીકરીનું મોત, પત્ની-પુત્ર ઘાયલ

• રાજકોટમાં ધુળેટી પર્વ બન્યું રક્તરંજિત
• પિતાએ જ કર્યો પરિવાર પર જીવલેણ હુમલો
• 3 માસની દીકરી લક્ષ્મીનું હુમલામાં મૃત્યુ
• માનસિક રીત અસ્થિર છે પિતા

હોળીનો પર્વ હર્ષોલ્લાસથી એકબીજાને રંગોથી રંગવાનો અને નાચવા-ગાવાનો પર્વ માનવામાં આવે છે. ત્યારે રંગમાં ભંગ બનતી એક દુ:ખદ ઘટના રાજકોટથી સામે આવી છે. રાજકોટમાં ધૂળેટી પર્વ રક્તરંજિત બન્યું છે. ક્યારેક ઘરનાં વડીલો પોતાના પરિવારને સંભાળવા માટે પોતાનો જીવ આપવા તૈયાર થતાં હોય છે પરંતુ રાજકોટમાં ઊલટું બન્યું છે. 

પોતાનાં પરિવારજનો પર જ કર્યો હુમલો

રાજકોટમાં આવેલા અજંતા એપાર્ટમેન્ટ્સમાં રહેતાં પિતા પ્રેમસંગ નેપાળીએ પોતાના સમગ્ર પરિવાર પર જીવલેણ હુમલો કર્યાનો બનાવ સામે આવ્યો છે. વહેલી સવારે પિતાએ તમામ પરિવારજનો પર હથિયાર સાથે જીવલેણ હુમલો કર્યો જેમાં 3 માસની એક દીકરી, 4 વર્ષીય પુત્ર અને પત્નીનો સમાવેશ થાય છે. પિતાએ  નિર્દયતાથી પોતાની 3 માસની નાનકડી પુત્રી પર હુમલો કર્યો. એટલું જ નહીં, તેનો ભાઈ એટલે કે 4 વર્ષનાં નિયત નામના દિકરા અને પત્ની પર હુમલો કર્યો છે. 

પુત્રીનું થયું મૃત્યુ
પુત્ર નિયત અને પત્ની બંને ગંભીરરીતે ઘાયલ થતાં તેમને સારવાર હેઠળ હોસ્પિટલ ખસેડવામાં આવ્યાં છે. અફસોસની વાત તો એ છે કે 3 માસની દીકરી લક્ષ્મીનું પિતાએ કરેલા હુમલામાં મૃત્યુ થયું છે. જેના કારણે પરિવારમાં શોકની લાગણી છવાઈ ગઈ છે.

માનસિક રીત અસ્થિર છે પિતા
આરોપી પ્રેમસંગ નેપાળીની પોલીસે અટકાયત કરી હતી. બાળકીની માતા બસંતીનું નિવેદન સામે આવ્યું છે. તેણે કહ્યું કે 'મારો પતિ પ્રેમસંગ નેપાળી માનસિક અસ્થિર છે. તેને ''માતાજી'' આવતા તેણે હુમલો કર્યો છે. માતાજીએ એમ કહ્યું કે, પરિવારના બધાને મારી નાખ એટલે છરી વડે હુમલો કર્યો...મારો પતિ કોઈ કામ ધંધો કરતો નથી, વાહનો સાફ કરવા જાય છે.'

ધારદાર હથિયારથી કર્યો હુમલો
સનકી પિતા સવારે 4.30 વાગ્યે ઊઠ્યો અને તેણે પોતાના જ પરિવાર પર ધારદાર હથિયારથી હુમલો બોલી દીધો. આ હુમલામાં તેની પોતાની 3 માસની દીકરીનું અવસાન પણ થઈ ગયું છે. આ સમગ્ર મામલાની તપાસ હાલમાં પોલીસ કરી રહી છે. અને માતા-પુત્રને સારવાર માટે હોસ્પિટલ ખસેડવામાં આવ્યાં છે.