- ગુજરાતના 60 તાલુકામાં કમોસમી વરસાદ
- કમોસમી વરસાદને કારણે ખેડૂતોને નુકસાન
- મોરબીમાં કમોસમી વરસાદથી પાકને નુકસાન
ગુજરાતના 60 તાલુકામાં કમોસમી વરસાદથી ખેડૂતોની ચિંતા વધી છે છેલ્લા 24 કલાકમાં ગુજરાતના 60 તાલુકાઓમાં કમોસમી વરસાદ પડ્યો છે. જેમાં સૌથી વધુ 3.5 ઈંચ વરસાદ વલસાડ જિલ્લામાં ખાબક્યો છે. જ્યારે પાલનપુરમાં 3 ઈંચ,દાંતામાં 2.5 ઈંચ વડગામમાં 2.3 ઈંચ, સુરતમાં દોઢ ઈંચ તો કાંકરેજ, થરાદ, દિયોદર, ધાનેરામાં પણ દોઢ ઈંચ વરસાદ ખાબક્યો છે, માવઠાના કારણે ખેડૂતોને મોટાપાયે નુકસાન થયું છે જેમાં માર્કેટિંગ યાર્ડોમાં પણ ખેડૂતોના તૈયાર પાકને નુકસાન થયું છે..
મોરબીમાં કમોસમી વરસાદથી પાકને નુકસાન
આ તરફ મોરબી જિલ્લામાં કમોસમી વરસાદથી ખેડૂતોના પાકને નુકસાન થયું છે...માળિયા, ટંકારા, હળવદ અને વાંકાનેરમાં કેટલાક વિસ્તારમાં કમોસમી વરસાદ પડ્યો હતો...માળિયાના બોડકી, ઝીંઝુડા, સરવડ, ભાવપર, તરઘરી સહિતના વિસ્તારમાં કમોસમી વરસાદથી ખેડૂતોને નુકસાન થયું છે..કમોસમી વરસાદથી ખેડૂતોના મોઢા સુધી આવેલો કોળિયો છીનવાઇ ગયો છે...ત્યારે માવઠાને કારણે થયેલા નુકસાનનું વળતર આપવા ખેડૂતોએ માંગણી કરી છે..
માવઠાથી નવસારીમાં ચીકુના પાકને નુકસાન
કમોસમી વરસાદના કારણે નવસારીમાં ચીકુના પાકને નુકસાન થયું છે. અમલસાડી ચીકુમાં કમોસમી વરસાદની અસર થઇ છે. ત્રણ દિવસથી ભેજવાળા વાતાવરણના કારણે ચીકુના પાકને નુકસાન થયું છે. અમલસાડી ચીકુ ગુણવત્તા માટે જાણીતા છે અને આ મહિનામાં ચીકુની આવક સારા પ્રમાણ થઇ હતી, ખેડૂતોને ચીકુના 800થી 1200 રૂપિયા ભાવ પણ મળ્યા હતા પરતું કમોસમી વરસાદના કારણે ચીકુના ભાવને અસર થશે.
મોરબીના હળવદમાં વીજ લાઇનનો ખેડૂતોનો વિરોધ
બીજી તફ મોરબીના હળવદ તાલુકામાં ખેડૂતોનો વિરોધ જોવા મળ્યો હતો..કચ્છથી વડોદરા જતી વીજ લાઇનના કામમાં પુરુ વળતર મળે તેવી માંગ સાથે ખેડૂતોએ વિરોધ નોંધાવ્યો હતો અગાઉ પણ મામલતદાર કચેરીએ ખેડૂતોએ અર્ધનગ્ન હાલતમાં વિરોધ કર્યો હતો, મહત્વનું છે કે વારંવાર રજૂઆતો કરી છતાં વળતર ન ચૂકવાતા ખેડૂતોમાં રોષ જોવા મળી રહ્યો છે.
માવઠાને કારણે ખેતરમાં ઉભા પાક નુકસાન
કમોસમી માવઠાને કારણે ખેતરમાં ઉભા પાક કપાસ અને જીરૂને નુકસાન થયું છે. લણણી માટે તૈયાર મગફળી, ડાંગર, સોયાબીન સહિતના કઠોળ પાકોને નુકસાન થયું છે. એપીએમસી માર્કેટમાં વેચાણ માટે આવેલો માલ પલળી જવાના બનાવ બન્યા છે. સાતથી આઠ એપીએમસીમાં વરસાદને કારણે ટેકાના ભાવે મગફળીની ખરીદી બંધ કરવી પડી હતી. જો કે હજુ પણ હવામાન વિભાગ દ્વારા માવઠાને લઈને આગાહી કરવામાં આવી રહી છે, હવામાન વિભાગ દ્વારા કહેવાયું છે કે રાજ્યમાં પૂર્વી મધ્ય અસબી સમુદ્રમાં સર્જાયેલા લો પ્રેશરના કારણે વાતાવરણમાં બદલાવ આવ્યો છે. તો વેસ્ટર્ન ડિસ્ટર્બન્સના કારણે છૂટોછવાયો હળવો વરસાદ આવવાની સંભાવના સેવાઈ રહી છે.
