VIDEO / અમદાવાદમાં અનરાધાર: દીવાલ ધરાશાયી થતાં કારને લોકોએ દોરડેથી ખેંચી, VIDEO વાયરલ

• અમદાવાદમાં ધોધમાર વરસાદથી જળ બંબાકારની સ્થિતિ
• C.G રોડ વિસ્તારમાં ઈમારતની દિવાલ ધરાશાયી
• લોકોએ મહામહેનતે કાઢી બહાર

ગુજરાતભરમાં આજે અનેક જગ્યાએ વરસાદી માહોલ જામ્યો છે. ત્યારે આજે અમદાવાદમાં પણ મેઘરાજાએ બઘડાટી બોલાવતા વાતાવરણમાં ઠંડક પ્રસરી હતી અને ઠેર-ઠેર પાણી પણ ભરાયા હતા. ત્યારે ટ્રાફિકથી ગીચોગીચ રહેતા C.G રોડ વિસ્તારમાં ઈમારતની દિવાલ ધરાશાયી કાર દબાઈ હતી. 

જોર લગાકે હૈઈસા! 

દેવપથ બિલ્ડિંગની દિવાલ નીચે કાર ફસાઈ જતા સ્થાનિકોની મહેનતને પગલે આ કારને બહાર કાઢવામાં સફળતા મળી હતી. આ કામગીરીની તસવીરો અને વીડિયો સોશિયલ મીડિયા પર વાયરલ થયાં છે. 

અમદાવાદમાં 1 મહિનાનો વરસાદ 1 દિવસમાં પડ્યો 

અમદાવાદ મનપાના કમિશનરે પત્રકાર પરિષદને સંબોધન કરતા જણાવ્યું હતું કે, અમદાવાદમાં આજે સાંજે 4 વાગ્યા સુધીમાં 130.70 MM એટલે કે સરેરાશ 5 ઈંચ જેટલો વરસાદ નોંધાયો હતો. જેમાં સૌથી વધુ ઉસ્માનપુરામાં 9 ઈંચ વરસાદ ખાબક્યો હતો. ઝોન મુજબ વાત કરીએ તો પૂર્વ ઝોનમાં 135 MM, પશ્ચિમ ઝોનમાં 129 MM, મધ્ય ઝોનમાં 103 MM વરસાદ આજે પડ્યો હતો. સાથે જ ભારે વરસાદને પગલે વાસણા બેરેજના 3 દરવાજા ખોલવામાં આવ્યા છે અને દરેક ઝોનમાં કંટ્રોલ રૂમ પણ કાર્યરત કરાયો છે. 

અમદાવાદના બોપલ, સેટેલાઇટ, SG હાઇવે સહિતના વિસ્તારોમાં મેઘરાજાની જમાવટ

અમદાવાદમાં બોપલ, સેટેલાઇટ, બોડકદેવ, જોધપુર, SG હાઇવે, વસ્ત્રાપુર, માનસી સર્કલ અને શિવરંજની સહિતના વિસ્તારોમાં ધોધમાર વરસાદ શરૂ થઇ ગયો છે. એ સિવાય શહેરના અન્ય કેટલાંક વિસ્તારોમાં પણ વરસાદે રમઝટ બોલાવી છે. જેમ કે, નિકોલ, નરોડા, બાપુનગર સહિતના વિસ્તારોમાં મેઘરાજાએ જમાવટ કરી છે.'

અહીં અતિભારે વરસાદની આગાહી

હવામાન વિભાગે વધુમાં જણાવ્યું કે વલસાડ, દાદરાનગર હવેલીમાં વરસાદ વધારે રહેશે. જ્યારે દ્વારકા, કચ્છ અને જામનગરમાં ભારેથી અતિભારે વરસાદની આગાહી કરવામાં આવી છે. પોરબંદર અને જૂનાગઢમાં પણ ભારેથી અતિભારે વરસાદ રહેશે તેમ જણાવ્યું છે. તો દક્ષિણ ગુજરાતમાં પણ આગામી 5 દિવસ વરસાદની આગાહી કરવામાં આવી છે.

બંગાળની ખાડીમાં લો પ્રેશર સર્જાયું

બંગાળની ખાડીમાં લો પ્રેશર સર્જાવાથી ગુજરાતમાં વરસાદી માહોલ બની રહેશે. જેને કારણે માછીમારોને પણ દરિયો ન ખેડવા સૂચના આપી દેવામાં આવી છે. દરિયામાં પણ કરંટ જોવા મળી રહ્યો છે. પરિણામે સાગરખેડૂઓએ બોટ દરિયા કાંઠે લાંગરી દીધી છે. 

અમદાવાદ શહેરમાં પડેલ ધોધમાર વરસાદના કારણે શાહીબાગ એફ.એસ.એલ. ચાર રસ્તા ખાતે બાળકો ભરેલી સ્કૂલવાન પાણીમાં ફસાયેલ જેને શાહીબાગ પોલીસ સ્ટેશનના પોલીસ ઇન્સ્પેક્ટર કે. ડી જાડેજા તથા પોલીસ સ્ટાફના માણસોએ સ્કૂલ વાનને ધક્કો મારી પાણીમાંથી બહાર કાઢવામાં આવેલ તેમજ વરસાદના કારણે ટ્રાફિકજામમાં એમ્બ્યુલન્સ ફસાયેલ હોય જેને પણ પોલીસ ઇન્સ્પેક્ટર કે. ડી જાડેજા તથા પોલીસ સ્ટાફના માણસોએ સમયસર ટ્રાફિક ક્લીયર કરાવી એમ્બ્યુલન્સને રસ્તો કરાવી આપેલ છે.