રાજ્યમાં શિયાળો ધીમે ધીમે વિદાય લઇ રહ્યો છે અને ઉનાળો દસ્તક દઇ રહ્યો છે. ત્યારે હવે ઉનાળાની શરૂઆત પહેલા જ હવામાન વિભાગે વરસાદની આગાહી કરી છે. રાજ્યના કેટલાક વિસ્તારોમાં વરસાદ પડી શકે છે.
ઉનાળાની શરૂઆતની સાથે હવામાને વરસાદની આપી આગાહી
વેસ્ટર્ન ડિસ્ટર્બનસના કારણે રાજ્યના વાતાવરણમાં પલટો
આવતીકાલે સુરત, વડોદરામાં સામાન્ય વરસાદી છાંટાની આગાહી
ગુજરાતવાસીઓ ફરી એકવાર ભીંજાવા તૈયાર રહેજો. કારણ કે ઉનાળાની શરૂઆતમાં વરસાદ પડી શકે છે. હવામાન વિભાગનું માનીયે તો અફઘાનિસ્તાન પર વેસ્ટર્ન ડિસ્ટર્બનસ સર્જાયું છે. જેના કારણે રાજ્યના વાતાવરણમાં પલટો આવી શકે છે.
29 ફેબ્રુઆરીએ સુરત અને વડોદરામાં સામાન્ય વરસાદી છાંટા પડી શકે છે. તો અમદાવાદ શહેરમાં પણ વાદળછાયું વાતાવરણ રહે તેવી આગાહી કરવામાં આવી છે. ત્યારે ઉત્તર ગુજરાતના બનાસકાંઠા પંથકમાં વાતાવરણમાં પલ્ટે આવતા ખેડૂતો ચિંતામાં મુકાયા છે.
બનાસકાંઠાના વાતાવરણમાં પલટો, ખેડૂતો ચિંતિત
બનાસકાંઠા જિલ્લામાં વાતાવરણમાં અચાકન પલટો આવ્યો છે. વાદળછાયા વાતાવરણથી ખેડૂતો પર પણ ચિંતાના વાદળો ઘેરાયા છે. ખેડૂતોનું કહેવું છે કે, જો માવઠું થશે તો બટાકા, રાયડા અને એરંડાના પાકને નુકસાન થશે. પાક લણવાના સમયે જ જિલ્લાનું વાતાવરણ પલટાતા ખેડૂતો પરેશાન છે અને માવઠું ન થાય તે માટે પ્રાર્થના કરી રહ્યા છે.