આદેશ / વેક્સિનેશનમાં ધન્નાશેઠોને મળી રહી હતી એવી સુવિધા કે કેન્દ્ર ગિન્નાયું : રાજ્યોને કહ્યું તાત્કાલિક લો એક્શન 

• ભારતમાં વેક્સિનેશનમાં શરૂ થઈ ગયા જુદા જુદા તરકટ 
• વેક્સિન ટૂરિઝમ અને હોટલો સાથે મળીને હોસ્પિટલો આપી રહી હતી પેકેજ 
• જાણકારી મળતા જ એક્શનમાં આવી કેન્દ્ર સરકાર 

ધન્નાશેઠોના તાગડધિન્ના
ભારતમાં કોરોના વાયરસની બીજી લહેર ચાલી રહી છે ત્યારે દેશમાં વેક્સિનેશન પ્રક્રિયાને તેજ બનાવવા માટે કામ કરવામાં આવી રહ્યું છે. નાગરિકો પણ હવે વેક્સિન માટે સજાગ થયા છે અને ડોઝ માટે આગળ આવી રહ્યા છે ત્યારે કેટલીક હોસ્પિટલો અને હોટલો તથા કંપનીઓને વેક્સિનના કાર્યક્રમમાં પણ કમાણી કરી લેવી છે. તેની સાથે જ દેશના કેટલાક ધન્નાશેઠોને રસીકરણમાં પણ ટૂર અને પેકેજની મજા લેવી છે.

કેન્દ્ર સરકાર એક્શનમાં આવી 
વેક્સિન ટૂરિઝમનો ક્રેઝ દેશમાં સતત વધતો જઈ રહ્યો છે. આ જ મુદ્દે સ્પુટનીક કંપનીએ પોતે જ ટ્વિટ કર્યું હતું. દિલ્હીની એક ટ્રાવેલ એજન્સીએ તો લોકોને 24 દિવસના ટૂર પેકેજ પણ આપવાની શરૂઆત કરી દીધી હતી. હોટલો સાથે ટાઈઅપ કરીને પેકેજ આપવામાં આવી રહ્યા છે ત્યારે કેન્દ્ર સરકાર હવે એક્શનમાં આવી છે. હોટલોમાં સારા પેકેજમાં લોકોને રસી લેવાની સુવિધા આપવામાં આવી રહી હતી. 

રાજ્યોને આપ્યા તાત્કાલિક કાર્યવાહીના આદેશ 
કેન્દ્ર સરકારે કહ્યું કે કેટલીક પ્રાઇવેટ હોસ્પિટલ હોટલો સાથે મળીને લોકોને રસીકરણ પેકેજ આપી રહી છે જે નિયમભંગ છે. કેન્દ્ર સરકારે આ મુદ્દે રાજ્ય સરકારો તથા કેન્દ્ર શાસિત પ્રદેશોને આદેશ કર્યો છે કે તેના પર તાત્કાલિક રોક લાગવી જોઈએ. કેન્દ્ર સરકારે રાજ્યોને કહ્યું કે અમને જાણવા મળ્યું છે કે અમુક પ્રાઇવેટ હોસ્પિટલ રસીકરણ માટે પેકેજ આપી રહી છે જે નેશનલ કોવિડ વેક્સિનેશન પ્રોગ્રામની ગાઈડલાઇનનું ઉલ્લંઘન છે. આ હોસ્પિટલો સામે તાત્કાલિક કાર્યવાહી કરવામાં આવે. 

શું છે સરકારના નિયમ? 

કેન્દ્ર સરકારના નિયમ અનુસાર ચાર જગ્યા પર રસીકરણ કરવામાં આવશે 

ગવર્નમેન્ટ સેન્ટર 
પ્રાઇવેટ હોસ્પિટલ 
વર્કપ્લેસ (જ્યાં મંજૂરી અપાઈ હોય તે જ)
વેક્સિનેશન સેન્ટરમાં જ્યાં વૃદ્ધો અને દિવ્યાંગોને સગવડ રહે 

(તસવીર પ્રતિકાત્મક : ANI)