વધારો / ડુંગળીની રાહે બટાકાઃ માત્ર દસ જ દિવસમાં ભાવ બમણા થઈ ગયા

• બટાકાના ભાવ માત્ર દસ જ દિવસમાં ભાવ બમણા થયા
• કેટલાક મહિનામાં ટામેટાંની કિંમતમાં ઘટાડો થયો
• પંજાબમાંથી બટાકાની આવકમાં ઘટાડા અને વરસાદને લઇને ભાવ વધ્યા

જોકે બટાકાના વેપારીઓ આ ભાવવધારો કામચલાઉ ટ્રેન્ડ હોવાનું જણાવે છે અને થોડા દિવસમાં ભાવ સામાન્ય થવાની આશા છે. દિલ્હીના રિટેલ બજારમાં બટાકાનો ભાવ પ્રતિકિલો રૂ.૪૦ની આસપાસ ચાલી રહ્યો છે. 

ગત સપ્તાહે બટાકાનો ભાવ કિલોના રૂ. ૨૦-૨૫નો હતો. આઝાદપુર મંડીમાં બટાકાનો મહત્તમ જથ્થાબંધ ભાવ પ્રતિકિલો રૂ.૨૧ હતો, જે ગઇ સાલ ડિસેમ્બર-૨૦૧૮માં પ્રતિકિલો માત્ર રૂ. ૬-૧૦ની રેન્જમાં હતો. બટાકાના વેપારીઓનું કહેવું છે કે પંજાબમાંથી બટાકાની આવકમાં ઘટાડા અને વરસાદને લઇ કેટલાક વિસ્તારમાં નિકાસ પ્રભાવિત થવાથી ભાવ વધ્યા છે.

કેન્દ્રીય આંકડા અનુસાર આ વર્ષે બટાકાનું વાવેતર ગઇ સાલની તુલનાએ ત્રણથી ચાર ટકા વધુ છે અને ઉત્પાદન વધવાની પણ આશા છે. માત્ર બટાકા જ નહીં, પરંતુ ગઇ સાલની તુલનાએ મોટા ભાગનાં શાકભાજીના ભાવ પણ ૫૦ ટકા વધુ જોવા મળી રહ્યા છે. બટાકા ઉપરાંત ટામેટાં, કોબી, પાલક સહિત અન્ય શાકભાજીની કિંમત ગઇ સાલની તુલનાએ ૫૦ ટકાથી વધુ છે.

જોકે છેલ્લા કેટલાક મહિનામાં ટામેટાંની કિંમતમાં ઘટાડો થયો છે, પરંતુ ગઇ સાલની તુલનાએ તે વધુ છે. શાકભાજી ઉપરાંત ચોખા, ઘઉં, લોટ, દાળ, ખાદ્યતેલ, ચા, ખાંડ, ગોળ અને દૂધના ભાવ પણ વધી ગયા છે. ઘઉં અને ચોખાના ભાવમાં ૧૦ ટકાથી વધુ ઉછાળો જોવાયો છે. ગત સપ્તાહના આંકડા જોઇએ તો શાકભાજીની કિંમત ઓક્ટોબરમાં ૨૬.૧૦ ટકા હતી તે નવેમ્બરમાં ૩૫.૯૯ ટકા થઇ ગઇ છે.