કાર્યવાહી / અમદાવાદના કૃષ્ણનગરમાં મહિલા સંચાલિત જુગારધામ પર દરોડા: 11 ઝડપાયા, પતિના મૃત્યુ બાદ આર્થિક સહારો ન રહેતા રમાડતી જુગાર

• મહિલા સંચાલિત જુગારધામ પર પોલીસના દરોડા
• 1000 હજાર રૂપિયા નાળ ઉઘરાવી રમાડતી હતી જુગાર
• મહિલા સહિત 11 આરોપીને જુગાર રમતાં ઝડપી લીધા

અમદાવાદના કૃષ્ણનગર વિસ્તારમાં પોલીસે દરોડા પાડીને મહિલા સહિત 11 આરોપીને જુગાર રમતાં ઝડપી લીધા હતા. પોલીસને બાતમી મળી હતી કે મહિલા પોતાના ઘરે બહારથી માણસો બોલાવીને જુગાર રમાડી રહી છે. પોલીસે રેડ કરી સ્થળ પરથી રોકડ, મોબાઈલ ફોન મળીને રૂ. 49 હજારનો મુદ્દામાલ કબજે લીધો હતો. 

બાતમીના આધારે પાડ્યા હતા દરોડા
કૃષ્ણનગર પોલીસે બાતમીના આધારે સૈજપુર ટાવરની અંદર ગાગી મહારાજની જૂની ચાલીના મકાન નંબર-39માં રેડ કરી હતી. રેડ દરમિયાન મહિલા સહિત દસ આરોપીઓ જુગાર રમતાં મળી આવ્યા હતા. પોલીસે આરોપીઓ વિરુદ્ધ ગુનો દાખલ કરીને સિમરન તલરેજા (ઉં.વ. 48, રહે. સૈજપુર), ટીકમ ઉર્ફ જીતુ ગોસ્વામી (ઉં.વ.44, રહે. સૈજપુરની જૂની ચાલી), વિજય ઉર્ફે વીજ્જુ જામનાની (ઉં.વ. 30, રહે. સૈજપુર), મહેશ માંડલિયા (ઉં.વ. 50, રહે. રખિયાલ ગામ), કમલેશ ચંદાણી (ઉં.વ. 42, રહે. સૈજપુર), રાજુ ખટવાણી (ઉ.વ. 45, રહે. સૈજપુર), મનોજ ખટવાણી (ઉં.વ. 42, રહે. સૈજપુર), ગુરુમુખ બચાણી (ઉ.વ. 65, રહે. કુબેરનગર), લ‌િલત જમનાની (ઉં.વ.30, રહે. સૈજપુર), લક્ષ્મણ પંજાબી (ઉ.વ.58, રહે. કૃષ્ણનગર), હીરાલાલ રાહેરા (ઉં.વ.58, રહે. સરદારનગર)ની ધરપકડ કરી હતી. 

49,800નો મુદ્દામાલ કર્યો કબજે
પોલીસે મહિલાની પૂછપરછ કરતાં તેણીએ કહ્યું હતું કે, હું વિધવા છું, જેથી ઘર ચલાવવામાં તફલીફ પડે છે. આથી બે-ત્રણ રવિવારે આજુબાજુના માણસો ભેગા કરી પોતાના ઘરમાં જુગાર ચલાવું છું. જુગાર રમવા બધાંને ભેગા કરી 1000 હજાર રૂપિયા નાળ ઉઘરાવી રમાડતી હતી. પોલીસે સ્થળ પરથી રૂ.13800ની રોકડ રકમ, મોબાઈલ ફોન સહિતનો 49,800નો મુદ્દામાલ કબજે લઈ કાર્યવાહી કરી હતી. 

દારૂ અને જુગાર પર તવાઈ બોલાવવા આદેશ 
ઉલ્લેખનીય છે કે, છેલ્લા કેટલાક સમયથી અમદાવાદ શહેરના અલગ અલગ વિસ્તારમાં દારૂ-જુગારની રેડ કરવામાં આવી રહી છે, જેમાં સ્થાનિક પોલીસની રહેમ નજર હેઠળ દારૂ અને જુગારની રેલમછેલ થતી હતી. આ બધા વચ્ચે શહેરના કેટલાક વિસ્તારમાં જુગારધામ ચાલતું હોય તેમ વરલી મટકાનો જુગાર કે તીન પત્તીનો હાર-જીતનો જુગાર પણ રમાતો હોય છે. આથી   શહેર પોલીસ કમિશનર દ્વારા છેલ્લા કેટલાક સમયથી દારૂ અને જુગાર પર તવાઈ બોલાવવા આદેશ અપાયો હતો તેમ છતાં બેફામ જુગારધામ ચાલી રહ્યું હતું. હાલ પોલીસે આરોપીઓની ધરપકડ કરી કાયદેસર કાર્યવાહી શરૂ કરી છે.