પેટ્રોલ-ડીઝલની વધી રહેલી કિંમતોને લઈને કોંગ્રેસના વચગાળાના પ્રમુખ સોનિયા ગાંધીએ મોદી સરકારને પત્ર લખ્યો હતો. ત્યારે હવે કેન્દ્રીય પેટ્રોલિયમ મંત્રીએ તેનો જવાબ આપ્યો છે.
સોનિયા ગાંધીએ મોદી સરકારને લખ્યો હતો પત્ર
પત્રમાં મોદી સરકારને કિંમતોમાં ઘટાડો કરવા કરી હતી અપીલ
પેટ્રોલ ડીઝલને લઈને લખેલા પત્ર પર પેટ્રોલિયમ મંત્રીની આવી પ્રતિક્રિયા
દેશમાં સતત વધી રહેલી પેટ્રોલ-ડીઝલની કિંમતોની વચ્ચે કોંગ્રેસના વચગાળાના પ્રમુખ સોનિયા ગાંધીએ મોદી સરકારને પત્ર લખીને આ કિંમતોમાં ઘટાડો કરવાનું સૂચન કર્યું હતું.જેના મુદ્દે હવે પેટ્રોલિયમ મંત્રી ધર્મેન્દ્ર પ્રધાન દ્વારા ખૂબ જ કડક પ્રતિક્રિયા આપવામાં આવી છે.
આંતરરાષ્ટ્રીય માર્કેટમાં ક્રૂડના ભાવ વધવાથી વધી રહી છે કિંમતો : પેટ્રોલિયમ મંત્રી
યુનિયન પેટ્રોલિયમ મિનિસ્ટર ધર્મેન્દ્ર પ્રધાન દ્વારા એક નિવેદનમાં કહેવામાં આવ્યું હતું કે ઇન્ટરનેશનલ માર્કેટમાં ક્રૂડની કિંમતોમાં વધારાને લઈને પેટ્રોલ-ડીઝલના ભાવમાં વધારો જોવા મળી રહ્યો છે, આ ધીમે ધીમે ઓછો થઇ જશે, તેમણે કહ્યું હતું કે કોરોનાના લીધે ઓઇલની વૈશ્વિક આપૂર્તિમાં ઘટાડો નોંધાયો છે,જેના લીધે તેનું ઉત્પાદન પણ પ્રભાવિત થયું છે.
કેન્દ્રીય મંત્રીએ વધુમાં જણાવ્યું હતું કે અમે લગાતાર જીએસટી કાઉન્સિલને પેટ્રોલિયમ પ્રોડક્ટ્સને જીએસટીમાં આવરી લેવાનો અનુરોધ કરી રહ્યા છીએ, જો કે આ મુદ્દે અંતિમ નિર્ણય તો કાઉન્સિલ જ લઈ શકે છે.
રાજસ્થાન અને મહારાષ્ટ્ર એ જ સૌથી વધુ કમાણી કરી છે : ધર્મેન્દ્ર પ્રધાન
આ મુદ્દે તેમણે સોનિયા ગાંધી પર પણ નિશાન સાધ્યું હતું, અને કહ્યું હતું કે તેમને જાણ હોવી જોઈએ કે રાજસ્થાન અને મહારાષ્ટ્ર દ્વારા સૌથી વધુ પેટ્રોલિયમ પર ટેક્સ દ્વારા કમાણી કરવામાં આવી છે, અને લોકડાઉનમાં કેન્દ્ર અને રાજ્યોની કમાણી ખૂબ જ ઘટી ગઈ હતી, નોકરીઑ વધારવા માટે અમે બજેટનો એક ખૂબ જ મોટો ભાગ અલગ અલગ સેક્ટરોને આપી દીધો છે.
નોંધનીય છે કે સોનિયા ગાંધીએ થોડા દિવસો પહેલા કેન્દ્ર સરકારને પત્ર લખીને પેટ્રોલ-ડીઝલની કિંમતો ઘટાડવાની અપીલ કરી હતી અને આ મુદ્દે સરકાર પર નિશાન પણ સાધ્યું હતું, સાથે જ આ પત્રમાં તેમણે પીએમ મોદીને 'રાજધર્મ'ની પણ યાદ અપાવી હતી, હાલમાં કેન્દ્રીય પેટ્રોલિયમ પ્રધાનની પ્રતિક્રિયાને તેના જવાબ રૂપે જોવાઈ રહી છે, અને મહત્વનું છે કે રાજસ્થાનમાં અને મહારાષ્ટ્રમાં કોંગ્રેસ પાર્ટીની જ સરકાર છે.
સતત વધી રહી છે પેટ્રોલ-ડીઝલની કિંમતો
ખાસ નોંધવું એ રહ્યું કે હાલના દિવસોમાં પેટ્રોલ-ડીઝલની કિંમતોમાં છેલ્લા ઘણા સમયથી વધારો નોંધાઈ રહ્યો છે, દિલ્હીમાં પેટ્રોલના ભાવ વધીને 90.93 થઇ ગયા છે, સાથે જ ડીઝલના ભાવ 35 પૈસા વધીને 81.32 રૂપિયા લીટર પહોંચી ગયા છે અને દેશના ઘણા શહેરોમાં તો આ ભાવ સેન્ચ્યુરીને પર પાર કરી ચૂક્યા છે.