છેલ્લા દસ દિવસમાં 9મી વખત ઈંધણના ભાવ વધ્યા, 22 માર્ચથી હાલ સુધી પેટ્રોલમાં 6.41 પૈસા તો ડીઝલમાં 6.57 રૂપિયા વધી ગયા
રાજ્યમાં પેટ્રોલ ડીઝલની કિંમતમાં ફરી વધારો ઝીંકાયો
પેટ્રોલમાં 80 પૈસા તો ડીઝલમાં 82 પૈસા વધ્યા
મોંઘવારી એટલી હદે વધી છે કે મધ્યમવર્ગના પરિવાર માટે એક સાંધે ત્યાં 13 તૂટે એવી સ્થિતિ છે.પેટ્રોલ-ડીઝલ હોય કે રાંઘણ ગેસ, તેલ હોય કે શાકભાજી બધાયમાં એટલો ભાવ વધારો થઈ ગયો છે કે ખિસ્સા ખાલી થયા સમજો.ત્યારે વધુ એક વખત રાજ્યમાં પેટ્રોલ ડીઝલની કિંમતમાં વધારો કરવામાં આવ્યો છે.
પેટ્રોલનો ભાવ 101.5 અને ડીઝલનો ભાવ 96.02 પર પહોંચ્યો
છેલ્લા દસ દિવસમાં 9મી વખત ઈંધણના ભાવ વધારી દેવામાં આવ્યા છે. હવે પેટ્રોલમાં 80 પૈસા તો ડીઝલમાં 82 પૈસા વધારવામાં આવ્યા છે. જેથી 9 દિવસના વધારાનું કુલ ટોટલ કરીએ તો પેટ્રોલમાં 6.41 પૈસા તો ડીઝલમાં 6.57 રૂપિયા વધી ગયા છે.આ ભાવ વધારો 31 માર્ચને ગુરુવાર સવારથી લાગુ થઈ જશે.હવે પેટ્રોલનો ભાવ 101.5 અને ડીઝલનો ભાવ 96.02 પર પહોંચ્યો ગયો છે
લોકો સતત વધતાં ભાવથી પરેશાન
મોંઘવારીએ ચારેય કોરથી માઝા મૂકતા લોકો હવે આ વધારાથી રોષ ભરાઈ રહ્યા છે. સતત વધતા પેટ્રોલ અને ડીઝલના ભાવને લીધે જનતાની કમર તૂટી પડી છે મોંઘવારીના માર વચ્ચે બજેટ ખોરવાઈ ચૂક્યું છે. એકવાર ફરી દાઝ્યા પર ડામ આપ્યા સમાન જેવી સ્થિતી હાલ જનતાની જોવા મળી રહી છે
કોંગ્રેસે કર્યો કટાક્ષ
બુધવારે પેટ્રોલ-ડીઝલના ભાવ વધારાનો મુદ્દો વિધાનસભામાં ગુંજયો હતો શૈલેષ પરમારે પેટ્રોલ-ડીઝલ ના ભાવ વધારાને લઈ સરકાર પર કટાક્ષ કરતાં કહ્યું હતું કે ભાજપની પાંચ રાજ્યોમાં જીત બાદ લોકોને ભેટ મોંઘવારી રૂપે આપવામાં આવી. સરકારે ભાવ વધારો કરી પેટ્રોલનો ભાવ 100 પાર કરાવ્યો.
ગુજરાતમાં 106 સુધી પહોંચી ગયું હતું પેટ્રોલ
અગાઉ ગુજરાતમાં 7 ઓક્ટોબરે પહેલી વખત 100 રૂપિયા પેટ્રોલ થયું હતું. 2 નવેમ્બરે પેટ્રોલની કિંમત સૌથી વધુ 106.63 પ્રતિ લિટરે પહોંચી હતી. જે બાદ કેન્દ્ર અને રાજ્ય સરકારે ટેક્સ ઘટાડી કિમતમાં એક સાથે 15થી વધુ રૂપિયાનો ઘટાડો કર્યો હતો.