પંચમહાલ જિલ્લાના કાલોલની વેજલપુર પોસ્ટ ઓફિસના એજન્ટે લોકો સાથે છેતરપિંડી કરી. ભાવેશ સુથાર નામનો પોસ્ટ એજન્ટ ખાતેદારોના કરોડો રૂપિયા લઇ ફરાર થઇ ગયો છે. જેને પગલે ખાતેદારોએ પંચમહાલ જિલ્લાના પોલીસવડાને એજન્ટ વિરુદ્ધ ફરિયાદ નોંધવા અરજી કરી છે. ખાતેદારોએ વેજલપુર પોસ્ટ ઓફિસમાં પણ આ અંગે રજુઆત કરી છે. આ મામલે પોસ્ટ વિભાગે ટીમ બનાવી તપાસ શરુ કરી છે.
ભોગ બનનારે જિલ્લા પોલીસવડાને ગુનામાં સંડોવાયેલા સામે ફરિયાદ કરવા અરજી કરી
કેવી રીતે ઠગાઇ થયાનો ખુલાસો થયો?
ગત બુધવારે નડિયાદમાં પુત્રને મળી ભાવેશ પાછો ફર્યો નહોતો. એ બાદ ખાતેદારો જ્યારે નાણાં ઉપાડવા ગયા ત્યારે તેમની સાથે છેતરપિંડી થયાનો અહેસાસ થયો હતો. જેને પગલે ભોગ બનનાર 8 ખાતેદારોએ કરેલી અરજીમાં KVC, NSC, MIS સહિત સેવિંગ એકાઉન્ટ ખોલાવીને પોસ્ટ એજન્ટ ભાવેશ સુથારે જમા કરાવ્યા હતા. તેમજ ખાતેદારોએ જિલ્લા પોલીસવડાને પોસ્ટ એજન્ટ ભાવેશ સુથાર, વેજલપુર પોસ્ટના પોસ્ટ માસ્તર તથા સંબધિત કર્મચારીઓ અને તપાસમાં જે નીકળે તેઓની વિરુદ્ધ ફરીયાદ નોંધવા અરજી કરી છે.
કેવી રીતે પડાવ્યા પૈસા ?
એજન્ટ ભાવેશે અનેક લોકોના લાખો રુપિયાનું પોસ્ટના ખાતામાં રોકાણ કરાવી વિશ્વાસ કેળવ્યો. ભાવેશ ખાતેદારો પાસે પૈસા જમાં કરાવવાનું કમિશન લેતો હતો.
છેલ્લા કેટલાય સમયથી તેણે ખાતેદારો પાસેથી નાણાં લઇને પોસ્ટમાં જમા કરાવ્યા ન હતાં. તેમ છતાં તેણે પાસબુકમાં એન્ટ્રી પાડી નકલી પાસબુકો પધરાવી દીધી હતી. ડુપ્લીકેટ પાસબુકમાં પોસ્ટના સિક્કા અને અધિકારીઓની સહી પણ કરી હતી. સાથે સાથે તેણે કેટલાક ખાતેદારોના વિડ્રોઅલ વાઉચર પર ખોટી બનાવટી સહિઓ કરી ખાતેદારોના નાણાં ખાતામાંથી ઉપાડ્યા હતા.
કઇ કલમ હેઠળ ગુનો દાખલ કરવા અરજી કરાઇ ?
8 ખાતેદારોના 50 લાખ જેટલા નાણાં પોસ્ટ એજન્ટ ભાવેશ સુથાર, પોસ્ટ માસ્તર તથા પોસ્ટના સંબંધિત અધીકારી વિરુદ્ધ ઇપીકો કલમ 406, 409, 420, 120(બી), 114, 465, 466, 467, 469,470, 471 મુજબ ફરીયાદ નોંધવા અરજી કરી હતી.