સ્ટડી / બીજાં બાળકોની સાથે નવા શબ્દો જલદી શીખી લે છે નાનાં બાળકો

પરિવાર બાળકોની પહેલી પાઠશાળા હોય છે. પરિવારથી જ બાળકો ભાષા અને અન્ય ચીજો શીખવાની શરૂઆત કરે છે. હવે એક નવીન અભ્યાસમાં બાળકોના શીખવા સંબંધી એક મહત્ત્વની જાણકારી સામે આવી છે. તેમાં જણાવાયું છે કે બાળકો બીજાં બાળકોની સાથે નવા શબ્દ સરળતાથી શીખી જાય છે. અભ્યાસમાં એ વાત સામે આવી છે કે બાળકોમાં શીખવાની પણ જિજ્ઞાસા હોય છે. 

તે પોતાની આસપાસના લોકો પાસેથી દરેક પ્રકારની જાણકારી મેળવી લે છે. ખાસ કરીને પરિવારજનો પાસેથી બોલવાની રીત શીખે છે અને પછી તેમની નકલ કરે છે. આ પહેલા કરાયેલા એક અભ્યાસમાં એ વાત જાણવા મળી હતી કે બાળકો પોતાની માતા અને અન્ય કોઇ મહિલાના અવાજ પ્રત્યે અલગ અલગ પ્રતિક્રિયા આપે છે. અમેરિકા સ્થિત ઓહિયો સ્ટેટ યુનિવર્સિટીના વિજ્ઞાનીના નવીન અભ્યાસના આધાર પર સલાહ અપાઇ છે કે બાળકોને નવા શબ્દ શીખવાડવાની સૌથી સારી રીત બીજાં બાળકોનો સાથ છે. 

ઓહિયો સ્ટેટ યુનિવર્સિટીના યુઆન વાંગ કહે છે કે આ દુનિયા અંગે આપણે જે પણ શીખીએ છીએ તે વસ્તુ આપણને બીજા પાસેથી જાણવા મળે છે. આ વાત ખાસ કરીને નાનકડાં બાળકો પર લાગુ થાય છે. ભાષા અંગે વાત કરીએ તો તેને શીખવામાં વક્તાની ઉંમર, જાતિ અને સામાજિક વર્ગ જેવી વસ્તુઓ પણ મહત્ત્વની ભૂમિકા ભજવે છે.  બાળકો અલગ અલગ વક્તાઓ પાસેથી વિશિષ્ટ જાણકારી સમજી શકે છે અને તેને એકત્ર કરે છે. પછી તેમના હિસાબે પ્રયોગ કરે છે.