વાહન-વ્યવહાર / કારમાં CNG ફીટ કરાવતા પહેલા RTOનો આ નિયમ જાણી લેજો, નહીંતર કાર્યવાહી થશે

• નિયમ વિરુદ્ધ CNG કીટ ફિટ કરનાર સામે કાર્યવાહી
• કંપની ફિટિંગ વાહનોમાં જ CNGની માન્યતા 
• જૂના મોડ્યુલમાં જ કિટ બજારમાંથી ફિટ કરી શકાશે

અમદાવાદ RTOના મહત્વના સમાચાર સામે આવ્યા છે. અમદાવાદ RTOના ઋતુરાજ દેસાઈનું CNG કીટના ફિટિંગને લઈને મહત્વનું નિવેદન આપ્યું છે. નિયમ વિરુદ્ધ CNG કીટ ફિટ કરનાર સામે RTO કાર્યવાહી કરશે કંપની ફિટિંગ વાહનોમાં જ CNGની માન્યતા પ્રાપ્ત રહેશે. તો સાથે જણાવ્યું કે, જૂના મોડ્યુલમાં જ CNG કિટ બજારમાંથી ફિટ કરાવી શકાશે. નિયમ વિરુદ્ધ આડેધડ BS6 એન્જિનમાં CNG ફિટ કરનારા સામે RTO કાર્યવાહી કરશે. જે કંપનીઓ નવા મોડ્યુલમા CNG ફિંટીગ નથી આપતી તેમાં પાછળથી કિટ ફિટ કરવાની કોઈ પરવાનગી નથી.

BS6 એન્જિનમાં કંપની સિવાયની CNG કીટ ફિંટિંગને લઈ દુકાનદારોને હેરાની

વધતા જતાં પેટ્રોલ-ડીઝલના ભાવો વચ્ચે સરકાર દ્વારા સમગ્ર દેશ સહિત ગુજરાતમાં 2020 પછી BS-6 વાહનોમાં CNG કીટ ફિટિંગનું એપ્રુવલ આપવાનું બંધ કરી દીધું છે. ખાનગી કંપનીઓને એપ્રૂવલ ન મળતા મુશ્કેલી વધી છે. વાહનો ખરીદનાર ગ્રાહકો અને ખાનગી કંપનીઓની કીટ ફિટ કરતી કંપનીઓના માલિકોને ભારે મુશ્કેલીનો સામનો કરવો પડી રહ્યો છે. સરકારના આ નવા નિયમથી સીએનજી કીટ ફિટિંગનો ધંધો પડી ભાંગવાની સ્થિતિ પર આવી ચુક્યો છે.

છેલ્લા 4 માસથી પેટ્રોલ અને ડીઝલના ભાવોમાં કૂદકેને ભૂસકે વધારો થઇ રહ્યો છે. આવા સમયે CNG બળતણ વાહનચાલકો માટે આશીર્વાદરૂપ બન્યું છે. સરકાર દ્વારા પણ પેટ્રોલ-ડીઝલને બદલે CNG બળતણ પર ભાર મૂકવામાં આવી રહ્યો છે. તો બીજી તરફ 2020 પછીના BS-6 એન્જીન ધરાવતા વાહનોમાં ખાનગી કંપનીઓની CNG કીટ ફિટિંગને સરકારે એપ્રુવલ આપવાનું બંધ કરી દીધું છે. હવે ફરજીયાત જેતે કંપની દ્વારા વાહનોમાં CNG કીટ ફિટિંગ ગ્રાહકોએ લેવાનો નિયમ લાગુ કરવામાં આવ્યો છે. તો બીજી તરફ કેટલાક વાહન ઉત્પાદન કરતા એકમો દ્વારા ચોક્કસ એન્જીનમાં જ CNG કીટ ફિટિંગ કરવામાં આવતું હોય અને તે પણ બજાર કિંમત કરતા બમણી કિંમત કંપનીઓ દ્વારા વસૂલ કરવામાં આવતી હોય છે.  

તે પણ વેઇટિંગમાં વાહનો મળતા હોય ના છૂટકે ગ્રાહકોને પેટ્રોલ વાહન લેવા મજબૂર થવું પડી રહ્યું છે. પહેલા કોઈ પણ એન્જીન ધરાવતા વાહનોમાં કંપની સિવાય બજારમાં ખાનગી કંપનીઓની CNG કીટો માત્ર 40 હજારમાં ફિટ થતી હતી. પરંતુ સરકારે હવે એપ્રુવલ આપવાનું બંધ કરી દેતા આ વ્યવસાય સાથે સંકળાયેલા સેંકડો લોકો બેકાર બન્યા છે. તો બીજી તરફ વાહન ચાલકોને નાછૂટકે પેટ્રોલ વાહન ફેરવવા મજબૂર બનવું પડ્યું છે. સરકાર દ્વારા 2020 પછીના વાહનોમાં ખાનગી કંપનીઓ પાસેથી CNG કીટ ફિટ કરવાના અધિકારો છીનવી લેતા CNG કીટફિટિંગનો ધંધો પડી ભાંગવા પામ્યો છે. ત્યારે તત્કાલ સરકાર આ દિશામાં વિચારે તેવી વાહન ચાલકો અને ખાનગી કંપનીઓની કીટ ફિટ કરતી કંપનીઓના માલિકોની માંગ ઉઠવા પામી છે.