ટેકનોલોજી / વનપ્લસે રજુ કર્યો કેમેરા અદ્રશ્ય થઇ શકે તેવો કન્સેપ્ટ ફોન

આ ફોનની પાછળની પેનલ પરના કેમરા સેટઅપ પર ડાર્ક ગ્લાસ છે. જયારે કેમેરા ઓન ન હોય ત્યારે  તે ડાર્ક રહે છે અને તેના લેન્સ દેખાતા નથી. પરંતુ જયારે કેમેરા ઓન થાય ત્યારે તે ટ્રાન્સપરન્ટ એટલે કે પારદર્શક બની જાય છે. વનપ્લસની આ નવી ટેકનોલોજીએ સીઇએસમા ખાસ્સું આકર્ષણ જગાવ્યું છે. વનપ્લસે આ ફિચરને ઇન્વિસિબલ કેમેરા ડિઝાઇન નામ આપ્યું છે. આ ફોનને ડિઝાઇન કરવા માટે કંપનીએ ઓટોમોબાઈલ કંપની મેકલેરેન સાથે પણ ભાગીદારી કરી છે.

કંપનીનું કહેવું છે કે મેક્લેરેન 720 એસ સ્પોર્ટ્સ કારની ડિઝાઇનમાં આ ટેકનિકનો ઉપયોગ કરવામાં આવ્યો છે. આ કારની ગ્લાસ છત પેનલ બહારના પ્રકાશના આધારે ડાર્ક બને છે કે પારદર્શક બની જાય છે. વનપ્લસે તેમાં કલર-શિફ્ટિંગ ગ્લાસ ટેક્નોલોજી નો ઉપયોગ કર્યો છે. આ ટેક્નોલોજી સાથે આવનાર વિશ્વનો આ પહેલો સ્માર્ટફોન છે. આ ટેકનીકનો ઉપયોગ કેટલીક લકઝુરિયસ કાર અને વિમાનોમાં લગાવેલા ગ્લાસમાં થાય છે. કેમરાની ગ્લાસ પેનલને ડાર્ક કે પારદર્શક બનાવામાં માત્ર 0.7 સેકંડનો સમય લાગે છે. કેમેરા એપ્લિકેશન ખોલવામાં જેટલો સમય લે છે તેના કરતા પણ આ સમય ઓછો છે. આ માટે બેટરીના કરન્ટનો ઉપયોગ કરવામાં આવે છે. જોકે વનપ્લસનો દાવો છે કે આ પ્રોસેસમાં બહુ ઓછો પાવર વપરાય છે. જોકે વન પ્લસે હજુ એ સ્પષ્ટતા નથી કરી કે આ નવી ડિઝાઇનના ફોનનું માસ પ્રોડકશન કયારે કરાશે?