તહેવારો નજીક આવતા જ શહેરોમાં આરોગ્ય વિભાગ એલર્ટ થઇ ગયું છે. ત્યારે રાજકોટમાં આરોગ્ય વિભાગે ઝડપેલા ઘીના જથ્થાનો ચોંકાવનારો રિપોર્ટ સામે આવ્યો છે.
તહેવારો નજીક આવતા આરોગ્ય વિભાગ એલર્ટ
સામે આવ્યો ઘીના જથ્થાનો ચોંકાવનારો રિપોર્ટ
ભેળસેળ સામે આવતા વેપારીને સજા અને દંડ
રાજકોટમાં શહેરના બજરંગવાડી મેઈન રોડ પર સહજ કોમ્પ્લેક્સમાં અંશ ફૂટવેર નામની દુકાનમાં ચેકિંગ કરતા આરોગ્ય વિભાગને ઘીનો જથ્થો મળી આવ્યો હતો. ત્યારે આરોગ્ય વિભાગે ઝડપેલા આ ઘીના જથ્થાનો રિપોર્ટ ચોંકાવનારો સામે આવ્યો છે. કારણ કે રિપોર્ટમાં ઘીમાં હાનિકારક કેમિકલ હોવાનો ખુલાસો થયો છે. ઘીના જથ્થાના સેમ્પલ લઇને તેને તપાસ માટે મોકલાયા હતા. જેમાં ઘીના સેમ્પલમાં ભેળસેળ સામે આવતા વેપારીને સજા અને દંડ ફટકારવામાં આવ્યો છે.
ઘીમાં ભેળસેળ સામે આવતા વેપારીને એક મહિનાની સજા અને 3 હજારનો દંડ
અંશ ફૂટવેર નામની દુકાનના વેપારી શૈલેષ મહેતાને ઘીમાં ભેળસેળ સામે આવતા એક મહિનાની સજા અને 3 હજારનો દંડ ફટકારવામાં આવ્યો છે. આરોગ્ય વિભાગે શહેરના હુડકો વિસ્તારમાંથી પણ અખાદ્ય જથ્થો ઝડપ્યો હતો. જેમાં 12 કિલો વાસી અખાદ્ય મીઠાઈના જથ્થાનો આરોગ્ય વિભાગે નાશ કર્યો હતો.
મહત્વનું છે કે, મનપા દ્વારા તહેવારો દરમિયાન ફૂડ શાખાનું ચેકીંગ શહેરના અલગ-અલગ વિસ્તારોમાં કરવામાં આવી રહ્યું છે. જે અન્વયે મીઠાઇના ત્રણ નમૂના લેવામાં આવ્યા છે. જ્યારે કોઠારીયા રોડ ખાતેની શ્રી નવરંગ ડેરી ફાર્મ ખાતેથી 12 કિલો વાસી તથા અખાદ્ય મીઠાઇઓનો સ્થળ ઉપર જ નાશ કરવામાં આવેલો. ઉપરાંત ડાયાબીટીસ માટેની ફાકી તથા મિકસ દૂધ (લુઝ) ના બે નમૂના ફેઇલ જાહેર થયા હતા.
14 ફૂડ બિઝનેસ ઓપરેટરની ચકાસણી કરવામાં આવી
નોંધનીય છે કે, દિવાળીના તહેવારોમાં મીઠાઈનું વ્યાપક પ્રમાણમાં વેચાણ થતું હોવાના કારણે રાજકોટ મનપાના ફૂડ વિભાગ દ્વારા મીઠાઈ તથા ફરસાણનું વેચાણ કરતા સ્થળોનું ચેકિંગ કરવામાં આવેલુંય જેમાં ફૂડ વિભાગની ટીમ દ્વારા ફૂડ સેફટી ઓન વ્હીલ્સ વાન સાથે શહેરના વિજયનગર વિસ્તારમાં આવેલ ખાણી-પીણીના ધંધાર્થીઓની ચકાસણી હાથ ધરવામાં આવેલી. જેમાં કુલ 14 ફુડ બિઝનેસ ઓપરેટરની ચકાસણી કરવામાં આવેલી. જેમાં દૂધ, ડેરી પ્રોડક્ટ, ઠંડાપીણાં, મસાલા અને બેકરી પ્રોડક્ટ તથા ખાદ્ય તેલના કુલ 17 નમૂનાનું સ્થળ પર જ ચેકિંગ કરવામાં આવેલું. આ સાથે સ્થળ પર જ 5 પેઢીને લાઇસન્સ બાબતે નોટિસ પણ ફટકારવામાં આવી.