નોકિયાના સ્માર્ટફોન બનાવતી HMD ગ્લોબલે માર્કેટમાં તેનો લેટેસ્ટ C1 Plus સ્માર્ટફોન લોન્ચ કર્યો છે.
આ એક એન્ટ્રી લેવલ સ્માર્ટફોન છે. કંપનીએ ગયા વર્ષે રજૂ કરેલા સૌથી સસ્તા સ્માર્ટફોન C1નું આ અપગ્રેડેડ વર્ઝન છે. પ્લસ વેરિયન્ટમાં કંપની અપગ્રેડેડ સોફ્ટવેર અને હાર્ડવેર ઓફર કરે છે.
નોકિયાના ફોનની કિંમત 69 યુરો (આશરે 6170 રૂપિયા) છે. કંપની આ સ્માર્ટફોનને કયા બજારોમાં ઉપલબ્ધ કરવા જઈ રહી છે તેની કોઈ માહિતી હજુ સુધી આપવામાં આવી નથી. અહેવાલો અનુસાર, નોકિયા C1 પ્લસ પહેલા લેટિન અમેરિકાના વપરાશકર્તાઓ માટે ઉપલબ્ધ કરાવવામાં આવશે. કંપની ટૂંક સમયમાં તેને ભારત સહિત અન્ય દેશોમાં ઉપલબ્ધ કરાવશે.
નોકિયા C1 પ્લસના ફીચર્સ અને સ્પેસિફિકેશન્સ
ફોનમાં 5.45 ઇંચનો HD+ ઈન સેલ ડિસ્પ્લે આપવામાં આવ્યો છે. 4G નેટવર્ક કનેક્ટિવિટી સાથે આ ફોનમાં આસ્પેક્ટ રેશિયો 18:9નો છે. ડિવાઈઝની બિલ્ડ ક્વોલિટી ખૂબ સરસ છે અને તેને પોલીકાર્બોનેટ બોડી વડે મજબૂત કરવામાં આવ્યો છે.
1 GB રેમ અને 16 GB ઇન્ટરનલ સ્ટોરેજ સાથેના આ સ્માર્ટફોનમાં 1.4 GHzનું ક્વૉડ કોર પ્રોસેસર આપવામાં આવ્યું છે. ફોનની મેમરીને માઈક્રો SD કાર્ડની મદદથી 128 GB સુધી વધારી શકાય છે. OSમાં આ ફોનમાં એન્ડ્રોઇડ 10 ગો એડિશન આપવામાં આવ્યું છે. આ OSથી ફોનમાં એટલો સ્ટોરેજ મળે છે કે આરામથી 3000 ગીતો અથવા 13 કલાક સુધીના HD વીડિયોઝ જોઈ શકાય છે.
ફોટોગ્રાફી માટે નોકિયા C1 પ્લસમાં રિયરમાં ફ્લેશ અને HDR ઇમેજિન્ગ સપોર્ટની સાથે 5 મેગા પિક્સલનો કેમેરા આપવામાં આવ્યો છે. સેલ્ફી માટે આ ફોનમાં 5 મેગા પિક્સલનો કેમેરા આપવામાં આવ્યો છે.
ફોનમાં પાવર માટે 2500mAhની બેટરી આપવામાં આવી છે. 5V/1A ચાર્જર સાથે આ બેટરી એક દિવસનો બેકઅપ આપે છે. કંપનીએ કહ્યું કે ફોનનું સેલ થોડા સમયમાં શરૂ થઇ જશે.