ઉજવણી / રાજ્યભરમાં થર્ટી ફર્સ્ટની રંગારંગ ઉજવણી શરૂ, અનિચ્છનીય બનાવ ના બને તે માટે પોલીસ એક્શનમાં

• પોલીસ દ્વારા સુરક્ષાને લઇને ખાસ એકશન પ્લાન તૈયાર કરાયો
• આ વર્ષે પોલીસે ૩૧ જગ્યાએ પાર્ટી આયોજન કરવા માટે મંજૂરી આપી છે
• મહિલા પોલીસ સહિત, ક્રાઈમ બ્રાન્ચ એસ.ઓ.જી અને ૫૦૦ જેટલા ટ્રાફિક જવાનોને તૈનાત કરાયા

આ વર્ષે પોલીસે ૩૧ જગ્યાએ પાર્ટી આયોજન કરવા માટે મંજૂરી આપી છે. તો  મહિલા પોલીસ સહિત, ક્રાઈમ બ્રાન્ચ એસ.ઓ.જી અને ૫૦૦ જેટલા ટ્રાફિક જવાનોને તૈનાત કરાયા છે.
અમદાવાદમાં થર્ટી ફસ્ટને લઇને વિશેષ મહત્વ હોય છે. જેથી સુરક્ષાને લઇને સઘન બંદોબસ્ત કરાયો છે જેમા શહેર પોલીસ અને મહિલા પોલીસની ટીમ સહિત ક્રાઇમ બ્રાન્ચ, SOG ક્રાઇમ પેટ્રોલિંગ પણ વોચ રાખશે. ખાસ કરીને ભીડ વાળી જગ્યા પર કોઇ વિખુટું પડી જાય તો તેની માટે મે આઇ હેલ્પ યુ લખેલા ખાસ હેલ્પ ડેસ્ક મૂકવામાં આવશે. 

આ ઉપરાંત પાર્ટી પ્લોટ, હોટેલ, ફાર્મ હાઉસ સહિત નવા વર્ષની ઉજવણી કરનારાં સ્થળો પર સુરક્ષા વ્યવસ્થા પાર્કિંગ તેમજ પાર્ટી સમયસર પૂર્ણ થાય તેનું ધ્યાન રાખવામાં આવશે. તો નશાખોરોને તેમજ બુટલેગરોની પ્રવૃત્તિ પર ખાનગી વોચ રાખવા પણ ક્રાઇમ બ્રાન્ચે ખાસ એકશન પ્લાન તૈયાર કર્યો છે. જેમાં શહેરમાં લગાવેલા ૧૦૦૦ સીસીટીવીથી વોચ રાખવામાં આવશે. 

શહેરના તમામ એન્ટ્રી એક્ઝિટ પોઇન્ટ પર નાકાબંધી કરવામાં આવશે. રોમિયોને પકડવા માટે સી ટીમ તેમજ એન્ટી રોમિયો સ્કવોડ તૈનાત કરાઇ છે. તેમજ ૩૦૦ જેટલાં બ્રેથ એનેલાઈઝર સાથે પોલીસ શહેરમાં ચેકિંગ કરશે જેમાં મહિલાઓનું પણ ચેકિંગ કરવામાં આવશે. આ ઉપરાંત ૮૫ પી. સી.આર રાતભર પેટ્રોલિંગ કરશે.

હોટેલ અને ગેસ્ટહાઉસમાં પીનાક સોફ્ટવેરની મદદથી ગતિવિધિઓ પર નજર રાખવામાં આવશે. એસજી હાઈવે, કાંકરિયા તેમજ સીજી રોડ પર બોંબ ડિસ્પોઝલ સ્કવોડ દ્વારા પણ ચેકીંગ કરાશે.

નવા વર્ષની ઉજવણીમાં ફટાકડા પણ ફોડાતા હોય છે. જેને લઈ લોકોમાં નાસભાગ આગ લાગવાના અને દાઝવાના બનાવ બનવાની પણ શક્યતા રહેલી હોય છે. આવા બનાવો રોકવા માટે સંવેદનશીલ પોઈન્ટો ઉપર બંદોબસ્ત ગોઠવી સઘન પેટ્રોલિંગ પણ કરાય તેવી વ્યવસ્થા ગોઠવાઇ છે. તો બીજી તરફ દારૂ ઢીંચીને ડી.જે.પાર્ટીમાં આવેલા લોકો પર નજર રાખવા માટે યંગ પોલીસ કર્મચારીઓ જશે.