અમેરિકાના લાસવેગાસમાં તા-8 જાન્યુઆરીથી વિશ્વનો સૌથી મોટો કન્ઝયુમર ઇલેક્ટ્રોનિક્સ ફેર (સીઈએસ -2020) શરુ થઇ રહી છે. તેમાં અનેક કંપનીઓ તેમની ઇનોવેટિવ પ્રોડકટસ રજુ કરશે. આ વર્ષે સીઈએસમાં, 5 જી કનેક્ટિવિટી, આર્ટિફિશિયલ ઇન્ટેલિજન્સ, સ્માર્ટ હોમ પ્રોડક્ટ્સ તેમજ રોબોટ પણ આકર્ષણનું કેન્દ્ર રહેશે. સીઇએસમાં રોજિંદા કામમાં મદદ કરે તેવા રોબોટ રજુ થશે. જ્યારે કેટલાક રોબોટ્સ એવા છે જે લોકોની સાથે વાતચીત કરીને હતાશા જેવી પરિસ્થિતિને દૂર કરવામાં મદદ કરશે.
ચીનની કંપની પુડુટેકનું બૈલાબોટ રોબોટ રજુ કરશે. જેને ખાસ હોટલોમાં ભોજન પીરસવા માટે તૈયાર કરવામાં આવ્યો છે. તેની વિશેષતા એ છે કે તે કોઇ તેની સાથે છેડછાડ કરશે તો ગુસ્સો પણ કરશે. આ રોબોટ એકની ઉપર એક ચાર ટ્રેમાં 10 કિલો સુધીના વજનની વાનગીઓ લાવી શકશે. આ રોબોટને દેખાવમાં બિલાડી જેવો બનાવાયો છે. વાનગી ટેબલ પર લઈ ગયા પછી, તે બિલાડીની જેમ અવાજ કરશે જેથી ગ્રાહકો તેમની વાનગી લઇ શકે. ચીનની જ કંપની યુબીટેક માણસની જેમ હાલતો-ચાલતો રોબોટ રજુ કરશે. તે વિવિધ યોગના પોઝ પણ બનાવી શકે છે. આર્ટિફિશિયલ ઇન્ટેલિજન્સથી સજ્જ આ રોબોટ પણ આસાનીથી ઘરના નાનામોટા કામમાં મદદ કરી શકે છે. તે ભારે સામાન લઇને સીડી પર ચડી શકે છે. આ સિવાય તે કારને ધક્કો મારવાનું,, ડ્રોઇંગ કરવાનું અને અને ગ્લાસ ભરવાનું પણ કામ કરે છે. નોર્વેજીયન સ્ટાર્ટ-અપ કંપની વ્હીલ મી તેનું જીનિયસ રોબોટિક વ્હીલ રજૂ કરશે. તે વોઇસ કમાન્ડ ફિચરથી સજ્જ્ છે. કંપનીએ કહ્યું કે તેની મદદથી યુઝર્સ ઘરના ભારે ફર્નિચરને બોલીને ઇચ્છિત સ્થળે ખસેડી શકશે. એપ્લિકેશનની મદદથી પણ તેને કન્ટ્રોલ કરી શકાય છે.
કંપની હાલમાં આ શોમાં તેનું પ્રોટોટાઇપ મોડેલ રજૂ કરશે જે કદમાં મોટું હશે. કંપનીનું કહેવું છે કે તેનું પ્રોડકશન વર્ઝન ખૂબ કોમ્પેક્ટ હશે. સ્ટાર્ટઅપ કંપની પિકનીક સીઇએસમાં પિઝા મેકિંગ રોબોટ રજૂ કરશે. તે એક કલાકમાં 12 ઇંચના 300 પિઝા અને 18 ઇંચના 180 પિઝા તૈયાર કરી શકશે.એપ્લિકેશનની મદદથી દરેક પીઝાના ટોપિંગ્સને કસ્ટમાઇઝ કરી શકાય છે. ટૂંક સમયમાં તેનો ઉપયોગ સેન્ડવીચ અને સલાડ બનાવવા માટે પણ કરવામાં આવશે. ચીનની રોબોટિક કંપની એલિફન્ટ પણ તેની રોબોટ બિલાડી માર્સકેટ રજુ કરશે. કંપનીનો દાવો છે કે તે વિશ્વની પ્રથમ બાયોનિક પેટ(પાળતું પ્રાણી) છે. તે સાચી બિલાડીઓની જેમ વર્તે છે.આ રોબોટ બિલાડી તેના માલિકનો સ્પર્શ અને અવાજને ઓળખીને પ્રતિભાવ આપે છે. તે રમકડા સાથે અને સાચી બિલાડીઓ સાથે પણ રમી શકે છે.