કાઠમાંડુ / ભારતને આંખો દેખાડતા નેપાળી PM વિરુદ્ધ 'પ્રચંડ' વિદ્રોહ, સત્તા ડામાડોળ

• કેપી શર્મા ઓલીની પાર્ટીમાં વિદ્રોહ 
• નેતાઓમાં ભારે અસંતોષના કારણે રાજીનામાંની માગ ઉઠી 
• ચીને નેપાળની ધરતી પર જ અતિક્રમણ શરુ કર્યું 

ભારત સાથે સરહદ પર વિવાદ કરવા ધમપછાડા કરી રહેલા નેપાળી વડાપ્રધાન કે પી શર્મા ઓલીનું તેમની પાર્ટીમાં જ કંઈ ચાલતું નથી. પાર્ટીની અંદર જ તેઓ મોટા નેતાઓના નિશાને આવી ગયા છે. બુધવારે પાર્ટીમાં થયેલ બેઠકમાં કે પી શર્મા ઓલી અને પાર્ટી અધ્યક્ષ પુષ્પ કમળ દહલ પ્રચંડ સામસામે આવી ગયા. નોંધનીય છે કે પ્રચંડ બે વાર વડાપ્રધાન રહી ચુક્યા છે. નેપાળની સત્તારૂઢ પાર્ટીનાં અધ્યક્ષ પ્રચંડે ચેતવણી આપી છે કે અરાજકતાની પરિસ્થિતિના કારણે પાર્ટી વિખેરાઈ શકે છે.

ઓલી પર આરોપ લાગ્યો છે કે તે પાર્ટી હાઈજેક કરી રહ્યા છે અને તાનાશાહીથી સરકાર ચલાવી રહ્યા છે. કેપી શર્માએ કહ્યું કે દેશમાં સમાજવાદની સ્થાપના અને રાષ્ટ્રવાદની સ્થાપનાનાં પ્રયત્નો છતાં પાર્ટીમાં તેના વખાણ થઇ રહ્યા નથી. જેના પર જવાબ આપતા કહ્યું કે મને અપમાનિત કરીને તમે એવું ન સમજશો કે તમારું કદ મોટું થઇ ગયું છે. પ્રચંડે કહ્યું કે પાર્ટીમાં જે પ્રતિબદ્ધતાઓ નક્કી કરવામાં આવી હતી તમે તેનું સન્માન નથી કરી રહ્યા. તમે તમારા અહંકારનું પ્રદર્શન કરી રહ્યા છો અને પાર્ટી વ્યવસ્થાને નકારી રહ્યા છો. જો આ જ પરિસ્થિતિ રહેશે તો પાર્ટી વિખેરાઈ જશે. 

નોંધનીય છે કે ચીનની સોડમાં આવીને ભારતને આંખ દેખાડતા નેપાળે તો જાણે પોતે જ પોતાના પગ પર કુહાડી મારી લીધી છે કારણ કે ચીન જ હવે નેપાળની જમીન પર અતિક્રમણ કરી રહ્યું છે. અહેવાલો મુજબ ચીને નેપાળની જમીન પર પોતાનું પ્રભુત્વ જમાવી લીધું છે જેના કારણે નેપાળની જનતામાં પણ રોષ જોવા મળી રહ્યો છે.