આરોપ / IPLના આ પૂર્વ ખેલાડીની પોલીસે કરી ધરપકડ, સગીરા સાથે બળાત્કાર કરવાનો છે આરોપ

• નેપાળના ક્રિકેટર સંદીપ લામિછાનેની ધરપકડ
• તેમના પર બળાત્કાર ગુજારવા બદલનો આરોપ
• પોલીસે ધરપકડ કરીને કસ્ટડીમાં લીધો છે

નેપાળ ક્રિકેટ ટીમના પૂર્વ કેપ્ટન અને આઇપીએલમાં રમી ચૂકેલ ક્રિકેટર સંદીપ લામિછાનેની મુશ્કેલીઓ વધી ગઇ છે. સંદીપ લામિછાને સગીર યુવતી પર બળાત્કાર ગુજારવા બદલ ઘરે પરત ફરતાની સાથે જ તેની ધરપકડ કરવામાં આવી હતી. સંદીપની આજે એટલે કે ગુરુવારે સવારે કાઠમંડુના ત્રિભુવન ઈન્ટરનેશનલ એરપોર્ટ પર પોલીસે ધરપકડ કરી હતી અને તેને પોતાની કસ્ટડીમાં લઈ લીધો હતો. સંદીપે પોતે ફેસબુક પોસ્ટ દ્વારા માહિતી આપી હતી કે તે આજે સવારે ઘરે પરત ફરશે.

17 વર્ષની સગીરા પર રેપ કર્યાનો આરોપ 
હકીકતમાં નેપાળી ક્રિકેટર સંદીપ લામિછાને પર 17 વર્ષની છોકરીએ કાઠમંડુની એક હોટલના રૂમમાં રેપ કરવાનો આરોપ લગાવ્યો છે. ગૌશાળા મહાનગર પોલીસ સર્કલમાં નોંધાયેલી એફઆઈઆરમાં કિશોરીએ આરોપ લગાવ્યો છે કે 22 વર્ષીય લામિછાનેએ ઓગસ્ટમાં એક હોટલમાં તેની સાથે બળાત્કાર ગુજાર્યો હતો. ગૌશાળા પોલીસ સર્કલમાં નોંધાયેલા કેસ અનુસાર સંદીપ લામિછાને કથિત રીતે યુવતીને 21 ઓગસ્ટના રોજ કાઠમંડુ અને ભક્તપુરમાં વિવિધ સ્થળોએ લઈ ગયા હતા. એ જ રાત્રે કાઠમંડુની એક હોટલમાં તેના પર બળાત્કાર ગુજારવામાં આવ્યો હતો. સંદીપ લામિછાને નેપાળનો પહેલો એવો ખેલાડી છે કે જે ઇન્ડિયન પ્રીમિયર લીગમાં રમે છે. તેણે 2018 માં દિલ્હી કેપિટલ્સ ફ્રેન્ચાઇઝી માટે પદાર્પણ કરીને ઘણી નામના બનાવી હતી.

Nepal | Former Nepali National team captain Sandeep Lamichhane, accused of raping a minor, arrested & taken into custody by police at Tribhuwan International Airport in Kathmandu https://t.co/IRkjcPPPvb pic.twitter.com/xF4f1LK0Ol

— ANI (@ANI) October 6, 2022

સંદીપે ફેસબુક પોસ્ટથી જાણકારી આપી હતી
ગુરુવારે સવારે દેશમાં પહોચતા પહેલા સંદીપ લામિછાનેએ ફેસબુક પર એક પોસ્ટ લખી હતી, "નેપાળમાં મારી જાતને પ્રસ્તુત કરવાની મારી નિષ્ઠાવાન પ્રતિબદ્ધતા માટે, હું કતાર એરવેઝથી કાઠમંડુના ત્રિભુવન આંતરરાષ્ટ્રીય એરપોર્ટ પર સવારે 10:00 વાગ્યે ઉતરાણ કરી રહ્યો છું. મને ખાતરી છે કે મને ન્યાય મળશે અને હું મારા પ્રિય દેશના નામ અને ખ્યાતિ માટે ટૂંક સમયમાં જ ક્રિકેટના મેદાન પર પાછો ફરીશ અને હું ઝડપથી ટ્રાયલની કામના કરું છું. હું તપાસના તમામ તબક્કે સંપૂર્ણ સહકાર આપીશ અને મારી નિર્દોષતા સાબિત કરવા કાનૂની લડત લડીશ. ન્યાયનો વિજય થશે."

સંદીપ પર ધરપકડનું વોરંટ જારી થયું હતું
કાઠમંડુ પોલીસના પ્રવક્તા દિનેશ મૈનાલીએ કહ્યું હતું કે જિલ્લા અદાલતે સંદીપ લામિછાને સામે વધુ તપાસ માટે ધરપકડનું વોરંટ જારી કર્યું છે. જો સંદીપ નેપાળમાં નહીં હોય તો કાઠમંડુ પોલીસ વિદેશી એજન્સીઓ અથવા ઇન્ટરપોલની મદદ લેશે, એમ પોલીસે બુધવારે જણાવ્યું હતું. સંદીપને ગત વર્ષે નેપાળની ક્રિકેટ ટીમનો કેપ્ટન બનાવવામાં આવ્યો હતો.