દૂષણ સામે લડાઈ / નવસારીના શિતલ આંટીના ડ્રગ્સ ડિલિવરી કેસમાં મોટો ખુલાસો, કામરેજથી 701 કિલો ઝડપાયો ગાંજો, કચ્છમાં પણ કાર્યવાહી

• કચ્છથી ચરસના પેકેટ મળી આવ્યા
• કામરેજથી 701 કિલોનો ગાંજો ઝડપ્યો
• મુખ્ય આરોપીઓ સુધી પહોંચવામાં પોલીસનો પન્નો ટૂંકો?

ગુજરાતના અનેક શહેરોમાંથી ડ્રગ્સ સહિતના નશીલા પદાર્થો ઝડપાવાનો સીલસિલો અટકવાનું નામ જ લેતો નથી. પોલીસ અને સુરક્ષા એજન્સીઓના સતર્કતાના દાવા વચ્ચે પણ અન્ય દેશ-રાજ્યની સરહદમાંથી ગુજરાતમાં ડ્રગ્સનો જથ્થો કેમ ઘૂસી જાય છે તે પણ પ્રશ્ન છે. તેવામાં આજે ફરી એક વખત વિવિધ શહેરોમાં આ મામલે કાર્યવાહી કરી મોટા પ્રમાણમાં ડ્રગ્સનો જથ્થો ઝડપી પાડવામાં આવ્યો છે. જેમાં કચ્છના દરિયાકાંઠેથી ફરી વાર ચરસના 2 બિનવારસી પેકેટ મળી આવ્યા હતા. તો સુરતના કામરેજથી SOGએ 701 કિલો ગાંજાનો જથ્થો ઝડપી 80 લાખનો મુદ્દામાલ કબ્જે કર્યો છે. મુંબઈ હાઈવે તરફ જતી ટ્રકમાંથી આ ગાંજો ઝડપાયો છે. બીજી તરફ નવસારીના જલાલપોરમાંથી મળી આવેલા ચરસ મામલે પણ તપાસ માટે SOGએ નવી ટીમ બનાવી છે. જેમાં શિતલ નામની મહિલા દ્વારા પડોશીના સરનામાં પર કુરીયર મારફતે ડ્રગ્સ મંગાવવામાં આવતુ હતુ. જેમાં આ મહિલા દિલ્લીથી ડ્રગ્સ મંગાવી સુરત પહોંચાડતી હોવાનુ પણ સામે આવ્યુ છે.

કચ્છના દરિયાકાંઠેથી ચરસના 2 બિનવારસી પેકેટ મળી આવ્યા
કચ્છમાંથી ફરી એક વખત ચરસનો જથ્થો ઝડપાયો છે. નેવી ઇન્ટેલિજન્સ અને પશ્ચિમ કચ્છ પોલીસ સ્ટાફે સંયુક્ત ઓપરેશન પાર મોટ પીર બેટ નજીક દરિયાકાંઠેથી ચરસના 2 બિનવારસી પેકેટ ઝડપી લીધા હતા. પોલીસ અને સુરક્ષા એજન્સીઓએ આશરે 35 લાખની કિંમતનો જથ્થો જપ્ત કરી વધુ તપાસ આરંભી છે. ફરી એક વખત ચરસનો જથ્થો ઝડપાતા એજન્સીઓ સતર્ક થઇ ગઇ છે. ઉલ્લેખનીય છે કે અત્યાર સુધીમાં કચ્છના દરિયાકાંઠાથી 4500થી વધુ ચરસના પેકેટ પકડાયા છે.

સુરત નજીક ટ્રકમાંથી ઝડપાયો 701 કિલો ગાંજો
વધુમાં સુરત એસઓજીએ મસમોટા નશાના કાળા કારોબારનો પર્દાફાસ કર્યો હતો. પોલીસે સુરત જિલ્લાના કામરેજના ઉંભેર ગામે બાતમીને આધારે દરોડો પડયો હતો. આ દરમિયન મુંબઈ હાઇવે તરફ જતી ટ્રક હોટલ મહાદેવના પાર્કિંગમાં ઉભી હતી તે સમયે ટ્રકની SOG પોલીસે તલાસી લીધી હતી. જેમાંથી આશરે  701 કિલો ગાંજાનો જથ્થો ઝડપાતા પોલીસ ચોંકી ઉઠી હતી. પોલીસે આશરે રૂ.70 લાખની કિંમતનો ગાંજાનો જથ્થો જપ્ત કર્યો હતો. જો કે આ મામલે પરિસ્થિતિ પારખી ટ્રકચાલક નાશી છૂટયો હતો. પોલીસે સમગ્ર મામલે નોંધ કરી આરોપી અને નશાના મૂળ સુધી પહોંચવા તપાસનો ધમધમાટ શરૂ કર્યો છે. 

નવસારી ચરસ પ્રકરણમાં પોલીસ પાસેથી તપાસ આંચકી લેવાઇ
આ ઉપરાંત નવસારી જિલ્લાના જલાલપોરના ધર્મનંદન એપાર્ટમેન્ટમાંથી પોલીસે ચરસ ઝડપી પાડ્યુ હતુ. શિતલ આંટી ઉર્ફે શાંતા સાંગાણીના નામે આવેલ પાર્સલમાંથી 80 ગ્રામ ચરસ ઝડપાયું હતું. આ પ્રકરણમાં પોલીસે પિતા - પુત્ર એમ બે આરોપીની પણ ધરપકડ કરી લીધી હતી. બાદમાં પોલીસે સાંગાણી પરિવારના લોકોની પણ ધરપકડ કરી હતી. જેમાં શિતલ સાંગાણી નામની મહિલા પડોશીઓના એડ્રેશ પર ચરસ મંગાવતી હતી. પોલીસની તપાસમાં સામે આવ્યુ છે કે, હિમાલચ પ્રદેશમાં રહેતો નીરવ પટેલ આ ચરસ પહોંચાડતો હતો. જેથી નવસારી પોલીસે હિમાચલ પ્રદેશ  દોડી જઈ નીરવ પટેલના ચરસના નેટવર્કની પણ તપાસ હાથ ધરી હતી. સમગ્ર પ્રકરણમાં પોલીસ પાસેથી તપાસ આંચકી લેવામાં આવી છે અને હવે સમગ્ર મામલાની તપાસ SOG દ્વારા કરવામાં આવશે. મહત્વનું છે કે શિતલ આંટી ચરસ પેડલર તરીકે નિરવ પટેલ માટે કામ કરતી હતી. શિતલને દિલ્લીની આરતી ચૌહાણ  ચરસ પહોંચાડતી હોવાનો પણ ધડાકો થયો હતો.  ચરસના આ જથ્થાને સુરત પંથકમાં જુદા જુદા સ્થળોએ પહોંચાડવા બદલ તગડો પગાર મળતો હતો. હવે સમગ્ર મામલાની તપાસ SOG દ્રારા કરવામાં આવશે. 

મુખ્ય આરોપીઓ સુધી પહોંચવામાં પોલીસનો પન્નો ટૂંકો કે ઈચ્છા શક્તિનો અભાવ છે? 
મહત્વનું છે કે જ્યારે કોઇ સ્થળેથી નશીલા દ્રવ્યોનો જથ્થો ઝડપાઈ છે ત્યારે પોલીસ કડક કાર્યવાહી સહિતના નિવેદનો આપી વાહવાહી લૂંટી લેતી હોય છે. ત્યારે સવાલએ પણ છે કે જો આરોપીઓ વિરુદ્ધ સખ્ત કાર્યવાહી કરવામાં આવી રહી છે તો આ દૂષણ અટકવાને બદલે વકરી કેમ રહ્યું છે? હાલ ગુજરાતને નશીલા પદાર્થોએ બરોબરનો ભરડો લીધો હોય તેમ છાસવારે અનેક શહેરોમાંથી નશીલા પદાર્થો ઝડપાઇ રહ્યા છે છતાં પોલીસ-સુરક્ષા એજન્સીઓ દ્વારા આ દૂષણના મૂળ સુધી પહોંચવાને બદલે સબસલામતીના દાવા કરવામાં આવી રહ્યા છે. ત્યારે પોલીસને ચેલેન્જ ફેંકતા આવા મુખ્ય આરોપીઓને પકડી પાડવામાં પોલીસનો પન્નો ટૂંકો પડી રહ્યો છે કે આકરી કામગીરી અંગે પોલીસની ઈચ્છા શક્તિનો અભાવ છે? તેવું લોકોમાં ચર્ચાઇ રહ્યું છે.