રોષ / મહાનગરોમાં મનપાનાં પ્રિ-મોન્સુન પ્લાનિંગનાં ધજાગરા, ઠેર ઠેર ખાડા અને પાણીનાં ભરાવાથી પબ્લિકમાં રોષ

• અમદાવાદ અને રાજકોટમાં વરસાદે મનપાના પ્રિ-મોનસૂન પ્લાનની પોલ ખોલી
• અમદાવાદ અને રાજકોટમાં ઠેર-ઠેર રોડ-રસ્તા ધોવાયા
• મનપાના અણઘડ વહીવટથી જનતા ત્રાહિમામ પોકારી ઉઠી

રાજ્યમાં છેલ્લા 5 દિવસથી સતત મેઘરાજા તોફાની બેટિંગ કરી રહ્યાં  છે. જેને લઈને સમગ્ર રાજ્યની ધરાને વરસાદી પાણીથી તરબતોડ કરી દીધી છે. ગત રવિવારે  અમદાવાદમાં અને ગત રોજ રાજકોટમાં ખાબકેલા ધોધમાર વરસાદે મહાનગર પાલિકાની પોલી ખોલી દીધી છે. ભારે વરસાદના કારણે શહેરોમાં ઠેર-ઠેર વરસાદી પાણી ભરાઈ જતાં લોકોને ભારે હાલાંકીનો સામનો કરવોનો વારો આવ્યો છે.  

AMCના અણઘડ વહીવટથી જનતા ત્રાહિમામ પોકારી ઉઠી

વાત કરીએ અમદાવાદની તો ગત રવિવારે મોડી રાત્રે ધોધમાર વરસાદ વરસતાં શહેરમાં ઠેર-ઠેર પાણી ભરાયા હતાં. જેને લઈને લોકોને ભારે હાલાંકીનો સામનો કરવનો વખત આવ્યો હતો. બીજી તરફ આ વરસાદે AMCના પ્રિ-મોનસૂન પ્લાનની પોલ ખોલી દીધી છે. અમદાવાદ શહેરમાં ધોધમાર વરસાદ વરસતાં ઠેર-ઠેર રોડ-રસ્તા ધોવાણ થયું છે. જેમાં ગુરૂકુલથી વિશ્રામનગર જતા માર્ગ પર ઠેર-ઠેર ખાડા પડી ગયા છે. ઉલ્લેખનીય છે કે, ચોમાસાની શરૂઆતમાં જ AMCએ પ્રિ-મોનસૂનના નામે રોડ પર ખોદકામ કર્યું હતું. આમ AMCના અણઘડ વહીવટથી જનતા ત્રાહિમામ પોકારી ઉઠી છે.

મહાલક્ષ્મી ચાર રસ્તા પાસે  વરસાદાના કારણે મસ મોટો ભુવો પડ્યો

આ તરફ અમદાવાદના મહાલક્ષ્મી ચાર રસ્તા પાસે  વરસાદાના કારણે મસ મોટો ભુવો પડ્યો છે. જેને લઈને તંત્ર મહાલક્ષ્મીથી પરિમલ ગાર્ડન સુધીનો રસ્તો તાબડતોબ રસ્તો બંધ કર્યો છે. આમ એક તરફનો રોડ બેસી જતા વાહનચાલકોને ભારે પરેશાનીનું ભોગ બનવું પડ્યું છે. 

AMCની પ્રિ-મોન્સૂન કામગીરીની ખુલી પોલ

આમ, કોઈ દેશી કે વિદેશી નેતાના આગમન વખતે આ મેગાસિટીની સડકો વિદેશી સડકો જેવી બનાવી દેવાય છે અને અમદાવાદ શાંઘાઈ બની રહ્યું છે તેવું દર્શાવવા દરેક આંખમાં ભૂરકી છંટાય છે. પરંતુ ચોમાસાના પાણી આપણને એ ભાન કરાવી રહ્યા છે કે, આપણે વિકાસની ઈમારતોમાં બેસીને જે અમદાવાદને જોઈ રહ્યા છીએ તેના પાયાને સામાન્ય વરસાદ પણ હચમચાવી નાખે તેમ છે.  આવી વ્યવસ્થા માટે જવાબદાર કોણ છે? તે સવાલનો જવાબ  શોધવાની આ મોટી તક છે.

રાજકોટ શહેર કોંગ્રેસે મ્યુનિસિપલ કમિશનરને પાઠવ્યું આવેદન 

બીજી તરફ રાજકોટમાં ભારે વરસાદને કારણે શહેરના અનેક વિસ્તારોમાં પાણી ભરાવવાની સમસ્યા સર્જાઈ હતી. જેને કારણે રાજકોટ શહેર કોંગ્રેસે મ્યુનિસિપલ કમિશનરને આવેદન પાઠવ્યું છે. શહેર કોંગ્રેસે રાત્રીના સમયે મ્યુનિસિપલ કમિશનરના ઘરે પહોંચીને આવેદન પાઠવ્યું છે. જેમાં શહેરના વિવિધ વિસ્તારોમાં પાણી ભરાવવાની સમસ્યા થયાનો ઉલ્લેખ કરવામાં આવ્યો છે. સાથે જ કોંગ્રેસે રાજકોટ મહાનગરપાલિકાની પ્રિ-મોન્સૂન કામગીરી ફેઈલ થતાં વિરોધ પણ કર્યો હતો.