મુંબઇ ઇન્ડિયન્સે ઘાતક બોલિંગ કરીને રૂંવાડા અદ્ધર કરી દેતી ઇન્ડિયન પ્રીમિયર લીગ (આઇપીએલની) 12મી સીઝનના ફાઇનલ મુકાબલામાં ચેન્નાઇ સુપર કિંગ્સને 1 રનથી હરાવીને ચોથી વાર આઈપીએલ ટ્રોફી જીતવાનો રેકોર્ડ બનાવ્યો છે. મુંબઈ વિરુદ્ધ 150 રનનું લક્ષ્ય હાંસલ કરવા ઉતરેલી ચેન્નાઈની ટીમના શેન વોટ્સને સૌથી વધુ 80 રન બનાવ્યા હતા, પરંતુ ટીમને જીતાડવામાં તેઓ નાકામ રહ્યા હતા.
મુંબઈનો કેપ્ટન રોહિત શર્મા પાંચ ખિતાબ જીતનારો પહેલો ખેલાડી બન્યા છે. 2009માં તેઓ ડેક્કન ચાર્જર્સનો હિસ્સો હતા. હૈદ્રાબાદના રાજીવ ગાંધી ઇન્ટરનેશનલ સ્ટેડિયમમાં રમાયેલ ફાઇનલ મુકાબલામાં પહેલી બેટિંગ કરી મુંબઇ ઇન્ડિયન્સની ટીમે 8 વિકેટ ગુમાવી 149 રન બનાવ્યા. જવાબમાં ચેન્નાઇ 148 રન બનાવીને માત્ર એક રનથી મુકાબલો હારી ગયું. તેની સાથે જ મુંબઇ ચાર વખત આઇપીએલનો ખિતાબ જીતનાર પહેલી ટીમ બની ગઇ છે.
ધોનીની ટીમ ચેન્નાઇની સામે 150 રનનું લક્ષ્ય હતું પરંતુ તેમની ટીમના શેન વોટસનના 59 બોલમાં 80 રન છતાંય 7 વિકેટ પર 148 રન જ બનાવી શકયું. ચેન્નાઇને છેલ્લી ઓવરમાં 9 રન જોઇતા હતા પરંતુ તેમાં તેમણે વોટસનની વિકેટ ગુમાવી અને મેચનું પરિણામ છેલ્લાં બોલ પર નીકળ્યું. જેમાં ચેન્નાઇને 2 રનની જરૂર હતી પરંતુ મલિંગાએ યૉર્કર પર શાર્દુલ ઠાકુરને એલબીડબલ્યુ આઉટ કરી દીધો.
જસપ્રીત બુમરાહ અને રાહુલ ચાહરની કસાયેલી બોલિંગ બાદ લસિથ મલિંગાની છેલ્લી ઓરની કમાલથી મુંબઇ ઇન્ડિયન્સે ઉતાર ચઢાવથી ભારે રોમાંચક ફાઇનલમાં ચેન્નાઇ સુપર કિંગ્સને 1 રનથી હરાવીને ચોથી વાર આઇપીએલ ચેમ્પિયન બનવાનું ગૌરવ પ્રાપ્ત કર્યું.
મુંબઇએ આની પહેલાં 2013, 2015, 2017માં ખિતાબ જીત્યો હતો. આમ એક વર્ષ છોડીને ખિતાબ જીતવાનો ક્રમ જાળવી રાખ્યો. તેણે 2013 અને 2015ની ફાઇનલમાં પણ ચેન્નાઇને હરાવ્યું હતું. મુંબઇની જીતમાં બોલર્સે અગત્યની ભૂમિકા નિભાવી. બુમરાહ અને ચાહર એ પોતાના ભાગની ચાર-ચાર ઓવરમાં 14-14 રન આપ્યા અને ક્રમશ: બે અને એક વિકેટ લીધી.
મિશેલ મૈકલેનઘન એ ચાર ઓવરમાં 24 રન આપ્યા. મુંબઇનું ક્ષેત્રરક્ષણ જોકે સારું નહોતું. એકલા વોટ્સનને જ ત્રણ જીવનદાન મળ્યું. ચેન્નાઇ સુપર કિંગ્સના દીપક ચાહરે મુંબઇને મોટો સ્કોર બનાવા દીધો નહોતો. તેણે 26 રન બનાવી ત્રણ વિકેટમાં સફળતા મેળવી. આ સિવાય ઇમરાન તાહિર (23 રન આપી બે) અને શાર્દુલ ઠાકુર (37 રન આપી બે) એ પણ સારી બોલિંગ કરી.