ભારતમાં પેટ્રોલ-ડીઝલની કિંમતો આસમાને પહોંચી છે ત્યારે કાચા તેલની આયાત મામલે ભારત સરકાર રણનીતિ બનાવી રહી છે.
સાઉદી અરબને મોટો ઝટકો આપશે ભારત
ખાડી દેશો પર તેલ માટેની નિર્ભરતા ઘટાડાશે
મોદી સરકારે બનાવી રણનીતિ
સાઉદી અરેબિયાના ક્રાઉન પ્રિન્સ અને પીએમ મોદી વચ્ચે થોડા દિવસ પહેલા જ ટેલિફોનિક ચર્ચા થઈ હતી. બંને નેતાઑએ દેશના સંબંધોને મજબૂત કરવા માટે સંકલ્પ લીધો હતો.
કેમ તણાવ વધ્યો?
ભારતમાં પેટ્રોલ અને ડીઝલની કિંમતોમાં જોરદાર ઉછાળો જોવા મળ્યો છે. છેલ્લા બે ત્રણ સપ્તાહથી કિંમતો સ્થિર થઈ છે પણ ખૂબ વધારે છે, ઘણા શહેરોમાં પેટ્રોલ 100ને પાર થઈ ગયું છે ત્યારે કાચા તેલના મુદ્દામાં સાઉદી અરબે ભારતને જોરદાર ઝટકો આપ્યો હતો જે બાદ સંબંધોમાં તણાવ આવ્યો છે. ગયા મહિને ભારતે અપીલ કરી હતી કે કાચા તેલનું ઉત્પાદન વધારવું જોઈએ જેથી ઈંધણની કિંમતોમાં ઘટાડો આવી શકે. જેના સાઉદી અરબે સાફ શબ્દોમાં કહ્યું કે ભારતને ગયા વર્ષે જે તેલ આપવામાં આવ્યું હતું તેને પહેલા વાપરી લો. આ નિવેદન બાદ હવે ભારતે સાઉદી અરબને પણ ઝટકો આપવાની તૈયારી કરી લીધી છે.
હવે અન્ય વિકલ્પ શોધવામાં આવશે અને સાઉદી અરબથી ઓછું તેલ આવશે
રોયટર્સના સૂત્રો અનુસાર જાણવા મળ્યું છે કે મોદી સરકાર ખાડી દેશો પર કાચા તેલની નિર્ભરતા ઘટાડવા પર વિચાર કરી રહી છે. ઇંડિયન ઓઇલ, ભારત પેટ્રોલિયમ, હિન્દુસ્તાન પેટ્રોલિયમ જેવી કંપનીઓ મે મહિનામાં 1.8 કરોડ બેરલ તેલ ઉત્પાદન પર કામ કરી રહી છે. સૂત્રોનો દાવો છે કે સરકારે નક્કી કરી લીધું છે કે આ દેશો પર તેલ પરની નિર્ભરતા ઘટાડી દેવામાં આવશે અને નવા દેશોના વિકલ્પ પર કામ કરવામાં આવશે. સરકારી કંપનીઓ મે મહિનાથી તેના પર અમલ પણ ચાલુ કરી દેશે.
ચોથા નંબર પર પટકાયું સાઉદી અરેબિયા
ફેબ્રુઆરી મહિનામાં અમેરિકાથી ભારતની તેલ આયાતમાં વધારો જોવા મળ્યો છે, ઈરાક બાદ અમેરિકા બીજો સૌથી મોટો તેલ આપૂર્તિકર્તા દેશ બન્યો છે. પહેલા સાઉદી અરબ પહેલા અથવા બીજા નંબર પર રહેતો હતો જે હવે ચોથા નંબર પર પહોંચી ગયો છે. જે બાદ સરકારની રણનીતિ સાફ છે કે હવે સાઉદી અરબને ઝટકો આપવામાં આવશે.
અમેરિકાએ ક્રાઉન પ્રિન્સને સંભળાવી દીધી
નોંધનીય છે કે અમેરિકામાં સત્તા પરિવર્તન બાદ સાઉદી અરેબિયા અને અમેરિકા વચ્ચે સંબંધો ધીમે ધીમે ખરાબ થઈ રહ્યા છે. અમેરિકાના રાષ્ટ્રપતિએ સાફ શબ્દોમાં કહી દીધું છે કે વાતચીત કરવાની આવે ત્યારે તે સાઉદી અરેબિયાના રાજા સાથે જ વાત કરશે, ક્રાઉન પ્રિન્સ સાથે નહીં. અમેરિકાએ કહ્યું કે ક્રાઉન પ્રિન્સના સમકક્ષ અમેરિકાના રક્ષા મંત્રી છે, જો ક્રાઉન પ્રિન્સે વાત કરવી હોય તો રક્ષામંત્રી સાથે વાત કરી લે, બાયડન સાથે નહીં.