ભેટ / મોદી સરકારની ગર્ભવતી મહિલાઓને ભેટ, હવે આ સારવાર માટે મળશે વધુ પૈસા

• સરકારે ગર્ભવતી મહિલાઓને ચૂકવાતા પ્રસૂતિ ખર્ચને વધારી 7,500 રૂપિયા કર્યો
• હાલ ગર્ભવતી મહિલાઓને પ્રસૂતિ ખર્ચ માટે 5,000 રૂપિયા આપવામાં આવે છે
• આ ફાયદો માત્ર કર્મચારી રાજ્ય વીમા નિગમની લાભાર્થી મહિલાઓને મળશે

સરકારે ગર્ભવતી મહિલાઓને ચૂકવવામાં આવતા પ્રસૂતિ ખર્ચને વધારીને 7,500 રૂપિયા કરવાનો નિર્ણય લીધો છે. હાલ આ રકમ 5,000 રૂપિયા છે. જોકે, તેનો ફાયદો માત્ર એ મહિલાઓને મળશે જે કર્મચારી રાજ્ય વીમા નિગમના લાભાર્થી છે. 

શ્રમ મંત્રી સંતોષ ગંગવારની અધ્યક્ષતામાં થયેલી બેઠકમાં આ નિર્ણય લેવામાં આવ્યો છે. અહીં બતાવી દઇએ કે, જીવન નિર્વાહ ખર્ચમાં સતત વધારો થવાને પગલે પ્રેગ્નનેન્ટ મહિલાઓ માટે 5,000 રૂપિયાની રકમ સામાન્ય લાગી રહી હતી. 

આ જ કારણ છે કે, સરકારે આ વધારાનું એલાન કરતા જીવન નિર્વાહ ખર્ચનો ઉલ્લેખ કર્યો છે. સરકાર અનુસાર, આ કારણને ધ્યાને રાખીને નિર્ણય લેવામાં આવ્યો છે. પ્રસૂતિ ખર્ચ એ લાભાર્થી મહિલાઓને આપવામાં આવે છે જે ઇએસઆઇસી નેટવર્કની હોસ્પિટલ સુધી પહોંચ ન હોવાને કારણે અન્ય હોસ્પિટલોમાં માતૃત્વ સેવાઓનો લાભ ઉઠાવે છે. 

વર્તમાન સમયમાં દેશભરમાં ઇએસઆઇસીના 150થી વધારે હોસ્પિટલ છે. આ હોસ્પિટલોમાં સામાન્યથી લઇને ગંભીર બીમારીઓની સારવારની સુવિધા ઉપલબ્ધ છે.