ખાસ વાંચો / ગુજરાતીઓ ગરમીથી શેકાવા રહેજો તૈયાર, આ જિલ્લાઓમાં હીટવેવની હવામાન વિભાગે કરી આગાહી

• હવામાન વિભાગની આગાહી
• સૌરાષ્ટ્ર- કચ્છમાં હીટવેવની આગાહી
• દક્ષિણ ગુજરાતમાં પણ વધશે ગરમી

રાજ્યમાં ગરમીમાંથી આંશિક રાહત મળ્યા બાદ ધીમે-ધીમે ફરી વધારો થવા લાગ્યો છે. બીજી તરફ હવામાન વિભાગ દ્વારા આગાહી કરવામાં આવી છે કે, આગામી દિવસોમાં રાજ્યભરમાં ગરમીનો પ્રકોપ વધશે. તેમજ અમદાવાદ સહિત આસ-પાસના વિસ્તારોમાં યલો એલર્ટની આગાહી કરવામાં આવી છે. જેને લીધે લોકો ત્રાહિમામ ગરમી સહન કરવી પડશે.

અનેક જિલ્લાઓમાં ગરમીનો પારો પહોંચી શકે આસમાને 

હવામાન વિભાગ દ્વારા કરવામાં આવેલી આગાહી પ્રમાણે,સુરત, વલસાડ, પોરબંદર, ભાવનગર, જૂનાગઢ, કચ્છ તથા ગાંધીનગર, વડોદરા, સુરેન્દ્રનગર, રાજકોટ અને અમરેલીમાં લૂ લાગવાની સંભાવના છે. તો આવતીકાલે રાજ્યના કચ્છ, અને દક્ષિણ ગુજરાતમાં હીટવેવની પણ આગાહી કરવામાં આવી છે. 

રાજ્યમાં કાળઝાળ ગરમીના પ્રકોપના કારણે 5 શહેરોનું તાપમાન 42 ડિગ્રીને પાર

ઉલ્લેખનીય છે કે, છેલ્લા બે દિવસો દરમિયાન રાજ્યના વાતાવરણ અચાનક પલટો આવતા અનેક શહેરોમાં વરસાદી માહોલ સર્જાયો હતો. તેના લીધે ઉનાળામાં ગરમીની જગ્યાએ રાજ્યમાં ઠંડક પ્રસરી ગઈ હતી. જેના લીધે ગરમીથી બે દિવસ લોકોને રાહત મળી હતી. જો કે, વાતાવરણમાં પુનઃ વાદળો હટતાની સાથે ગરમીનો પ્રકાપ શરૂ થવા લાગ્યો છે. બીજી તરફ શુક્રવારે રાજ્યના 5 શહેરોનું મહત્તમ તાપમાન 42 ડિગ્રીને પાર પહોંચી જવા પામ્યું હતું. જેમાં ગાંધીનગર, અમરેલી, રાજકોટ, કંડલા, કેશોદમાં 42 ડિગ્રી  જ્યારે અમદાવાદમાં 41.9,વડોદરામાં 41.4 ડિગ્રી તાપમાન નોધાયું હતું.