તંત્રની પોલ ખુલી / માત્ર પાંચ ઇંચ વરસાદમાં સ્માર્ટ સીટી અમદાવાદ બન્યુ 'ખાડાબાદ'

શહેરના મોટાભાગના વિસ્તારોમાં ઠેર-ઠેર ખાડા પડ્યા છે. ડ્રાઇવ ઇન, મેમનગર, નારણપુરામાં રસ્તાઓ ધોવાઇ ગયા છે. ત્યારે ઘોટલોડિયા, સોલા અને સેટેલાઇટ જેવો પોશ વિસ્તારોમાં પણ રસ્તાઓ પર ખાડા પડી ગયા છે.

તો રાણીપ, વાડજ, શાહીબાગ, વાસણા, જીવરાજપાર્ક અને વેજલપુરમાં રસ્તાઓની હાલત ખરાબ થઇ ગઇ છે. જ્યારે સામાન્ય વરસાદમાં પણ અમદાવાદના બાપુનગર, રખિયાલ, ગોમતીપુર અને મણીનગરમાં રસ્તાઓ પર પણ ખાડા પડી ગયા છે.

વૃક્ષ ધરાશાયી થતા એકનું મોત, ત્રણ ઇજાગ્રસ્ત

અમદાવાદના મણિનગર વિસ્તારમાં વૃક્ષ ધરાશાયી થતા એક વ્યક્તિનું મોત નિપજ્યું છે. જ્યારે ત્રણ લોકોને ઇજા પહોંચી છે. ઇજાગ્રસ્તોને સારવાર અર્થે ખસેડવાામાં આવ્યા છે. તો મણિનગર જતો રસ્તો પણ હાલ બંધ કરી દેવાયો છે.

રાજ્યમાં સિઝનનો 71 ટકા વરસાદ

ગુજરાતમાં સિઝનનો 71 ટકા વરસાદ પડ્યો છે. ગુજરાતમાં તમામ તાલુકામાં સારો વરસાદ પડ્યો છે. અત્યાર સુધી દક્ષિણ ગુજરાતમાં 98 ટકા વરસાદ પડ્યો છે. જ્યારે સૌરાષ્ટ્રમાં સિઝનનો 64 ટકા વરસાદ પડ્યો છે. જ્યારે મધ્ય ગુજરાતમાં 71 ટકા અને ઉત્તર ગુજરાતમાં 51 ટકા વરસાદ પડ્યો છે. 

તો ભરૂચ, નર્મદા, સુરત, છોટાઉદેપુરમાં સિઝનનો 100 ટકા વરસાદ પડ્યો છે. જ્યારં ડાંગ, નવસારી, વલસાડમાં સિઝનનો 90થી 95 ટકા વરસાદ છે. ગત સિઝન કરતા આ વર્ષે સારો વરસાદ રહેતા ગુજરાતમાં લોકોમાં ખુશી છે. જ્યારે હજુ પણ ગુજરાતમાં સારા વરસાદની સંભાવના છે.