કાર્યવાહી / અમદાવાદ, કચ્છ બાદ સુરતમાંથી ઝડપાયું 1 કરોડનું MD ડ્રગ્સ, ગુજરાતનું યુવાધન નશાખોરી તરફ

• સુરતમાંથી 1 કરોડની કિંમતનું MD ડ્રગ્સ ઝડપાયું
• MD ડ્રગ્સનું રાજ્ય વ્યાપી કૌભાંડ હોવાની આશંકા
• રાજ્યના યુવાધનને નશાખોરી તરફ ધકેલાનું ષડયંત્ર

ગુજરાતના અમદાવાદ, સુરત, રાજકોટ, વડોદરા સહિતના મોટાં શહેરોમાં ખુલ્લેઆમ ચાલતાં ડ્રગ્સ માફિયાઓનું રાજ ચાલી રહ્યું છે. દારૂના અડ્ડાઓ શોધતાં યુવાનો હવે ડ્રગ્સના રવાડે ચડ્યાં છે. 1 કરોડના MD ડ્રગ્સ મામલે અમદાવાદ ક્રાઇમબ્રાન્ચે થોડા દિવસો અગાઉ મુખ્ય આરોપી ફાક અહેમદ ઉર્ફે અફાક બાવાની ધરપકડ કરી હતી. ત્યારે હવે સુરતમાંથી ક્રાઇમ બ્રાન્ચે 1 કરોડનું MD ડ્રગ્સ ઝડપી પાડ્યું છે. ક્રાઇમ બ્રાન્ચે સુરતમાં ડ્રગ્સ મામલે એક આરોપીની ધરપકડ પણ કરી છે. આ આરોપીની પુછપરછમાં મોટા ખુલાસા થવાની શક્યતાઓ છે. આરોપી ડ્રગ્સની ડિલિવરી સુરતમાં જ કરવાનો હતો.

અત્રે ઉલ્લેખનીય છે કે સુરતમાં વર્ષોથી ડ્રગ્સ મળતું આવ્યું છે. શહેરના યુવાનો દિવસેને દિવસે પાઉડર, ગોળી અને ગાંજા સહિતના નશીલા પદાર્થોનું સેવન કરતા થયા છે. મેથામેફટામાઇન અને મિથાઇલ ડાયમેકિસ(MD)નામના સફેદ કે કોફી રંગના પાઉડર સ્વરૂપના ડ્રગ્સનું સેવન સ્કૂલ અને કોલેજોના યુવાનો કરી રહ્યા છે. મેક્રાડોન અને એમડી નામનું ડ્રગ્સ હવે મોંઘાદાટ હેરોઇન અને કોકેઇનનો પર્યાય બની ચૂક્યા છે. પોલીસ કાર્યવાહી કરી રહી છે પરંતુ તે માત્ર આવા ખેપિયાઓ સુધી સીમિત રહી છે. શહેરમાં વર્ષોથી ડ્રગ્સ મળતુ આવ્યું છે જે સુરતમાં નશાખોરીનું ચિત્ર સ્પષ્ટ કરે છે. ત્યારે ક્રાઇમ બ્રાન્ચની કાર્યવાહી તો સરાહનીય છે પરંતુ ગુજરાતમાં આ ડ્રગ્સ આવે છે ક્યાંથી?

કેવી રીતે ગુજરાતમાં પ્રવેશે છે ગાંજો અને ડ્રગ્સ?

યુપી, બિહાર, રાજસ્થાન, મધ્યપ્રદેશ અને ઓરિસ્સામાંથી મોટા પ્રમાણમાં ડ્રગ્સ ગુજરાતમાં સપ્લાય થાય છે. રેલવે માર્ગે અન્ય રાજ્યોમાંથી સુરતમાં ઘુસાડાય છે ગાંજો અને અન્ય ડ્રગ્સ. સુરતના ડ્રગ્સ સપ્લાયર્સ અમદાવાદ સહિતના અન્ય શહેરોમાં સપ્લાઈ કરે છે. 

દારૂમાં આબરૂ જવાનાં ડરે યુવાનો ડ્રગ્સ લેવાનું વધુ પસંદ કરે છે

આર્થિક રીતે દિવસેને દિવસે વિકાસની હરણફાળ ભરી રહેલાં ગુજરાતનું મોટાભાગનું યુવાધન આગામી વર્ષોમાં પતન થઈ જાય તો નવાઈ ન અનુભવતાં. હજુ ગુજરાતના વાલીઓ સંતાનોને દારૂથી દૂર રાખવા મથી રહ્યા છે ત્યાં તો ધ્યાને આવ્યું કે દર વર્ષે અંદાજે 10 હજાર કિલો ડ્રગ્સ પકડાઈ રહ્યું છે. રાજ્યમાં ઉદ્યોગપતિઓ અને બિલ્ડરોના સંતાનો ડ્રગ્સ લેવામાં મોખરે છે. દારૂમાં આબરૂ જવાનાં ડરે યુવાનો ડ્રગ્સ લેવાનું વધુ પસંદ કરે છે.

પંજાબ મોટું સપ્લાયર રાજ્ય

આસપાસના રાજ્યની વાત કરીએ તો પંજાબથી રાજસ્થાન આવેલ ડ્રગ્સ આપણા સુધી પહોંચે છે જ્યારે પશ્ચિમ બંગાળથી પણ ગુજરાત નશીલા પદાર્થોની આયાત કરે છે. ગુજરાતમાં આ નશાનો ધંધો હાલતો ધમધોકાર ચાલી રહ્યો છે. અત્યાર સુધી છુપાઈ છુપાઈને રાતના અંધારામાં થતો આ વેપલો હવે દિવસના અજવાળામાં પણ થવા લાગ્યો છે.

દર વર્ષે 50 હજાર કિલોથી વધુ ડ્રગ્સની ખપત છે માફિયાઓને 

માફિયાઓ ગુજરાતમાં અંદાજે 50 હજાર કિલોથી વધુ વિવિધ પ્રકારના ડ્રગ્સ વેચી રહ્યા છે. જોકે દર વર્ષે અંદાજે 10 હજાર કિલો જેટલું ડ્રગ્સ તો પકડાઈ રહ્યું છે. ATSએ પકડેલાં ડ્રગ્સમાં 2019માં 2920 કિલો ગાંજો, 531.381 કિલો અફીણ, 102.182 કિલો હેરોઈન-બ્રાઉન સુગરનો સમાવેશ થાય છે.

કેસરથી પણ મોંઘુ 6 હજાર રૂપિયામાં મળે છે 1 ગ્રામ હૅરોઈન, જાણો શું હોય છે ડ્રગ્સના ભાવ...