સફેદ કલંક / ભરૂચ બાદ હવે અમદાવાદમાંથી ઝડપાયું MD ડ્રગ્સ, SOGએ 2 શખ્સોને દબોચી લીધા

• ભરૂચ બાદ અમદાવાદમાંથી ઝડપાયો ડ્રગ્સનો જથ્થો
• SOGએ 2 આરોપીની કરી ધરપકડ
• 57 ગ્રામ MD ડ્રગ્સનો જથ્થો જપ્ત

ગુજરાત દેશભરમાં ડ્રગ્સ ઘૂસાડવાનું સેફ પેસેજ બની રહ્યું છે તેના પુરાવા સતત સામે આવી રહ્યાં છે.  ભરૂચ બાદ હને અમદાવાદમાંથી ડ્રગ્સનો જથ્થો ઝડપાતા ચકચાર મચી ગઈ છે.  SOGની ટીમે MD ડ્રગ્સના જથ્થા સાથે 2 શખ્સોની ધરપકડ કરી છે. 

57 ગ્રામ MD ડ્રગ્સનો જથ્થો જપ્ત કર્યો 

એસઓજીની ટીમે આ શખ્સો પાસેથી 5.71 લાખનો 57 ગ્રામ MD ડ્રગ્સનો જથ્થો જપ્ત કર્યો છે. બંનેની આકરી પૂછપરછમાં તેઓ આ ડ્રગ્સ શાહપુરના પેડલર પાસેથી લાવ્યા હોવાનું સામે છે. હાલ SOGએ 3 લોકો સામે ગુનો નોંધી તપાસ શરુ કરી છે. આપને જણાવી દઈએ કે, ગઈકાલે ભરૂચ રેલવે સ્ટેશન પાસેથી એસઓજીની ટીમે મેફેડ્રોન ડ્રગ્સના જથ્થા સાથે એક શખ્સને ઝડપી પાડ્યો હતો.

ડ્રગ્સના જથ્થા સાથે નિવૃત્ત પોલીસ કર્મચારીનો દિકરા સહિત બે ઝડપાયા

ટીમે બાતમીના આધારે વોચ ગોઠવી જંબુસર બાયપાસ રોડ પર આવેલી નેશનલ પાર્ક સોસાયટીમાં રહેતા સલમાન મુસ્તાક પટેલને 99 ગ્રામ એટલે કે 9.90 લાખના ડ્રગ્સના જથ્થા સાથે ઝડપી પાડ્યો હતો અને તેની આકરી પૂછપરછ હાથ ધરી હતી.

પૂછપરછમાં થયો ચોંકાવનારો ખુલાસો

પૂછપરછમાં તેણે કબુલાત કરી હતી કે, તે આ ડ્રગ્સનો જથ્થો મુંબઇથી લાવ્યો હતો અને કાળી તલાવડી વિસ્તારમાં આવેલી વસીલા સોસાયટી ખાતે રહેતા ઇમરાન શૌકત ખીલજીએ તેની પાસેથી આ ડ્રગ્સ મંગાવ્યું હતું. જેના પગલે ટીમે નિવૃત્ત પોલીસ કર્મીના પુત્ર ઇમરાન શૌકત ખીલજીને પણ ટીમે દબોચી લીધો હતો. જે બાદ બન્ને વિરૂદ્ધ એ ડિવિઝન પોલીસ મથકે એનડીપીએસ એક્ટ હેઠળ ગુનો નોંધાવતાં પોલીસે આગળની કાર્યવાહી હાથ ધરી છે.