Coronavirus / કોરોના સંકટમાં કેમ આખી દુનિયા એક દવા માટે ભારત પાછળ, ગુજરાતનો છે આ મામલે ડંકો

• સમગ્ર વિશ્વને જરૂર પડી HCQ દવાની
• ભારત કરે છે સૌથી વધુ ઉત્પાદન 
• ગુજરાતની ઝાયડસ કંપની મોખરે 

ભારત સરકાર દ્વારા આ પ્રકારના સંકેત આપવામાં આવ્યા બાદ સમગ્ર વિશ્વ આ દવા લેવા માટે ભારતની પાછળ પડ્યું છે. ત્યારે આનંદની વાત એ છે કે, ગુજરાતની જાણીતી દવા ઉત્પાદક કંપની ઝાયડસ કેડીલા પણ આ દવાનું ઉત્પાદન કરી રહી છે.  

અમદાવાદ ખાતે ઝાયડસ કેડીલામાં દવાનું ઉત્પાદન

અમદાવાદના મોરૈયા ખાતે આવેલી ઝાયડસ કેડીલા કંપની દ્વારા હાઇડ્રોસ્કીક્લોરોક્વીન દવાનું ઉત્પાદન કરાઇ રહ્યું છે. કંપનીના જણાવ્યા મુજબ, કંપની દ્વારા હાઇડ્રોક્સીક્લોરોક્વીન દવાનું રાત-દિવસ ઉત્પાદન કરાઇ રહ્યું છે. એવો દાવો કરાઇ રહ્યો છે કે હાઇડ્રોક્સીક્લોરોક્વીન દવા કોરોના વાયરસની અસર ઓછી કરવામાં કારગર છે. આ દવા ઉપરાંત કંપનીનો દાવો છે કે તેણે કોરોના વાયરસની વેક્સીન પણ વિકસાવી છે. જોકે હાલ તો આ વેક્સીનનો પ્રાણી પર ટેસ્ટ કરાઇ રહ્યો છે. કંપની દ્વારા દાવો કરાયો છે કે કોરોના વાયરસની વેક્સીન બનતા 6 મહીના લાગી શકે છે.

દેશમાં અનેક દવા કંપની કરી રહી છે આ દવાનું ઉત્પાદન 

દેશમાં ઘણી કંપનીઓ આ દવા બનાવે છે. ઝાયડસ કેડિલા અને ઇપ્કા લેબોરેટરીઝ મુખ્ય છે. કંપનીઓ માર્ચ માટેનું માસિક ઉત્પાદન 4 ગણો વધારીને 40 એમટી કરી શકે છે. ઉપરાંત, તેને આવતા મહિનામાં 5-6 ગણો વધારીને 70 એમટી કરી શકાય છે. જો આ કંપનીઓ તેમની સંપૂર્ણ ક્ષમતા પર કામ કરે છે તો દર મહિને 200 એમજીના 35 મિલિયન ટેબ્લેટ્સ તૈયાર થઈ શકે છે.

ભારતમાં શું છે કિંમત અને કેટલું થાય છે વેચાણ

ભારતમાં HCQની ટેબ્લેટની કિંમત 3 રૂપિયાથી ઓછી છે. નિષ્ણાંતોનું કહેવું છે કે 7 કરોડ દર્દીઓના ઇલાજ માટે 100 કરોડ ગોળીઓ પૂરતી છે. આવી સ્થિતિમાં, બાકીનું ઉત્પાદન નિકાસ કરી શકાય છે. તે પડોશી દેશો તેમજ અમેરિકાને નિકાસ કરી શકાય છે, જેને તેની જરૂર છે.

અમેરિકાને કેમ જોઇએ છે આ ટેબ્લેટ ?

કેટલાક અહેવાલો અનુસાર, આ દવાની અસર કોરોનાવાયરસ ચેપ પર જોવા મળી છે.તેથી જ યુએસના રાષ્ટ્રપતિ ડોનાલ્ડ ટ્રમ્પે આ દવા માટે ભારતની મદદ માગી છે. ભારત આ દવાની સૌથી વધુ નિકાસ કરે છે. માર્ચમાં તેની નિકાસ પર પ્રતિબંધ મૂકવામાં આવ્યો હતો. જો કે, હવે ભારતે આ માટે હા પાડી છે. કોરોનાવાયરસના મારથી બેહાર થયેલ અમેરિકાના રાષ્ટ્રપતિએ જણાવ્યું હતું કે, અમેરિકામાં 29 મિલિયન દવાના ડોઝ ખરીદવામાં આવશે જે પૈકી સૌથી મોટો હિસ્સો ભારત પાસેથી ખરીદવામાં આવશે.