અમાનવીય ઘટના / માનવતા શર્મસાર : આદિવાસી યુવકને વાન સાથે બાંધીને ઢસડ્યો, પછી મારી નાખ્યો, VIDEO વાયરલ

• મધ્યપ્રદેશના નીમચમાં માનવતાને શર્મસાર કરે તેવી ઘટના
• ચોરીના શકમાં આદિવાસી યુવક સાથે આચરાયું ખૌફનાક કૃત્ય
• બદમાશોએ વાન સાથે બાંધીનો ઢસડ્યો યુવકને
• ત્યાર બાદ મારઝૂડ કરીને હત્યા કરી નાખી
• ઘટનાનો વીડિયો વાયરલ થતા હડકંપ મચ્યો 

મધ્યપ્રદેશના નીમચમાં બનેલી ઘટનાએ આખા દેશનું માથું શરમથી ઝુકાવી દીધું છે. ચોરીના શકમાં નીમચના સિંગોલીમાં બદમાશોએ પહેલા આદિવાસ યુવાન ભૈયાલાલ ભીલની બાઈકને ટક્કર મારી ત્યાર બાદ તેને પીકઅપ વાન સાથે બાંધીને ઢસડ્યો. પીડિત યુવાન જ્યાં સુધી અધમૂઓ ન થયો ત્યાં સુધી બદમાશો તેને વાન સાથે બાંધીને ઢસડતા રહ્યાં હતા. 

આરોપીઓનું આટલેથી મન ન ભરાતા તેની મારઝૂડ પણ કરી હતી. જ્યાં સારવાર દરમિયાન પીડિત યુવાનનું મોત થયું. પીડિત યુવાને ચોરી કરી હોવાનો બદમાશોને શક પડ્યો હતો, તેઓ થોડા સમયથી આ યુવાનને શોધતા હતા. આખરે પીડિત યુવાન તેમના લાગમાં આવી ગયો. 

પોલીસે આઠ આરોપી સામે કેસ દાખલ કર્યો, 4 ની ધરપકડ
નીમચ પોલીસે આ કેસમાં કુલ 8 આરોપીની સામે હત્યાનો ગુનો દાખલ કરીને 4 ની ધરપકડ કરી છે. બાકીના આરોપીની શોધખોળ ચાલુ છે. પોલિસે આ કેસમાં 8 લોકોની ઓળખ કરી છે, જેમાંથી 4 ની ધરપકડ કરવામાં આવી છે. આ તમામ લોકો સામે હત્યા અને એટ્રોસિટી એક્ટનો કેસ નોંધવામાં આવ્યો છે. યુવકને મૃત્યુ બાદ આરોપીઓએ પોલીસને જાણ કરી કે તેઓએ ચોરને પકડ્યો છે. સિંગોલી પોલીસ ઘટનાસ્થળે પહોંચી હતી અને ઘાયલને નીમચ જિલ્લા હોસ્પિટલમાં રિફર કરવામાં આવ્યો હતો જ્યાં તેનું મૃત્યુ થયું હતું.

આરોપીઓએ બર્બરતાનો વીડિયો પણ બનાવ્યો

આરોપીઓએ બર્બરતાનો વીડિયો પણ બનાવ્યો હતો અને તેને વાયરલ કર્યો હતો. જ્યારે પોલીસે આ સમગ્ર મામલાની નજીકથી તપાસ કરી તો જાણવા મળ્યું કે જે લોકોએ વીડિયો બનાવ્યો હતો, તે જ લોકોએ આ આદિવાસી વ્યક્તિને ખૂબ માર માર્યો હતો અને તેને વાહનની પાછળ ખેંચી લીધો હતો. નીમચ એસપી સૂરજ વર્માએ કાર્યવાહી કરતા આ સમગ્ર કેસમાં 8 લોકો સામે હત્યા અને એટ્રોસિટી એક્ટનો કેસ નોંધવાનો આદેશ આપ્યો હતો. મુખ્ય આરોપી મહેન્દ્રની તાત્કાલિક ધરપકડ કરવામાં આવી હતી. આરોપી મહેન્દ્ર ગુર્જરની પત્ની બાંદાના સરપંચ છે.