બોટાદના પડવદર ગામે ગ્રામ પંચાયતની ચૂંટણીમાં હારેલા ઉમેદવાર કોર્ટમાં જીતેલા સાબિત થયા હતા. આ મામલે બોટાદના ગઢડાના મામલતદાર એમ.આર. મીયાણી અને રેવન્યુ તલાટી પી.પી. રેવર ઉપરાંત મામલતદાર કચેરીના ઑપરેટર નિખીલ પંડયા સહિતનાઓને સસ્પેન્ડ કરાયા છે. આ ઉપરાંત કલેકટરે PGVCL કર્મચારી અને શિક્ષક સામે પણ તપાસના આદેશ જારી કર્યા છે.જિલ્લા કલેક્ટરના આદેશથી મામલતદાર અને તલાટીને સસ્પેન્ડ કરાયા છે. મહત્વનું છે કે 19 ડિસેમ્બરે 2021 માં ગ્રામ પંચાયતની ચૂંટણી યોજાઇ હતી.
શુ હતો સમગ્ર મામલો?
ગઢડાના પડવદર ગામે ગ્રામ પંચાયતની ચૂંટણીમાં વોર્ડમાં સભ્ય તરીકે મહિલા ઉમેદવાર દયાબેન ચાવડાને ચુંટણી પંચે હારેલા જાહેર કરાયા હતા. ત્યારે મહિલા ઉમેદવાર કોર્ટમાં જતા ગઢડા કોર્ટ દ્વારા ફરી મતગણત્રરી હાથ ધરવામાં આવી હતી. જેમાં મહિલા ઉમેદવારને 111 મત મળતા તેણીને વિજેતા જાહેર કરવામાં આવ્યા હતા. પડવદર ગામે 2021માં પંચાયતી રાજની ચૂંટણી યોજાઈ હતી. આ પડવદર ગ્રામ પંચાયતની ચૂંટણીમાં એક મહિલા ઉમેદવારએ ફોર્મ ભર્યું હતું. જે સરકારી ચોપડે હારેલા જાહેર કર્યા બાદ મતગણતરીના સમયે પોતાની હાજરીમાં મતોની ગણતરી થઈ તે દરમિયાન પ્રતિસ્પર્ધીની સરખામણીએ પોતાને મળેલા મતો મુજબ વિજયતા હોવા છતા હારેલા જાહેર કરવામાં આવ્યા હતા. મહિલા ઉમેદવારે ન્યાય માટે કોર્ટના દ્વાર ખખડાવતા કોર્ટે ફેરી મતગણતરી કરવાનો આદેશ કર્યો હતો. જેને લઇને ફરી મત ગણતરી થતાં દયાબેન ચાવડાને 111 મત મળતા વિજેતા જાહેર કરાયા હતા. ચૂંટણી બાદ એક વર્ષના અંતે મહિલા ઉમેદવારને ન્યાય મળ્યો હતો.
કોર્ટ સમક્ષ ફરી મતગણતરી થતાં મહિલા ઉમેદવાર દયાબેનને 112 મતોમાંથી એક મત રદ થતા 111 મતો મળેલા હોવાનું અને પ્રતિસ્પર્ધી વિમળાબેનને ૬૧ મતો મળેલા હોવાથી દયાબેન ચાવડા ૫૦ મતોથી વિજેતા થયા હતા. ચૂંટણી પંચનું પરિણામ ખોટુ સાબિત થયુ હતું.