દુર્ઘટના / વ્હાઇટ હાઉસ નજીક મોટી દુર્ઘટના: લગ્નની વર્ષગાંઠ ઉજવી રહેલ દંપતી પર પડી વીજળી, 3ના મોત

• અમેરિકામાં વ્હાઇટ હાઉસની બહાર વીજળી પડતાં ત્રણ લોકોના મોત 
• લગ્નની વર્ષગાંઠની ઉજવણી કરી રહેલા વૃદ્ધ દંપતીએ પણ જીવ ગુમાવ્યો 
• વ્હાઇટ હાઉસના પ્રવક્તાએ કહ્યું, બિડેન વહીવટીતંત્ર આ ઘટનાથી દુ:ખી  

અમેરિકામાં વ્હાઇટ હાઉસ પાસેના પાર્કમાં શુક્રવારે વીજળી પડવાની ઘટના સામે આવી છે. પ્રાથમિક વિગતો મુજબ આ ઘટનામાં વૃદ્ધ દંપતી સહિત 3 વ્યક્તિના મોત થયા છે. માહિતી મુજબ એક વૃદ્ધ દંપતી તેમની 56મી લગ્ન જયંતિની ઉજવણી કરી રહ્યું હતું. આ દરમ્યાન પાર્કમાં અચાનક વીજળી પડી અને વર્ષગાંઠની ઉજવણી કરી રહેલા એક વૃદ્ધ દંપતી સહિત ત્રણ લોકોના મોત થયા હતા. 

વોશિંગ્ટન ફાયર એન્ડ ઈમરજન્સી ડિપાર્ટમેન્ટના જણાવ્યા અનુસાર ગુરુવારે સાંજે વ્હાઇટ હાઉસની સામેની શેરી તરફના નાના પાર્ક લાફાયેટ સ્ક્વેર પર વીજળી પડી. જેના કારણે બે પુરૂષ અને બે મહિલાને ગંભીર ઈજાઓ પહોંચી છે. તમામ પીડિતોને સ્થાનિક હોસ્પિટલમાં લઈ જવામાં આવ્યા હતા. પરંતુ શુક્રવારે સવારે મેટ્રોપોલિટન પોલીસે જણાવ્યું હતું કે, ડોકટરોએ 75 વર્ષીય ડોના મુલર અને 76 વર્ષીય જેમ્સ મુલરને મૃત જાહેર કર્યા હતા. વૃદ્ધ દંપતિ હાઇસ્કૂલથી સાથે હતા અને તેમની લગ્નની વર્ષગાંઠની ઉજવણી કરવા અહીં આવ્યા હતા. પાછળથી શુક્રવારે 29 વર્ષીય ઇજાગ્રસ્ત ત્રીજા વ્યક્તિએ પણ તેની ઇજાઓને કારણે મોત નીપજ્યું હતું, પોલીસે જણાવ્યું હતું કે, અન્ય પુખ્તની હાલત નાજુક છે.

શું કહ્યું વ્હાઇટ હાઉસના પ્રવક્તાએ ? 

સમગ્ર મામલે વ્હાઇટ હાઉસના પ્રવક્તાએ કહ્યું કે, બિડેન વહીવટીતંત્ર આ ઘટનાથી દુખી છે. પ્રેસ સેક્રેટરી કરીન જીન-પિયરે એક નિવેદનમાં જણાવ્યું હતું કે, અમે એવા લોકો માટે પ્રાર્થના કરી રહ્યા છીએ જેઓ હજુ પણ તેમના જીવન માટે લડી રહ્યા છે. ફાયર એન્ડ ઇમરજન્સી સર્વિસના પ્રવક્તા વિટો મેગીઓલો દ્વારા સોશિયલ મીડિયા પર પોસ્ટ કરવામાં આવેલા નિવેદન અનુસાર, યુએસ સિક્રેટ સર્વિસ અને પાર્ક પોલીસના અધિકારીઓ ઘાયલોને પ્રાથમિક સારવાર આપવા માટે દોડી આવ્યા હતા.

વિભાગ દ્વારા સોશિયલ મીડિયા પર પોસ્ટ કરવામાં આવેલી તસવીરોમાં ઘણી એમ્બ્યુલન્સ અને એક ફાયર બ્રિગેડ ઘટનાસ્થળે કામ કરી રહી છે. ઘટનાસ્થળે હાજર એક વ્યક્તિએ કહ્યું કે, મેં ભયંકર અવાજ સાંભળ્યો. મેં મારા આખા જીવનમાં આવું ક્યારેય જોયું નથી. સ્થળ પર હાજર લોકો હલનચલન કરી શકતા ન હતા. જેથી સ્થળ પર હાજર લોકો મદદ માટે દોડી આવ્યા હતા.