કચ્છના મોટા રણમાંથી મહારાષ્ટ્રનો યુવક પાકિસ્તાન જવા નિકળ્યો છે. એક યુવકને સોશિયલ મીડિયામાં પાકિસ્તાની યુવતી સાથે પ્રેમ થતા તે પાકિસ્તાન જવા નિકળ્યો હોવાની ચર્ચા થઇ રહી છે. આ યુવક પ્રેમિકાને મળવા રાપરના ખડીર રણ વિસ્તારથી બાઇક લઇને નિકળ્યો હતો. સૂત્રો દ્વારા મળતી માહિતી અનુસાર, રણ વિસ્તારમાંથી આ યુવકનું બાઇક મળ્યું છે. હાલ આ શંકાસ્પદ યુવકની શોધખોળ હાથ ધરવામાં આવી છે.
કચ્છના મોટા રણમાંથી યુવક પાકિસ્તાન જવા નિકળ્યો
યુવકને સોશિયલ મીડિયામાં પાકિસ્તાની યુવતી સાથે થયો પ્રેમ
રણ વિસ્તારમાંથી યુવકનું બાઇક મળ્યું: સૂત્ર
મહારાષ્ટ્રના એક યુવકને સોશિયલ મીડિયાના માધ્યમથી પાકિસ્તાની યુવતિ સાથે પ્રેમ થયો હતો. જેને લઇને તે પાકિસ્તાન જવા માટે કચ્છ આવી પહોંચ્યો હતો. છેલ્લા 2 દિવસથી ખડીરના ગામડાઓમાં તે બાઇક લઇને ફરતો હતો. આ યુવક ગામલોકોને જોવા મળ્યો હતો.
આ યુવક કચ્છના રસ્તે પાકિસ્તાન જવા નિકળ્યો હતો. રણમાં જ્યાં સુધી બાઈક પહોંચ્યું ત્યાં સુધી બાઇક ચલાવીને પહોંચ્યો. પરંતુ બાઇક ફસાઇ જતા તે બાઇકને રણ વચ્ચે છોડીને પગપાળા આગળ નિકળી ગયો હોવાનું ચર્ચાઇ રહ્યું છે.
આ સમગ્ર મામલે હાલ પૂર્વ કચ્છ એસપી પરીક્ષિતા રાઠોડે જણાવ્યું હતું કે, કોઇ શંકાસ્પદ શખ્સ હોવાનું ધ્યાને આવ્યું છે. આ શખ્સનું બાઇક પોલીસને રણમાંથી મળી આવ્યું છે. હાલ આ શંકાસ્પદ યુવકની રણમાં શોધખોળ ચાલી રહી છે.