મહારાષ્ટ્ર વિધાનસભા અધ્યક્ષની ચૂંટણીમાં ફરી એક વાર શિવસેનાના બે જૂથ આમને સામને આવી ગયા છે.
મહારાષ્ટ્રમાં આજથી વિધાનસભાનું સત્ર
વિધાનસભાના અધ્યક્ષની થશે ચૂંટણી
અસલી શિવસેનાએ વ્હિપ જાહેર કર્યું
મહારાષ્ટ્ર વિધાનસભા અધ્યક્ષની ચૂંટણીમાં ફરી એક વાર શિવસેનાના બે જૂથ આમને સામને આવી ગયા છે. શિવસેના અધ્યક્ષ ઉદ્ધવ ઠાકરેએ રાજન સાલવીને ઉમેદવાર બનાવ્યા છે, તો વળી ભાજપ તરફથી યુવા નેતા અને પ્રથમ ધારાસભ્ય તરીકે ચૂંટાયેલા રાહુલ નાર્વેકરને અધ્યક્ષ પદ માટે નામાંકન કર્યું છે. આ ચૂંટણીમાં શિવસેનાના અધ્યક્ષ ઉદ્ધવ ઠાકરે તરફથી વ્હિપ જાહેર કર્યું છે, પણ મુખ્યમંત્રી એકનાથ શિંદેએ કહ્યું કે, અમારા પર તે લાગૂ થતું નથી.
રાજ્યમાં સત્તા પરિવર્તન બાદ બોલાવામાં આવેલી બે દિવસ વિધાનસભાના વિશેષ સત્ર પહેલા શિવસેના અધ્યક્ષ ઉદ્ધવ ઠાકરે જૂથ તરફથી સુનીલ પ્રભુએ વ્હિપ જાહેર કરી દીધું છે. વ્હિપમાં કહેવાયુ છે કે, વિધાનસભાનું વિશેષ સત્ર 3-4 જૂલાઈએ થશે. વિધાનસભા અધ્યક્ષ પદ માટે રાજન સાલવી ઉમેદવાર છે. આ દરમિયાન શિવસેનાન તમામ સભ્યો સદનમાં હાજર રહ્યા.
તો વળી મુખ્યમંત્રી એકનાથ શિંદે જૂથના પ્રવક્તા દીપક કેસરકરે કહ્યું કે, અમે વિધાનસભા અધ્યક્ષ ચૂંટણી માટે વ્હિપ જાહેર કરીશું. મજાની વાત એ છે કે બંને જૂથ શિવસેનાના તમામ ધારાસભ્યોના વોટનો દાવો કરી રહ્યા છે. શનિવારે શિંદે જૂથના પ્રવક્તા દીપક કેસરકરે ગોવામાં પત્રકારો સાથે કહ્યું હતું કે, ભાજપ વિધાનસભા અધ્યક્ષ પદના ઉમેદવાર રાહુલ નાર્વેકરને અગ્રિમ શુભેચ્છાઓ આપું છું કારણ કે, રાજ્યના સૌથી યુવાન વિધાનસભા અધ્યક્ષ હશે.
એકનાથ શિંદે જૂથના ધારાસભ્યો ગોવાથી મુંબઈ પહોંચ્યા
મહારાષ્ટ્રના મુખ્યમંત્રી એકનાથ શિંદે પોતાના ધારાસભ્યો સાથે મુંબઈ એરપોર્ટ પર આવી પહોંચ્યા હતા. મહારાષ્ટ્રના મુખ્યમંત્રી એકનાથ શિંદેએ પોતાના ધારાસભ્યો સાથે તાજ પ્રેસિંડેંટ હોટલ પહોંચ્યા હતા. જ્યારે આજે સ્પિકર પદ માટે ચૂંટણી થવાની છે. આ તમામની વચ્ચે રાજ્યના નાયબ મુખ્યમંત્રી દેવેન્દ્ર ફડણવીસ ધારાસભ્યોને મળવા માટે હોટલ તાજ પહોંચ્યા છે. તેમની સાથે રાજ્યના પ્રદેશ ભાજપ અધ્યક્ષ ચંદ્રકાંત પાટિલ પણ પહોંચ્યા છે.
એકનાથ શિંદેના નેતૃત્લમાં મહારાષ્ટ્ર શિવસેનાના બળવાખોર ધારાસભ્યો અને અપક્ષ ધારાસભ્યોનું એક જૂથ શનિવારે એક સ્પેશિયલ વિમાનથી ગોવાથી મુંબઈ માટે રવાના થયા હતા. ડોના પાઉલાની શાનદાર હોટલમાં ગત 29 જૂનથી અડ્ડો જમાવીને બેઠેલા શિંદે જૂથના ધારાસભ્યો બે બસમાં બેસીને ડાબોલિમ હવાઈ એરપોર્ટ પર આવ્યા હતા.