કડક સુરક્ષા વચ્ચે આજે (સોમવાર) મહારાષ્ટ્ર, હરિયાણામાં વિધાનસભાની ચૂંટણી માટે અને 18 રાજ્યોની 51 વિધાનસભા બેઠકો પર પેટાચૂંટણી માટે તમામ તૈયારીઓ પૂર્ણ થઇ ચૂકી છે. મતદાનને હવે થોડા કલાકો બાકી રહી ગયા છે. ત્યારે હરિયાણમાં 90 સભ્યોની વિધાનસભાની ચૂંટણી માટે સોમવારે મતદાનમાં મોટા પ્રમાણમાં ભાજપ અને કોંગ્રેસ વચ્ચે મુકાબલો છે. આ ચૂંટણીનું મતદાન સોમવારે થશે અને મતગણતરી 24 ઓક્ટોબરે થશે. આ દિવસે હાર-જીતનો નિર્ણય થશે.
મહારાષ્ટ્ર, હરિયાણામાં આજે વિધાનસભા ચૂંટણી
પેટાચૂંટણી: 18 રાજ્યોની 51 વિધાનસભા બેઠકો પર મતદાન
21 ઓક્ટોબરે મતદાન અને 24 ઓક્ટોબરે મતગણતરી
મહારાષ્ટ્રમાં કુલ મતદારો અને ઉમેદવારો
મહારાષ્ટ્રમાં 288 વિધાનસભા બેઠકોની ચૂંટણીમાં 8,97,22,019 મતદારો છે. તેમના માટે 96,661 મતદાન કેન્દ્રોની વ્યવસ્થા છે. અહીં કુલ 3,237 ઉમેદવારો ચૂંટણી લડી રહ્યા છે, જેમાંથી અપક્ષની સંખ્યા 1400 છે. બીએસપી 262 બેઠકો પર અને ભાજપ 164 બેઠકો પર લડી રહ્યું છે. જોકે ભાજપના નિશાન પર 14 ગઠબંધન ઉમેદવાર પણ લડી રહ્યા છે. ભારતીય કમ્યુનિસ્ટ પાર્ટી 16 અને માર્ક્સવાદી કમ્યુનિસ્ટ પાર્ટી આઠ બેઠકો પર લડી રહી છે.
હરિયાણમાં કુલ મતદારો અને ઉમેદવારો
હરિયાણામાં કુલ મતદારોની સંખ્યા 18,282,570 છે. હરિયાણાની 90 બેઠકો પર કુલ 1169 ઉમેદવારો છે, જેમાં મહિલાઓની સંખ્યા 104 છે. તમામ 90 બેઠકો પર ભાજપ અને કોંગ્રેસ ચૂંટણી લડી રહી છે, જ્યારે બીએસપી 87 અને ઇનેલો 81 બેઠખો પર ચૂંટણી મેદાનમાં છે. ભાકપા ચાર અને માકપા સાત બેઠકો પર લડી રહી છે, ત્યારે નિર્દળીય ઉમેદવારોની સંખ્યા 434 છે. કુલ 19,578 મતદાન કેન્દ્રો પર 21 ઓક્ટોબરે મતદાન થશે.
પેટાચૂંટણી: 18 રાજ્યોની 51 વિધાનસભા બેઠકો પર મતદાન
આજે દેશભરમાં ખાલી બેઠકો પર પેટાચૂંટણી યોજાઇ રહી છે. 18 રાજ્યોની 51 વિધાનસભા બેઠકો પર મતદાન યોજાઇ રહ્યું છે. જેમા 2 લોકસભા બેઠકો પર પણ મતદાન થશે અને ગુજરાતની 6 બેઠકો પર પણ મતદાન યોજાઇ રહ્યું છે. જ્યારે ઉત્તરપ્રદેશમાં 11 વિધાનસભા બેઠકો, બિહારની 5, અસમની 4, રાજસ્થાનની 2 બેઠકો પર પેટાચૂંટણી યોજાઇ રહી છે. હિમાચલપ્રદેશ, તમિલનાડૂમાં 2-2 બેઠક અને પંજાબની 4, કેરલની 5, સિક્કીમની 3 બેઠક પર મતદાન થશે. તો અરૂણાચલ, MP, ઓડિસા અને છત્તીસગઢમાં એક બેઠક પર પેટાચૂંટણી યોજાશે. પુડૂચેરી, મેઘાલય અને તેલંગણામાં એક બેઠક પર પેટાચૂંટણી જ્યારે મહારાષ્ટ્રની સતારા લોકસભા બેઠક અને બિહારની સમસ્તિપુર લોકસભા બેઠક માટે પણ મતદાન થશે.
ગુજરાતની 6 વિધાનસભા બેઠકો માટે પેટાચૂંટણી
રાધનપુર, થરાદ, બાયડ, ખેરાલુ અમરાઇવાડી અને લુણાવાડા બેઠક પર પેટાચૂંટણી યોજાઇ રહી છે. ત્યારે આ 6 બેઠકોમાં 2017માં 4 બેઠક ભાજપ અને 2 બેઠક કોંગ્રેસે જીતી હતી. 6 બેઠકો પૈકી સૌથી ચર્ચાસ્પદ બેઠક રાધનપુર છે જ્યાં ભાજપે અલ્પેશ ઠાકોરને મેદાનમાં ઉતાર્યા છે. અલ્પેશ ઠાકોરને કોંગ્રેસના રઘુ દેસાઇ ટક્કર આપશે. 2017માં કોંગ્રેસમાંથી અલ્પેશ ઠાકોર લડ્યા હતા અને કોંગ્રેસે રાધનપુર બેઠક પરથી જીત મેળવી હતી.
ત્યારે અમરાઇવાડી બેઠક પરથી 2 પાટીદાર ઉમેદવારો વચ્ચે જંગ છે ભાજપના જગદીશ પટેલ અને કોંગ્રેસના ધર્મેન્દ્ર પટેલ મેદાને છે. લુણાવાડા બેઠક પર ભાજપના જિગ્નેશ સેવક અને કોંગ્રેસના ગુલાબસિંહ ચૌહાણ મેદાનમાં છે.
જ્યારે બાયડ બેઠક પરથી ભાજપે ધવલસિંહ ઝાલાને ટિકિટ આપી છે. ધવલસિંહ ઝાલા 2017માં કોંગ્રેસમાંથી લડ્યા હતા અને પક્ષ પલટો કરી ભાજપમાં જોડાયા છે. તો ધવલસિંહ ઝાલા સામે કોંગ્રેસે જશુભાઇ પટેલને ઉતાર્યા છે.
તો ખેરાલુ બેઠક ટકાવી રાખવા માટે ભાજપને પડકાર છે ભાજપના અજમલ ઠાકોર અને કોંગ્રેસના બાબુજી ઠાકોર મેદાનમાં છે. તો થરાદ બેઠક પર જીવરાજ પટેલને ભાજપે ટિકિટ આપી છે જ્યારે કોંગ્રેસે ગુલાબસિંહ રાજપૂતને મેદાનમાં ઉતાર્યા છે.
ત્યારે મતદાન પ્રક્રિયાને લઇ ચુસ્ત બંદોબસ્ત ગોઠવી દેવાયો છે. SRP, CRPF, BSF સહિતની ટૂકડીઓ બંદોબસ્તમાં તૈનાત છે અને સંવેદનશીલ મતદાન કેન્દ્રોનું વીડિયો રેકોર્ડિંગ પણ કરાશે. DYSP અને PI કક્ષાના અધિકારીઓને બંદોબસ્તની જવાબદારી સોંપાઇ છે. બંદોબસ્તમાં પોલીસજવાનો અને હોમગાર્ડના જવાનો પણ તૈનાત છે. અને ચૂંટણી લગતી ફરિયાદ માટે હેલ્પ લાઇન નંબર 1950 પણ જાહેર કરાઇ છે.