ભાવનગરમાં GST કરચોરી અંગે ચર્ચિત માધવ સ્ટીલના નિલેશ પટેલે ધરપકડથી બચવા અમદાવાદમાં GSTના અધિકારીઓની ટીમ પર હુમલો કરતા ચકચાર મચી જવા પામી છે
ભાવનગરના માધવ સ્ટીલના માલિકે કર્યો હુમલો
અમદાવાદમાં GSTની ટીમ પર કર્યો હુમલો
કરચોરી કેસમાં SCએ શુક્રવાર સુધીના જામીન આપ્યા હતા
ભાવનગરમાં રૂા.739 કરોડની GST કરચોરી અંગે ચર્ચિત માધવ સ્ટીલના નિલેશ પટેલે અમદાવાદમાં ધરપકડથી બચવા GSTના અધિકારીઓની ટીમ પર હુમલો કરતા ભારે ચકચાર મચી જવા પામી છે. જો કે, આ સમગ્ર ઘટનામાં નિલેશ પટેલ ભાગી જવામાં સફળ રહ્યો હતો.
આસિસ્ટન્ટ કમિશનરની ટીમ પર કાર ચડાવવાનો કરાયો પ્રયાસ
ઉલ્લેખનીય છે કે, નિલેશ પટેલને કરચોરી કેસમાં SCએ શુક્રવાર સુધીના જામીન આપ્યા હતા. આથી GSTના આસી.કમિશનર અને તેમની ટીમ નિલેશ પટેલને ધરપકડ કરવા અમદાવાદ પહોંચ્યા હતા. દરમિયાન અધિકારીઓએ ધરપકડની વાત કરતા નિલેશ પટેલ ત્યાંથી કાર લઈ ભાગ્યો હતો અને અધિકારીઓએ અન્ય કારમાં તેનો પીછો કર્યો હતો. જ્યાં અધિકારીઓ તેને ઝડપવા જતા તેણે રીવર્સકાર લઈને નુકશાન પહોંચાડ્યું હતું અને ત્યારબાદ અધિકારીઓ પર કાર ચડાવવાની કોશિષ કરી હતી.જો કે અંતમાં નિલેશ પટેલ ભાગી જવામાં સફળ રહ્યો હતો.
ગત જુલાઈ માસમાં સ્ટેટ GST વિભાગે માધવ કોપર લિમિટેડ ખાતે દરોડા પાડ્યાં હતાં.
આ અંગે મોડીરાત્રે પોલીસ ફરિયાદ માટે તજવીજ હાથ ધરી હોવાનું GSTના અધિકારીઓએ જણાવ્યું હતું. ઉલ્લેખનીય છે કે, સ્ટેટ GST ટીમ દ્વારા ગત જુલાઇ માસ દરમિયાન ભાવનગરના માધવ કોપર લિમિટેડ ખાતે GSTની ગેરરીતિ અંગે પાડવામાં આવેલા દરોડામાં રૂપિયા 739 કરોડની ગેરરીતિઓ સપાટી પર આવી હતી. આ કેસમાં ગત જુલાઇ માસથી માધવ કોપર લિમિટેડના ડિરેક્ટર નિલેશ પટેલ ફરાર હતા.