લોકસભાની ચૂંટણીને લઇને ભાજપ અને કોંગ્રેસ સહિતનાં રાજકીય પક્ષો ચૂંટણી પ્રચારમાં લાગી ગયાં છે અને મતદારોને રીઝવવા માટે અવનવા પ્રયાસો થઈ રહ્યાં છે. જો કે બીજી બાજુ ચૂંટણી પ્રક્રિયા શાંતિપૂર્ણ માહોલમાં પૂર્ણ કરવા તંત્ર પણ કામે લાગી ગયું છે.
રાજ્યનાં પડોશમાં આવેલ સંઘ પ્રદેશ દમણમાં પણ ચૂંટણીને લઇને રાજકીય માહોલ પણ ગરમાયો છે ત્યારે પ્રદેશનું પ્રશાસન પણ દોડતું થઇ ગયું છે. પ્રદેશમાં લોકસભાની ચૂંટણીને લઇને દમણમાં પોલીસ એલર્ટ મોડ પર છે. એટલું જ નહીં પણ નોટેરીયસ શખ્સોનાં પાસાં પણ કરવાની શરૂઆત કરી દેવાઈ છે.
વલસાડ જિલ્લાની હદમાં આવેલું આ છે કેન્દ્ર શાસિત પ્રદેશ દમણ અને સેલવાસ કે જ્યાંનું રાજકારણ દિલ્હીનાં રાજકારણને પણ ટક્કર આપે છે. આમ, તો આ નાનકડા પ્રદેશ છે. પરંતુ અહીં સત્તા હાંસલ કરવા માટે કોઈ પણ દાવ પેંચ રમતા હોય છે અને લોહીયાળ જંગ થતાં પણ વાર નથી લાગતો. આથી આ પ્રદેશમાં પોલીસે વધુ બાજ નજર રાખવી પડે છે.
ચૂંટણીનાં દિવસો નજીક આવી રહ્યાં છે. તો પોલીસે તડામાર તૈયારીઓ સાથે રાઉન્ડ ધ કલોક ચેકિંગ શરૂ કર્યું છે. દમણને દરિયા કિનારો પણ લાગતો હોવાંથી પોલીસ સી પેટ્રોલિંગ પણ કરી રહી છે. દમણનાં દરિયા વિસ્તારનાં ગામો અને ગુજરાતની સરહદ પર આવેલી ચેકપોસ્ટ ઉપર પોલીસે ચેકિંગ હાથ ધરવાની સાથે સીસીટીવી મોનિટરિંગ પણ શરૂ કર્યું છે.
સંઘ પ્રદેશ દાદરા નગરહવેલીમાં પણ આજ પ્રકારે લોખંડી બંદોબસ્ત ગોઠવવામાં આવ્યો છે અને ફ્લેગ માર્ચ સહીત બોર્ડર ઉપર ખાસ સુરક્ષા એજન્સીઓ તૈનાત કરવામાં આવી છે. ચૂંટણી દરમ્યાન કોઈ પણ પ્રકારનાં છમકલા નહીં થાય તે માટે પોલીસ વિભાગ પૂરતા પ્રયાસો કરી રહ્યું છે. તો દમણમાં માથાભારે વ્યક્તિઓ સામે કડક કાર્યવાહી કરવાની શરૂઆત કરી છે. અત્યાર સુધી ૨ શખ્સોની પાસા હેઠળ ધરપકડ કરવામાં આવી છે. તો બીજા પણ જાણીતા માથાભારેનો વારો કાઢવા યાદી તૈયાર થઇ રહી છે.
ભૂતકાળમાં પણ બન્ને પ્રદેશ દમણ અને દાદરા નગરહવેલીમાં ચૂંટણી સમયે મોટી ધમાલ થઇ ચુકી છે અને તેમાંય દમણમાં ક્યારે પણ બબાલ થઇ શકે છે. જેથી દમણ પોલીસ દ્વારા શંકાસ્પદ વ્યક્તિઓ વિરુદ્ધ કાયદેસરની કાર્યવાહી કરવામાં આવી રહી છે.
જેમાં દમણનાં ઇતિહાસમાં પહેલી વાર ત્રણ શખ્સો વિરુદ્ધ પાસાની કાર્યવાહી પણ કરવામાં આવી છે. આમ આ વખતે ચૂંટણીની પ્રક્રિયા શાંતિપૂર્ણ માહોલમાં પૂરી કરવા પોલીસ અને CRPFની ટીમો અત્યારથી જ કવાયત કરી રહી છે. જો કે ચૂંટણી પુરી ન થાય ત્યાં સુધી બન્ને સંઘપ્રદેશોની પોલીસે ખડે પગ ફરજ બજાવવી એ અનિવાર્ય છે.