ક્રિકેટ / છેલ્લાં પાંચ વર્ષમાં ભારતે સૌથી વધુ 32 ટેસ્ટ જીતીઃ ઓસી-વિન્ડીઝને સૌથી વધુ વાર હરાવ્યું

• ICC ટેસ્ટ રેન્કિંગમાં ટીમ ઇન્ડિયા બાદ ન્યૂઝીલેન્ડ બીજા સ્થાન પર
• ન્યૂઝીલેન્ડની ટીમની જીતની ટકાવારી ૫૫ ટકા
• ટીમ ઇન્ડિયાએ છેલ્લાં પાંચ વર્ષમાં મેળવી છે વધુ જીત

ભારત તા. ૧ જાન્યુઆરી, ૨૦૧૬થી અત્યાર સુધીમાં સૌથી વધુ ટેસ્ટ મેચ જીતનારી ટીમ છે. સાથે જ ભારતની જીતની ટકાવારી પણ અન્ય ટીમ કરતાં વધુ છે. છેલ્લાં પાંચ વર્ષમાં ભારત સહિત ફક્ત ત્રણ ટીમ ૫૦ ટકાથી વધુ મેચ જીતી શકી છે. ભારતે ૫૧ ટેસ્ટમાંથી ૩૨માં જીત હાંસલ કરે છે એટલે કે જીતની ટકાવારી ૬૨.૭૪ ટકા રહી છે.

ન્યૂઝીલેન્ડની ટીમની જીતની ટકાવારી ૫૫ ટકા

ન્યૂઝીલેન્ડની ટીમની જીતની ટકાવારી ૫૫ ટકા અને દક્ષિણ આફ્રિકાની ટીમની જીતની ટકાવારી ૫૧.૧૧ ટકા છે. ભારતના પ્રવાસે આવેલી ઈંગ્લેન્ડની આ સમયગાળા દરમિયાન ૬૪માંથી ૩૧ ટેસ્ટ મેચ જ જીતી શકી છે અને તેની જીતની ટકાવારી ૪૮.૪૩ ટકા છે.

ટીમ ઇન્ડિયાએ છેલ્લાં પાંચ વર્ષમાં મેળવી છે વધુ જીત

ટીમ ઇન્ડિયાએ છેલ્લાં પાંચ વર્ષમાં ઓસ્ટ્રેલિયા અને વિન્ડીઝ સામે સૌથી વધુ જીત મેળવી છે. તા. ૧ જાન્યુઆરી, ૨૦૧૬થી અત્યાર સુધીમાં ભારતે આ બંને દેશની ટીમને છ-છ વાર પરાજિત કરી છે. ઓસટ્રેલિયા સામે ટીમ ઇન્ડિયા પહેલી વાર સતત ત્રણ શ્રેણી જીતવામાં સફળ રહી છે. આમાંની બે શ્રેણી ઓસ્ટ્રેલિયાની ધરતી પર અને એક શ્રેણી ભારતમાં રમાઈ છે.

વિરાટથી વધુ રન માત્ર ઈંગ્લેન્ડના જો રૂટે બનાવ્યા

છેલ્લાં પાંચ વર્ષમાં ટેસ્ટ ક્રિકેટમાં ભારતના શાનદાર પ્રદર્શનની પાછળ કેપ્ટન વિરાટ કોહલી, ચેતેશ્વર પૂજારા અને અજિંક્ય રહાણેની બેટિંગને મહત્ત્વપૂર્ણ ભૂમિકા ભજવી છે. આ સમયગાળામાં જ આ ત્રણેય ભારતના ટોચના ત્રણ બેટ્સમેન રહ્યા છે. વિરાટે આ સમય દરમિયાન ૪૬ ટેસ્ટમાં ૪૩૨૪ રન બનાવ્યા છે. દુનિયામાં આ પાંચ વર્ષોમાં વિરાટથી વધુ રન માત્ર ઈંગ્લેન્ડના જો રૂટે બનાવ્યા છે. રૂટે ૬૩ ટેસ્ટમાં ૫૧૩૨ રન બનાવ્યા છે.