BIG NEWS / અમદાવાદ હાઇપ્રોફાઇલ ડ્રગ્સ કેસમાં 600 નબીરાઓનું લિસ્ટ, પોલીસ તપાસમાં થયા અનેક ખુલાસા 

• બોપલ ડ્રગ્સ કેસ મામલે પોલીસ તપાસ તેજ
• વંદિત પટેલની CDRમાં ખુલાસો
• 600 નબીરાઓનું લીસ્ટ આવ્યું સામે

બોપલમાંથી ડ્રગ્સ કેસ મામલે પોલીસ તપાસ તેજ કરી  

ગુજરાતમાં દરિયાઈ માર્ગે કે અન્ય રાજ્યમાંથી આવતા ડ્રગ્સમાં રોજ નવા તથ્યો બહાર આવી રહ્યાં છે. હાલમાં જ  વંદિત પટેલ, જે અમદાવાદના સાઉથ બોપલ વિસ્તારમાં કહેવા માટે સલૂન ચલાવતો હતો, પણ તેના હાઈ પ્રોફાઈલ ડ્રગ્સ રેકેટની ખાસ્સી ચર્ચા ચાલી છે. પોલીસે આ મામલે તેની ધરપકડ કરી છે. હવે પોલીસે આ મામલે તપાસ તેજ કરી છે. ઉલ્લેખનીય છે કે, પોલીસ તપાસમાં પેડલરોના નામ પણ સામે આવ્યાં છે.  

પોલીસે 600 જેટલા નબીરાઓનું લીસ્ટ તૈયાર કર્યુ 

પોલીસે વંદિત પટેલની પુછપરછ સાથે  ડ્રગ્સનું નેટવર્ક ઝડપી પાડવા માટે કોલ ડિટેઇલ્સ પણ મંગાવી હતી. કોલ ડિટેલ્સના આધારે પોલીસે 600 જેટલા નબીરાઓનું લીસ્ટ તૈયાર કર્યું છે. પોલીસે જે નબીરાઓનું લીસ્ટ તૈયાર કર્યું છે તે તમામ નબીરાઓ જાણીતા ઉદ્યોગપતિ, બિલ્ડર અને પ્રતિષ્ઠિત પરિવારના હોવાનું બહાર આવ્યું છે. જો કે પોલીસ નબીરાઓની તપાસ શરૂ કરે એ પહેલા જ કેટલાક પરિવારો સમાધાની મુદ્રામાં આવ્યા છે તો કેટલાક નબીરાઓ વિદેશ પ્રવાસે જતા રહ્યા હોવાની માહિતી હાલ બહાર આવી રહી છે. વંદિત પટેલ અને તેના મિત્રો મળી ડ્રગ્સનું રેકેટ ચલાવતા હતા

શ્રીમંત પરિવારના મોભીઓની નબીરાઓને બચાવવા મથામણ

સૂત્રોના જણાવ્યા મુજબ, એક શ્રીમંત પરિવારના મોભીએ વંદિતના સીડીઆરમાં પોતાના પુત્રનું નામ આવતાં મધ્યસ્થી કરાવવા તમામ પ્રકારની પ્રક્રિયા કરી છે, જ્યારે એક મોટા અને વિવાદિત મોભીના પૌત્ર પોતાનું નામ જાહેર થવાની બીકે ચાર દિવસ અગાઉ દુબઈ જતો રહ્યો છે. આ એક-બે બિલ્ડર કે ઉદ્યોગપતિની વાત નથી, પણ શહેરના નામી અને પ્રતિષ્ઠિત પરિવારનાં સંતાનોની વાત છે, જેથી આમ ક્યાંય પોલીસ કઈ ખોટું ન કરે એની જવાબદારી આડકતરી રીતે ગૃહરાજ્ય પ્રધાને લીધી છે.

તંત્ર સામે સળગતા સવાલો

-વંદિત પટેલ કેસમાં તટસ્થ તપાસ થશે કે કેમ?
-પોલીસ વંદિતના કોલ રેકોર્ડસ બાદ કેવી કરશે કાર્યવાહી?
-પોલીસ નબીરાઓને સબક શીખવાડશે કે પછી દયા દાખવશે?
-શું પોલીસના મોટા ઘરના નબીરાઓના કોલર સુધી હાથ પહોંચશે?
-શું પોલીસ નબીરાઓને પૂછપરછ માટે બોલાવશે કે કેમ?
-શું નબીરાઓને ડ્રગ્સથી પાછા વાળવા માટે કોઇ સ્ટ્રેટેજી બનશે?
-ડ્રગ્સના નેટવર્કના ડામવા માટે સરકારનો કોઈ નક્કર એક્શન પ્લાન છે?
-બરબાદીના રસ્તે જતા યુવાઓને કેવી રીતે બચાવી શકાશે?
-ડ્રગ્સ પેડલરો સુધી કેવી રીતે પહોંચી શકશે પોલીસ?
-યુવાધનને કેવી રીતે ડ્રગ્સના રવાડે ચડતા બચાવશો?