કાંકરિયા રાઈડ દુર્ઘટના / LG હોસ્પિટલમાં ર૦ વર્ષનો તીર્થ ભાવસાર મૃત્યુ સામે જંગ લડી રહ્યો છે

ગઇ કાલની દુર્ઘટનામાં ર૩ વર્ષીય મનાલી વિપુલભાઇ મારવાડી નામની યુવતીનું સ્થળ પર જ મોત થયું હતું. જ્યારે મહંમદ ઝાયેદ નામના રર વર્ષીય ગંભીર રીતે ઇજાગ્રસ્ત સહેલાણીનું એલજી હોસ્પિટલમાં મોત થયું હતું. 

દરમિયાન એલજી હોસ્પિટલના આરએમઓ ડો. લક્ષ્મણ તાવિયાડ કહે છે કે હાલમાં તીર્થ નામનો ર૦ વર્ષીય યુવક મલ્ટિપલ ફ્રેકચરના કારણે ટ્રોમા સેન્ટરમાં અતિ ગંભીર હાલતમાં છે. આ યુવકને માથાના ભાગે ભારે ઇજા પહોંચી હોઇ તે કોમામાં છે. જ્યારે અન્ય ૧૦ દર્દી પણ ટ્રોમા સેન્ટરમાં સારવાર હેઠળ છે.

આ દરમિયાન જાગુ બહેન, મુસરાબાનુ, ફલક, વિશાલ, આશુભાઇ, શોભિત, યુસુફખાન, તોઇયાબાનુ, બીજલબહેન અને રાકેશભાઇ આ ૧૦ દર્દીઓ મલ્ટિપલ ફ્રેક્ચરના કારણે ટ્રોમા સેન્ટરમાં ઉપચાર હેઠળ છે.

ગઇ કાલે કાંકરિયા બાલવાટિકા પાસે આવેલ એડ્વેન્ચર પાર્કમાં ડિસ્કવરી નામની રાઇડનો સહેલાણીઓને હવામાં લઇ જતો એંગલ અચાનક બટકાઇ જતાં ૩૧ સહેલાણીઓ રાઇડની સાથે ૫૦  ફૂટ ઊંચેથી નીચે પટકાયા હતા જેમાં ઝાયેદ મેમણ અને મનાલી રજવાડીનું મોત થયું છે.

જ્યારે ૨૯ લોકો ઇજાગ્રસ્ત થયા હતા. આ ઘટનામાં સમગ્ર વિસ્તારમાં હાહાકાર મચી ગયો હતો. રાઇડ તૂટવાની દુર્ધટનામાં મોતને ભેટેલાે ૨૨ વર્ષના ઝાયેદ મેમણના પરિવારજનો પર આભ ફાટી પડ્યું છે. ત્રણ બહેનો  વચ્ચે એકનો એક ભાઇ ઝાયેદ મોબાઇલની દુકાનમાં કામ કરતો હતો. મરનાર ઝાયેદની બહેન સાયમા મેમણે જણાવ્યું છે કે ઝાયેદનો કોઇ મિત્ર હતો નહીં.