ઘરેલું હિંસા / લાલુપ્રસાદ યાદવની પુત્રવધુ ઐશ્વર્યાએ સાસુ રાબડીદેવીએ મારપીટ કર્યાની ફરિયાદ કરી

• તેજપ્રતાપ યાદવની પત્ની ઐશ્વર્યા રાયે પોતાની સાસુ અને પૂર્વ મુખ્યપ્રધાન રાબડીદેવી પર મારપીટ કરીને પોતાને ઘરમાંથી બહાર કાઢી મૂકવાનો આક્ષેપ કર્યો 
• રાબડીદેવીએ મહિલા સુરક્ષાકર્મીઓ સાથે મળીને વાળ ખેંચીને મારપીટ કરી અને ઘરમાંથી બહાર કાઢી મૂકી

મારો સામાન બહાર ફેંકીને સુરક્ષાકર્મીઓની મદદથી મને ઘસડતાં ઘસડતાં ઘરની બહાર કાઢી મૂકી

ઐશ્વર્યાએ આક્ષેપ કર્યો છે કે તેજપ્રતાપનાં માતા-પિતાને લઇને પટનાની ડીએન કોલેજમાં લગાવાયેલા આપત્તિજનક પોસ્ટર અંગે જ્યારે મેં મારી સાસુને પૂછયું તો તેમણે મહિલા સુરક્ષાકર્મીઓ સાથે મળીને મારા વાળ ખેંચ્યા અને મારી સાથે મારપીટ કરી. આ ઉપરાંત મારો મોબાઇલ ફોન છીનવી લીધો. મારો સામાન બહાર ફેંકીને સુરક્ષાકર્મીઓની મદદથી મને ઘસડતાં ઘસડતાં ઘરની બહાર કાઢી મૂકી.

ઐશ્વર્યાએ રાબડી પર તેને જમવાનું નહીં આપવાનો પણ આક્ષેપ કર્યો છે

ઐશ્વર્યાએ એમ પણ જણાવ્યું કે આ સમગ્ર ઘટનાની જાણકારી તેના દિયર અને બિહાર વિધાનસભામાં વિરોધ પક્ષના નેતા તેજસ્વીપ્રસાદ યાદવને છે, પરંતુ તેઓ કંઇ જ કરી રહ્યા નથી. ઐશ્વર્યાએ રાબડી પર તેને જમવાનું નહીં આપવાનો પણ આક્ષેપ કર્યો છે. આ પહેલાં પણ સપ્ટેમ્બર મહિનામાં વરસાદ હોવા છતાં પણ તેને ઘરની બહાર કાઢી મૂકી હતી. 

અદાલતના હસ્તક્ષેપ બાદ તે પોતાના ઘરમાં પરત ફરી શકી હતી.ઐશ્વર્યાના પિતાએ જમાઇ તેજપ્રતાપ યાદવને એક પાગલ યુવક કહ્યો. તેમણે પોતાની પુત્રી સાથે રાબડીદેવીનાં વર્તન તરફ ઇશારો કરતાં કહ્યું કે અમે રાજકીય લડાઇ તો લડીશું જ સાથે રાબડીદેવીને ઉઘાડી પાડીશું.