વાકયુદ્ધ / 'માતા'ના નામે રાજકારણ!: કુમાર કાનાણીના નિવેદનથી ગરમાવો, અલ્પેશ કથિરીયાએ કહ્યું, રાજનીતિમાં પરિવારવાદ યોગ્ય નહીં'

• સુરતની વરાછા બેઠક પર ગરમાયું રાજકારણ
• ભાજપ અને AAPના ઉમેદવાર વચ્ચે વાક્યુદ્ધ
• કાનાણીના નિવેદન બાદ અલ્પેશના અણીયારા સવાલ

તમને જણાવીએ કે, નજીકના ભૂતકાળની જ કેટલીક ચૂંટણીઓમાં નેતાઓની બેફામ નિવેદનબાજીથી આપણે સૌ કોઈ વાકેફ છીએ. ત્યારે હવે સુરતની વરાછા બેઠકના ઉમેદવારોની નિવેદનબાજી પર વિવાદ છેડાયો છે.

ગુજરાત વિધાનસભા ચૂંટણીનો પ્રચાર ચરમસીમાએ

મહત્વનું છે કે, ગુજરાત વિધાનસભા ચૂંટણીનો પ્રચાર ચરમસીમાએ પહોંચી ગયો છે. એક પક્ષ બીજા પક્ષ પર આરોપ-પ્રત્યારોપ લગાવી રહ્યો છે. ત્યારે એક વાર ફરી માતાને લઈને નિવેદન બાજી થઈ રહી છે. અલ્પેશ કથીરિયાની માતાના ઘૂંટણનું ઓપરેશન 'માં અમૃતમ કાર્ડ'થી કરાયું હોવાનું ભાજપના ઉમેદવાર કુમાર કાનાણી દ્વારા પ્રચારમાં જાહેરમાં ઉછાળ્યા બાદ ફરીવાર 'મા'નો મુદ્દો ગુંજ્યો છે. ત્યારે આ મામલે અલ્પેશ કથીરિયાએ કુમાર કાનાણીએ કરેલા નિવેદનનો વળતો જવાબ આપ્યો છે.

અલ્પેશે કહ્યું કે, 'જેલમાં હતો ત્યારે ઓપરેશન થયું, પણ કોરોના સમયે તમારો ફોન કેમ બંધ હતો? માતાના નામે કેમ મત માંગો છો? રાજનીતિમાં કોઈપણ પ્રકારના પરિવારવાદ ન હોવો જોઈએ. રાજનીતિ રાજનીતિની રીતે રહેવી જોઈએ. પરિવારના સભ્યોને વચ્ચે લાવવા યોગ્ય નથી.'

જુઓ શું કહ્યું હતું કુમાર કાનાણીએ?

મા કાર્ડ પર મારી માતાનું ઓપરેશન થયું છે પણ આ કોઈ ચૂંટણીનો મુદ્દો નથી: અલ્પેશ

કુમાર કાનાણીએ અલ્પેશની માતાના ઓપરેશન બાબતે જે નિવેદન કર્યું હતું તે મુદ્દે અલ્પેશ કથીરિયાએ નિવેદન આપતા કહ્યું કે, 'ચૂંટણી છે એટલે દરેક લોકો પોતાના સ્ટેજ પરથી પ્રચાર કરી રહ્યાં છે. કુમાર કાનાણી દુષ્પ્રચાર કરી રહ્યાં છે. પ્રથમ તો હું એમનો આભાર માનું કે એમના કારણે મારી માતાનું ઓપરેશન થયું. પરંતુ હું કાકાને કહેવા માંગુ છું કે તમારા કારણે જ હું જેલમાં હતો. હું જેલમાં હતો તે દરમ્યાન જ મારી માતાનું ઓપરેશન થયું હતું. એ દુઃખ હું જ જાણું છું કે તે સમયે મારી શું પરિસ્થિતિ હતી. કોઈની માતાના નામે તમે મત લેવા માંગો છો તો તમે નામર્દ છો. કોરોનાના સમયે કાકા તમારો ફોન બંધ હતો. તમે એક પણ વાર મારી માતાને હોસ્પિટલમાં મળવા ગયા હતા? તમે મારી માતાને એક પણ દવા પહોંચાડી હતી? તમે AC ઓફિસોમાં બેઠા હતા ત્યારે હું લોકો વચ્ચે ઉભો હતો. તમે હમણાં મારી માતાના નામે રાજનીતિ કરો છો તો તે જે રકમ થઈ હતી તે વ્યાજ સહિત પરત ચૂકવવા તૈયાર છું. હું સ્વીકારું છું કે મા કાર્ડ પર મારી માતાનું ઓપરેશન થયું છે પણ આ કોઈ ચૂંટણીનો મુદ્દો નથી. તમે જાતે કોઈ સુવિધા નથી કરી, સરકાર લાભ આપે છે તો અમે લાભ લીધો. અમે ટેક્સ ભરીએ છે તો અમારો હક પણ બને છે.'