કોડીનાર તાલુકાના જાંત્રાખડી ગામે માસૂમ બાળકીને હવસનો શિકાર બનાવી મોતને ઘાટ ઉતારી દેવામાં આવતા ખળભળાટ મચી ગયો છે.
નરાધમ સામે વર્ષી રહ્યો છે ચારેકોરથી લોકોમાં ફિટકાર
આરોપીને ફાંસીના માચડે લટકાવી દેવાની માંગ
પોલીસે આરોપીને ગણતરીની કલાકોમાં ઝડપી લીધો
ગીર સોમનાથ જિલ્લાના કોડીનાર તાલુકાના જાંત્રાખડી ગામે રૂહકાંપ ઘટના પ્રકાસમાં આવી છે. જેમાં આઠ વર્ષની માસૂમ બાળકીને ઘરમાં બોલાવી નરાધમે દુષ્કર્મ ગુજાર્યું હતું. એટલું જ નહી પોતાની પાપલીલા ઉઘાડી ન પડે તે માટે દીકરીને મોતને ઘાટ ઉતારી દઈ મૃતદેહને અવાવરુ જગ્યાએ ફેંકી દેતા સમગ્ર પંથકમાં હડકંપ મચી જવા પામ્યો છે. આ ઘટનાની જાણ થતા પોલીસે આરોપીને ગણતરીની કલાકોમાં ઝડપી લીધો છે. આરોપીના આ કૃત્યથી ચારેકોર લોકોમાં ફિટકાર વર્ષી રહ્યો છે અને આરોપીને ફાંસીના માચડે લટકાવી દેવામાં આવે તેવી સમગ્ર પંથકવાસીઓ માંગ કરી રહ્યા છે.
આરોપી શામજીએ વાસના ભૂખ્યા વરુની જેમ બાળકીને પીંખી નાખી
સમગ્ર પંથકમાં હાહાકાર મચાવતી આ ઘટનાની જાણવા મળતી વિગત અનુસાર ગીર સોમનાથ જિલ્લાના જાંત્રાખડી ગામના કૌશિકગીરી ઇશ્વરગીરી દરજીકામ કરી પોતાના પરિવારનું ગુજરાન ચલાવતા હતા. આ દરમિયાન તેમની આઠ વર્ષની માસૂમ બાળકી ઘરે એકલી હતી જેને પાડોશીએ દુકાને વસ્તુ લેવા મોકલી હતી. જે જઈ રહી હતી ત્યારે રસ્તામાં આરોપી આરોપી શામજી ભીમા સોલંકીએ પણ આ દિકરીને રૂપીયા આપી બીડી મંગાવી હતી. જે બીડી લઈ આવેલી દીકરી બીડી દેવા આરોપીનાઆ ઘરે ગઈ ત્યારે આરોપી શામજી ઘરે એકલો હતો. જેનો લાભ લઈ તેને બાળકીને અંદર ખેંચી લીધી હતી. આરોપીના આ કૃત્યથી બાળકી હેબતાઈ જઇ બૂમો પડતાં તેના મોઢે ડુમો દઈ આરોપી શામજીએ વાસના ભૂખ્યા વરુની જેમ બાળકીને પીંખી નાખી હતી.
પોતાનું કૃત્ય સંતાડવા ઠંડા કલેજે ફૂલ જેવી બાળકીની હત્યા નિપજાવી
નરાધમ શખ્સે માસુમ ઉપર દુષ્કર્મ આચર્યા બાદ પોતાનું કૃત્ય સંતાડવા ઠંડા કલેજે ફૂલ જેવી બાળકીની હત્યા નિપજાવી હતી. એટલું જ નહી રાક્ષસી વૃતિ દાખવી દયાહિન શખ્સે માસુમના મૃતદેહને કોથળામાં ભરી ગામના 66 કે.વી.ની સામે ફેંકી દીધો હતો. અને જાણે કઈ થયું જ ન હોય તેમ ઘરે આવી સુઇ ગયો હતો. આ દરમિયાન દીકરીની માતા ઘરે આવી હતી જયા દીકરી હાજર ન મળતા માતાએ ઊચક જીવે તપાસ હાથ ધરી હતી. જે તપાસમાં બાળકીની અવાવરૂ જગ્યાએથી લાશ મળી આવતા પરિવારજનોના પગ નીચેથી જમીન સરકી ગઈ હતી.
શખ્સને ફાંસીએ લટકાવી દેવાની ગ્રામજનોની માંગ
આ અંગે જાણ થતાં એએસપી ઓમપ્રકાશ જાટ ઘટનાસ્થળે દોડી ગયા હતા. મૃતદેહને પીએમ અર્થે ખસેડવા સહિતની કાર્યવાહી કરી આરોપીના ઘરમાંથી અમુક પુરાવાઓ મળી આવ્યા હોવાથી ઘરને સીલ કરી ફોરેન્સીક ટીમને બોલાવવામાં આવી હતી. જે બાદ પોલીસે ગણતરીના કલાકોમાં નરાધમ આરોપીને ઝડપી લીધો હતો. જેની પ્રાથમિક તપાસમાં આરોપી શામજી બે સંતાનનો પિતા છે અને માછીમારી કરી ગુજરાન ચલાવે છે વધુમાં દારૂ પીવાની કુટેવ ધરાવતો હોવાનું પણ સામે આવ્યું છે. આરોપીઓ આવું કૃત્ય કરતા પહેલા હજાર વખત વિચારે તે માંટે આ શખ્સને ફાંસીએ લટકાવી દેવામાં આવે તેવી ગ્રામજનો માંગ કરી રહ્યા છે.